NAPOLI – BORUSSIA DORTMUND (18/9/2013) 2 A 1 ‘A VEDETTE ACCUSSÍ

NAPOLI – BORUSSIA DORTMUND (18/9/2013) 2 A 1 ‘A VEDETTE ACCUSSÍ Festa granna ajeressera ô san Paolo, gugliú e siggéssa(vittoria) ‘mpurtanta chella d’’e guagliune cuane ca sott’ô patapato ‘e ll’acqua e cu ttutto ca ‘ntribbuna ce steva assettato, vicino a Dela, chella seccia ‘e Giggino-uocchiestuorte, cu tutto chesto ajeressera ‘e cuane nun se facetteno ‘mpressiunà dô crocchemmitànio (spauracchio) terisco vicecampione aiuropeo e â fine ‘e ‘nu bbellu fullé ‘o mettetteno sotto partenno cu ‘o pere justo ‘nciampionsa e cunfermanno ca ‘o fatto d’ogge nun è cchillo d’ajere e ca ‘sta tempurata cca p’’o Napule è tutta n’ata zinfunia tanto è overo ca ‘nfra campiunato e ciampionsa ‘o Napule nun à mancato ‘nu colpo e ‘ncopp’a cquatto fullé, so’ state quatto siggésse (vittorie) p’’a cuntentezza nosta e d’’o direttore d’urchesta: don Rafele Benitèz(zo)! Granna siggéssa(vittoria) contro a n’ avverzario ‘mpurtante!!..Siggéssa(vittoria) ca ce lassaje ‘o core dint’ô zuccaro, pure si ô finale ce fove quacchu sfregazzo(sbavatura); ma ‘e guagliune strignetteno ‘e diente e tenetteno bbotta nsi’ â fine, pecché a cchillu punto ‘nu pareggio d’’o Borussia fósse stata ‘na brincantaría (beffa). Ma nun succedette, nun succedette cu ttutto ca ll’arbitro nun ne vuleva sapé ‘e siscà ‘a fine... nun sucedette e putettemo spilà ‘a sciampagna ‘ntribbuna divano comme buonu aurio pe dummeneca a ssera ca vène ca se va a mMilano contro a bbalotelli e socie. Aspettammoce n’atu maché (battaglia), ma ô ssolito senza pressa, senza paura, senza cassura (pausa)!!!Passammo ê ppaggelle: REINA 6,5 Sicuro e priciso ‘mpresa e quanno ascette, dètte cunfianza (fiducia) ê suĵe.dDoje perne: una quanno stuppaje ‘nu tentativo ‘e Lewandowski ô primmo ajone e n’ata ô finale quanno fermaje ‘na punizziona malegna ‘e Reússo. MAGGIO 6,5 Accumminciaje bbuono superanno spisso a Schmelzèrro. A ll’arrancua ê vvote fove anàtropo (devastante) pure si nun sempe fove priciso cu ll'urdemu pasiglio (passaggio) o cu ‘a conchiusione.Ê vvote me parette ca se fósse repigliato turnanno a essere ‘o jucatore d’’o ppassato.E ce servesse, ce servesse pecché cu ‘nu Maggio ‘nfromma ‘e fullé se risulvesseno cchiú ampressa. ALBIOL 7 Vincette a spurtellate quase tutte ‘e cumbattimente e facette arremarrà (ripartire) cu cqualità ll'azziona dê zzache (dalle retrovie). Jucatore ggià ‘nnespenzabbile p’’a scuatra luvarda! BRITOS 6,5 Ô pprincipio arresecaje paricchio ‘nu paro ‘e vote, ma ascette spisso palla ô pere lanzanno mo a zZuzzú e mo a Insigne ‘ncopp’â curzia ‘e mancina.Se ll’êtt’’a vedé cu ‘nu brutto accunto comme a Lewandowski, e spisso ll’anticipaje. Cu dduje salvatagge ‘mpurtante ô finale se facette perdunà ‘e sfregazze d’’o pprincipio. ZUNIGA 6 Miezu voto mancante o forze pure uno pecché sí pe tutt’ ‘o fullé accompagnaje cu qualità ll'azziona furmanno cu Lorenzigno ‘na bbella catena ‘ncopp’â mancina e facennose sèntere pure ‘nfase difenziva, ô finale, pe presumenzia (presunzione), sbracaje e cu ‘nu colpo ‘e tacco sciaurato mettette ‘o pallone ê spalle ‘e Reina dànno ll’aggio ô Borussia ‘e farce stà ‘mpena nsi’ â fine ca pareva nun vulesse arrivà maje! INLER 7 Confermaje d’essere tutto n’atu jucatore diverzo ‘a chillo visto cu wallerittino mazzarri; se vede ‘a mana ‘e don Rafele ca ‘o sta facenno crescere assaje; tutte ‘e pallune passajeno p’’e piere suĵe e isso ‘e smistaje a dduvere cu velocità e ppricisione.Finalmente stammo avenno ‘o piacere ‘e vederlo fà ‘o pantanguanguero (leader) ‘mmiezo ô campo! BEHRAMI 7 Accumminciaje forte assaje ‘ntercettanno tanti e ttanti pallune e e rallentanno ll’ azziona d’’o Borussia. ‘Nu cartellino jalizzo [ca nun se mmeretava...] â mez’ora ‘e juoco ‘o cundizziunaje frenannolo, ma sinamparco (comunque) riuscette a ffà trancara (argine) ‘nnante a ll’ avverzarie. CALLEJÓN 6,5 Bellu primmo ajone e arrancua ‘nu poco scadente pure pecché ‘a scuatra preferette jucà quase sempe dànno palla ‘ncopp’â curzia ‘e mancina;sinamparco risultaje sempe pulitelico (prezioso) pe ll’isurrupía (equilibrio) data ê suĵe. HAMSIK 5,5 ‘A nota stunata; quacche ppasiglio e poco ato, attiento a nun dà spazzio ‘nfase difenziva, ma mancaje ‘e cullabburà ‘nfase d’attacco e se ne scennette ruglio ruglio nsi’ a sparí cumpletamente dô fullé.Sperammo ca a mMilano torna a ffà ‘o Marekiaro!(dô 92° MESTO sv) INSIGNE 9 Soprattutto pe ttutt’ ‘o primmo ajone, ‘ncullabburazzione cu zZuzzú, facette vedé ê crucche terische ‘e surece vierde superanno senza fatica ll’ommo dint’ô stritto pe s’accentrà cu ‘o tipico muvimento suĵo e ô pprincipio d’’o fullé mancaje ‘e ‘nu niente ‘na rredda cu ‘nu bbellu tiro a ggiro. A ll’arrancua po se scatenaje jucanno a ccapa sotta nsi’ a ttruvà ‘a rredda d’’o dubblato (raddoppio) cu ‘na punizziona ‘a vinticinche metre ca fove ‘na magaria (magia) ‘na perna, ‘na pennellata ‘e Raffaello, ‘nu tiro ca trasette priciso dint’ ô sette ‘e mancina e ca ‘o purtiere crucco pe tentà ‘e piglià (ma nun ce riuscette), poveru guaglione!, se fravecaje cu ‘a capa dint’ô palo! Ascette cu tutt’ ‘o san Paolo allerta ca ‘o sbatteva ‘e mmane.(dô 72° MERTENS 6 Trasette súbbeto bbuono ‘int’ô fullé cercanno ‘a linia ‘e funno e mettenno ‘mmiezo pallune avvelenate.) HIGUAIN 8 ‘A difesa d’’o Borussia, appaurata, nun lle dètte spazzio, ma a isso ô mumento adatto sciglienno a mmestiere ‘o tiempo esatto riuscette a anticipà ‘o difenzore e cu ‘na cabbacera (colpo di testa) precisa e ‘ntelliggente purtaje ‘nvantaggio ‘e suoje. Veloce, putente e curaggiuso, â fine d’’o primmo ajone nun se facette ‘mpressiunà dô purtiere Weidenfeller asciutole’ncontro,comme a ‘na vufara, fora d’’a camma e ‘o custrignette a ttuccà vuluntariamente ‘o pallone cu ‘e mmane, ammeretannose d’essere jettato fora, lassanno ‘ndiece ‘o Borussia.Nun me dicite niente, ma penzo ca dint’â stessa accasione, Cavani se fósse fermato...(dô 76° PANDEV 6 Provaje a difennere palla e a ffà passà ‘e minute ô finale d’’o fullé quanno ‘o Borussia, doppo ll’utobbutto (autogol) ‘e Zuzzú turnaje ‘nfullé (in partita). ) BENITEZ 8 ‘A scuatra trasette ‘ncampo senza nisciuna paura comme ‘mmece succedeva p’’o ppassato; ‘e guagliune cuane senza pressa, senza paura, senza cassura (pausa) cummannajeno súbbeto ‘o juoco contro ê vice-campiune d'Airopa e ‘a rredda ca sbluccaje ‘o fullé e ‘o cartellino russo p’’o purtiere crucco, arrivajeno giustamente doppo ‘na pressione custante. Pe paricchiu tiempo ‘a scuatra luvarda duminaje manuvranno cu criterio ‘a dritta a mmancina e facenno correre a vvacante ‘e crucche ca aizajeno ‘a cresta sultanto doppo ca Zuzzú êva fatto ‘o nquacchio. A ll’arrancua avette ‘o curaggio ‘e sparagnarse a hHiguain e a Insigne pe ‘na ventina ‘e minute prubbabbilmente pure ‘mprospettiva Milànno. arbitro PROENÇA 5 ‘A chiena e ‘a vacante, anze primma ‘a vacante e ppo ‘a chiena; ô primmo ajone nun ne ‘ncarraje meza; po a ll’arrancua jette ‘nu poco meglio, ma cumplessivamente nun me piacette! E cu cchesto ve saluto e ve dongo appuntamento, si dDi’ vo’, a llunnerí quanno spero ‘e cuntarve ca dummeneca a ssera contro a bbalotelli e ssocie ‘o Napule ‘a fatto ‘nu granne fullé e è riturnato cu paricchi punte dint’ â sacca! Staveti bbe’! R Bracale Brak