OVA ‘MPRIATORIO

OVA ‘MPRIATORIO Chello ca ce vo’ pe sseje perzone 12 ova, 500 gramme ‘e passata ‘e pummarola, ‘na cepolla ndurata ammunnata e ntretata, ‘nu bicchiere abbunnante d’ uoglio ‘auliva dunciglio, ‘nu mazzetto ‘e vasenicola lavata, asciuttata e ntretata a mmano, sale fino e ppepe janco mmacenato a ffrisco q.n. s. 700 gramme ‘e felle ‘e pane casareccio arruscate ô tiesto, comme se fa Ricà dinto a ‘na prupurziunata tiella a sponne aute tutto ll’uoglio, agnadí ‘a cepolla ammunnata e ntretata, e a ffuoco allero farle piglià culore, po agnadí ‘a passata ‘e pummarola, avascià ‘o ffuoco e fà cocere pe ‘nu quarto d’ora agnadenno â fine ‘a vasenicola lavata, asciuttata e ntretata a mmano; a ‘stu punto arapí ll’ova dinto a ‘na ciotola e farle sciulià dint’â tiella cu ‘o zuco; cummiglià e aspettà ca ll’ove quagliano; accuncià ‘e sale fino e ppepe janco mmacenato a ffrisco, ‘mpiattà e purziunà ddoje ova a perzone. Serví caudo ‘e fuculare accumpagnanno cu felle ‘e pane casareccio arruscate ô tiesto. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà. Mangia Napoli, bbona salute! Scialàteve e cunzulàteve ‘o vernecale! Raffaele Bracale