VERMICIELLE SPIRITUSE

VERMICIELLE SPIRITUSE Chello ca ce vo’ pe cquatto perzone 400 gramme ‘e vermicielle, 50 gramme ‘e chiapparielle levate ‘e sale, sciacquate e ntretate assieme â scorza ‘e duje limune ‘e Surriento, ‘o zuco passato a cculaturo d’’e duje limune, ‘nu bicchiere d’uoglio ‘aulive dunciglio, ‘nu cucchiarino ‘e porvéra ‘e puparunciello percante, ‘nu tuppeto ‘e prutusino lavato, asciuttato e ntretato, sale duppio ‘na vrancata. comme se fa Mettere ‘ncopp’ô ffuoco ‘a caudara pe ccocere ‘e vermicielle e appena principia a vvollere salarla cu ‘na vrancata ‘e sale duppio e calarve ‘a pasta.Fraditanto a ffuoco allero dinto a ‘na prupurziunata tiella ricà ll’uoglio e agnadirve ‘o zuco passato a cculaturo ’e duje limune ‘nzieme ê chiapparielle levate ‘e sale, sciacquate e ntretate e â scorza d’‘e duje limune ‘e Surriento e lassà callentà; Quanno ‘e vermicielle so’ cuotte vierde vierde, scularle bbuone e revacarle dint’â tiella cu ‘o zuchillo. Ammiscà a mmestiere, agnadí ‘o cucchiarino ‘e porvéra ‘e puparunciello percante, e ‘ncapo a ‘nu paro ‘e minute ‘mpiattà, derramà cu‘nu tuppeto ‘e prutusino lavato, asciuttato e ntretato, e mannà ‘ntavula caude caude. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale