FIORENTINA – NAPOLI (30/10/13) 1 A 2 ‘A VEDETTE ACCUSSÍ

FIORENTINA – NAPOLI (30/10/13) 1 A 2 ‘A VEDETTE ACCUSSÍ E ppure chesta è ffatta guagliú! Pure ‘a trasferta a fFirenze pe sfità ‘a scuatra ‘e Muntella e d’’e Della Valle è gghiuta ‘mpuorto e ajeressera foveno ‘e cuane chille ca facetteno ‘e scarpe ê Della Valle e lassajeno ‘o vveleno ‘mpont’ô musso ‘e chillu franfellicco anarfabbetico ‘e Conti Carlo! Che cunzuluzziona e che suddisfazziona vencere ancòra ‘ntrasferta jucanno nun sulo contr’ê viola, ma pure contro a ll’arbitro (3.5) ‘nu ‘ngigniere troppo guaglione, senza criterio e ssenza sperienzia,[ma nun me meravigliasse ca stesse ggià 'ncopp'a 'o stato paca d'Agnelli], n’arbitro ca ausaje dduje pise e ddoje mesure, ammunenno troppi cuane (azzurri) e llassanno correre cu 'e viole p''e stessi falte (falli)! Ma nun ce putette e fenette ca ô sisco finale ‘o Napule péstuticamente (meritatamente) sturmaje (espugnò) Firenze mantenenno ‘o passo d’’a juventússa, ca pe pparta soja, a llo jummerdum-stadium êva fatto [4-0] unu muorzo d’’o Catania. ‘Nzomma, tutto summato jurnata pusitiva: ajeressera don Rafele (7+) ‘ncarraje tutto cosa sia cu ‘a scuatra misa ‘ncampo ca cu ‘e sustituzzioni e avette raggiona isso! Passammo ê ppaggelle: REINA 6,5 Nun putette fà niente ‘ncopp’ô ricore ‘e Rossi ca nun sulo rallentaje 'a corza, ma addirittura se fermaje, facette ‘na telefonata, se pigliaje cafè e sicaretta e ppo tiraje [tanto è vvero ca ‘o purtiere nuosto prutestaje subbeto, ma chella fetenzia d’arbitro se ne futtette...].A ll’arrancua nchiudette ‘o specchio d’’a porta a bBorja Valero e súbbeto doppo se ripetette fermanno n’ata vota ll'attaccante viola. MAGGIO 6,5 Atalossa diaprésa (prestazione sontuosa) e ll'esterno cuano (azzurro) ‘nfase ‘e cupertura. Cratisto (ottimo) p’’o ‘o juoco acrubbatico e ppe ttanti chiusure. Miezu punto mancante p’essere stato pesce ‘e cannuccia e averese abbuscato ‘o siconno cartellino jalizzo ( giallo) ch’ êsse pututo risultà pesante p’’e suoje; ‘a ‘nu jucatore ‘e ‘sperienzia nun se po’ accettà ‘e nun renderse conto ca a ll’arbitro lle fete ‘o naso e ttène ‘o cartellino jalizzo (giallo) facile specie cu ‘e cuane! FERNANDEZ 6,5 Tenette a mmestiere ‘nu bbrutto accunto (cliente) comme a rRossi mettennolo ‘a musarola cchiú ‘e ‘na vota. ALBIOL 7 Jucatore comme ce ne stanno poche, è riuscito a ppurtà ‘o Napule a ‘nu nivello d’aveta qualità;nun cuncette niente a nnisciuno sia ‘ncopp’ê ppalle avete ca ‘ncopp’a cchelle ‘nterra pure contro avverzarie assaje cchiú ttassuse (veloci); nun se contano ‘e vvote ca alluntanaje ‘o pellicro (la minaccia), nè se facette prijà neppure quanno nn êtt’ ‘a jí p’’o ssuttile ausanno ‘e ttriste ‘e ttriste abbuscannose ‘nu cartellino jalizzo(giallo)... Quanno ce vo’ ce vo! MESTO 7 Granna atalossa (grande prestazione), addirittura surprennente: tenette ‘a pusizziona sacrificannose e lluttanno paro a pparo cu ‘nu figlio ‘e coperativa fenumenale comme a cCuadrado,facennose apprezzà pe cchiú’e ‘nu bbellu disancamiento (disimpegno). BEHRAMI 6,5 Addó nun ‘o semmenajemo, lla ‘o recugliettemo e ‘o vedettemo succorrere cualuncue cumpagno ca stesse ‘ndifficultà a ddritta o a mmancina mentre a ccentro dètte ‘na mana pe stuppà a rRossi. Se fósse mmeretato forze cchiú ‘e sette, ma ll’aggiu levato miezu punto p’essere stato troppo pesce ‘e cannuccia e esserse fatto cògliere a ddà,[’naccasione d’’o ricore assignato â Fiorentina] ‘na vuttatella a nun me ricordo chi ca chello steva aspettanno pe menarse ‘nterra comme si êsse avuto ‘na curtellata dint’ê rine! INLER 6,5 Don Rafele Benitèzzo a ll'urdemu mumento cagnaje idea e nun s’’o sparagnaje doppo tanti fullé cunzecutive. ‘O turco-napulitano rispunnette cu n’atalossa (prestazione) ‘e granne sustanza, mantenennose lucente (lucido) nfi’ ô prazzo (fino alla fine) pe ffà risciatà ‘e suĵe abbuscannose quacche punizzione a ffavore. CALLEJON 7,5 Iuperócia (fantastica) chella ggirata soja ca sbluccaje ‘o fullé [‘ncopp’a ll’ajuda (assist) d’’o Pipita].P’’o riesto se sacrificaje facennose annanze e arreto tutt’’a curzia ‘nfase ‘e cupertura nfi’ ô prazzo (fino alla fine) facenno ascí ‘e suĵe e abbuscannose pure isso quacche punizzione a ffavore. PANDEV 6,5 Accumminciaje cu ggenio e pruntezza facennose valé a mmestiere e dànno ‘mpiccio ‘nfra ê llinie; ll’aprusmeniche (improvvisi) cagne suĵe ‘e direzzione servetteno assaje ê cumpagne, mentre nzallanetteno ‘e difezure viole ca jetteno ô manicomio pe fermarlo. Se ne scennette però passanno ‘o tiempo. (da ll’81° ARMERO 5,5 Pruvaje pe ccomme putette a spezzà ‘e passe a cCuadrado, ma s’’a vedette nera pure pecché nun avette ‘na mana ‘a nisciuno!) MERTENS 7+ Doppo Marziglia e tTorino se cunfermaje uno d’’e cchiú ‘nfromma. Se sbluccaje cu ‘na perna quanno se nfilaje dint’â camma (nell’area) e tuccaje ‘a palla mettennola ê spalle ‘e Neto. P’’o riesto ajutaje assaje ‘a scuatra rijalanno granni ghiucate ‘e cuntrollo ‘e palla e facenno scattà ‘o contropiede. (dô 66° INSIGNE 5,5 Nun lle riuscette ‘e trasí ‘nfullé; currette a vvacante senza dà n’ajuto nè ‘ncopp’â fascia ‘e dritta, né a ddubblà (raddoppiare)’ncopp’a cCuadrado.) HIGUAIN 7 Ca nun stesse ancòra a ll’arriba (al meglio),se sapeva e se vedette dinto a quacche bbrica (duello) o quanno pruvaje a scattà, ma sinamparco (comunque) fove sempe spettaculare pe ccomme se muvette e ccuvernaje ‘a palla e addirittura iuperócio (fantastico) pe ll'ajuda (assist) d'esterno pe Cagliecònno,e ppe comme tuccaje ‘a palla libberanno a mMertens ‘ncopp’ô 2-1. (dô 61° HAMSIK 5 Trasette dint’ô mumento ‘e granna difficultà, ma ggiraje a vvacante aizanno porvere senza riuscí a ddifennere palla o a ffà saglí ‘e suĵe!) ‘E don Rafele e de ll’arbitro aggiu ditto ô pprincipio,pirciò me fermo cca e si dDi’ vo’ ce sentimmo ‘a prossima vota. Staveti be’! R. Bracale Brak