CAGLIARI – NAPOLI (21.12.13) – 1 A 1 ‘A VEDETTE ACCUSSÍ

CAGLIARI – NAPOLI (21.12.13) – 1 A 1 ‘A VEDETTE ACCUSSÍ E dicimmo ca nun ‘ntessecajemo scioccele, capitone, ‘nzalata ‘e rinforzo, ‘ vruoccole bbarese, roccocò, mustacciuole, cassatine e struffole... Dicimmolo, ma nun ‘o facimmo sapé pecché ‘a ‘ncazzatura e ‘a delusione fóveno forte ajeressera a Ccagliare addó m’aspettavo ca ‘e cuane êsseno jute a ppigliarese tre ppunte e addó ‘mmece ne truvajeno sulamente uno deludenno ‘a tribbuna divano e facennome magnà a mmorze ‘e ddete. Certo – mo ve conto – nun fove tutta sfarma (colpa) d’’e guagliune ‘e don Rafele, ma quaccosa ‘e cchiú ‘e chello ca facetteno (‘ntutto quatto tire ‘mporta...) ‘e cuane ll’êssen’ avuto ‘a fà pe mettere sotto ‘a scuatra ‘e Cellino, ‘na scuatra ca [a ‘nu certo punto] se piazzaje ‘nnunnece arret’â linia d’’a palla.., ‘Mmece nun ‘o facetteno... po ce se mettette pure ll’arbitro Valeri ca annullaje ‘na granna rredda ‘a quaranta metre ‘e Caglièconno, e ce ll’annullaje pe ‘nn’ urzo’e cóse (fuorigioco) ‘e centimetre d’Albiòllo o ‘e Pandèvvo ca vedetteno sulo isso e ‘o signalinie e nnaturalmente tutte chille ca vonno ‘o mmale d’’o Napule e nun s’addunajeno ca Astori teneva ‘nghiuoco a ttutte quante e ca Pandèvvo ‘o pallone nun ‘o tuccaje proprio comme ‘mmece dicette chillu cecagnuolo ‘e Valeri. E nun te vuó ‘ncazzà? Nun te vuó piglià ‘na scigna e magnarte ‘o fécato? T’hê ‘a ‘ncazzà pe fforza pure si stammo a Nnatale e ttutte avimmo ‘a essere cchiú bbuone! Ma nun pozz’essere bbuono penzanno ca ‘sti ccose nun succedono a ll’ati scuatre e certamente nun succedono â rubbentússa ca lle veneno cunvalidate rredde signate ‘nn’ urzo’e cóse ‘e metre e nno ‘e centimetre!Tutto chesto po senza parlà ‘e chello ca avesse fatto a mMaggio si me fósse capitato mp’’e mmane ô nono d’’o primmo ajone quanno isso facette ‘na ciucciaria esaggerata nun cuntrullanno, pur’essenno ‘nvantaggio, ‘na palla còmmeta e dànno via libbera a Astori ca cruzzanno arreto dètte ‘accasione a nNené ‘e casticà cu ‘na ‘mbomma viulenta, pure si centrale, a rReina. E menu male ca Maggio nun me capitaje p’’e mmane si no mo stessemo tutt’ ‘e dduje a pPuceriale: i’ ‘ngalera e isso ô campusanto e ce fóssemo ‘ntussecate Natale e ‘o riesto d’’e ffeste e sperammo ca don Rafele nun m’’o fa vedé cchiú pure si, aspettanno a mMesto, à dda fà jucà ‘nu primmavera! Passammo ê ppaggelle: REINA 6- Nun tenette sfarma ‘ncopp’â rredda cagliarese ca fove signata sí cu ‘nu tiro centrale, ma pure assaje forte e stricciato (ravvicinato).Ascette pe prubbleme muscolare e cchesta fove ‘a sfarma soja:esserse ditto dispunibbile quanno ancòra nun êva risuluto (risolto) tutto ‘o ‘mpiccio suĵo (dô 47° RAFAEL 6 Quacche bbona surtita (uscita), ma nun fove chiammato a ffà ‘e straurdinarie.) MAGGIO 3 E ll’aggiu trattato! Nun è mmaje stato veramente difenzore, ma mo è pproprio arrivato ô capolinea e nnun se po’ cchiú gguardà; ajeressera praticamente rijalaje ‘o vantaggio ô Cagliari comme v’aggiu cuntato; p’’o riesto aizaje pórvera ‘ncopp’â curzia soja senza maje ‘ncarrà ‘nu cruzzo! FERNANDEZ 6,5 Atalossa (prestazione) assulutamente pusitiva anticipanno sempe pulito cchiú ‘e ‘na vota a n’accunto (cliente) difficile comme a sSau. ALBIOL 6 Quacche sfregazzo (sbavatura)’nfase ‘e plantamiento (impostazione) ma bbravo a cumannà ‘a difesa addó cuncedette poco o niente a sSau e a ll’ati cagliarise. REVEILLERE 6+ Atalossa (prestazione) pusitiva d’’o francese; fisicamente ‘ncriscenza (in crescita) a ppietto a ll’urdimi fullé fatte, dê pparte soje nun cuncedette quase niente a nnisciuno. DZEMAILI 6- Atalossa (prestazione) quase suddisfacente d’’o svizzero ca nfi’ ô prazzo (fino alla fine) raccurdaje difesa e attacco pruvanno a ttené aunita ‘a scuatra, ma mancaje [pe bbia ca nun c’è ttagliato ma è nicessario ca se ‘mparasse...] dint’â custruzziona d’’o juoco a ddifesa avverzaria piazzata. BEHRAMI 6- Tanta cegna (grinta); vincette tanti bbriche (tanti duelli), ma a ppietto ô ssolito, forze pure pe sfarma (colpa) d’’o tturreno sbagliaje cchiú ‘e ‘nu bbassurero (suggerimento). CALLEJÓN 6,5 Tanta bbona vuluntà e ttanta famurgía (applicazione) soprattutto all’arrancua (ripresa) quanno signaje, comme v’aggiu ditto ‘na granna rredda ca êsse pututo valé ‘e tre ppunte , annullata però a chella meza cazetta ‘e Valeri. PANDEV 6 Avette ll’acchía (il merito l) ‘e se prucurà ‘o ricore ca valette ‘o pareggio. Pure senza fà granni nummere jucaje sempe a sservizzio d’’a scuatra. (da ll’ 81° ZAPATA 6 Nun avette nisciuna bbona accasione, ma se dètte da fà guvernanno ‘o pallone dint’ô stritto e cupulianno (dialogando) cu quacche cumpagno.) INSIGNE 6- Atalossa (prestazione) quase suddisfacente ‘e Lorenzigno, ma ‘ncampiunato cuntinua a nun truvà ‘a rredda. Ô ssolito tanti ghiucate partenno ‘a ll’esterno comme ‘nnaccasione d’’o ricore quanno Pandèvvo fove pigliato p’’o cuollo da Astori..., e cchiú attenzione d’’o ssolito ‘nfase ‘e cupertura. (dô 70° MERTENS 6- Trasette súbbeto e bbuono ‘nfullé appressuranno (spingendo) ‘ncopp’â curzia ‘e mancina, ma da bbona pusizziona mannaje fora ‘o tiro d’’a pussibbile nichessa (vittoria). E che ghiella!) HIGUAIN 6,5 Trasfurmaje cu ccarma, dicisione e ppricisione ‘o ricore d’’o pareggio. Fove ‘o riggista uffenzivo d’’a scuatra: cu pochi spazzie a dispusizzione fove ‘a qualità soja a ffà ‘a differenza! BENITEZ 5,5 Me dispiace pe don Rafele, ma chella d’ajere fove n’accasiona sciupata;’a scuatra êsse avuto ‘a tentà ‘e cchiú e forze Mertens êsse avut’ ‘a trasí primma. Tenenno presente ca ogge ‘a juve joca a bBergamo cu ll’Atalanta (ch’è ‘na scuatra travante (satellite) d’’a juve e ppe cuntratto à dda perdere) s’êsse avuto ‘a tentà ‘e cchiú pe nun perdere atu turrenno, tenenno pure presente ‘mpruspettiva ‘o scontro diretto tra juve e ‘a Roma a ll’anno nuovo!Speriamo bene, ma ‘o fatto è ‘nzipeto; cca s’à dda vedé che s’à dda fà: a pparte ca quaccuno (Maggio) è arrivato e s’à dda sustituí pure cu ‘nu primmavera, quaccuno (Insigne) s’à dda scetà e quacche ato (Marekiaro) à dda turnà; è vivo, è mmuorto? ‘O vvo’ fà o s’è sfastediato?Soprattutto po s’à dda risolvere ‘nu prubblema ‘mpurtante: ‘a mancanza d’‘o centrocampista capace ‘e fà ‘a differenza dint’ê giometrie pure quanno ll'avverzario se difenne cu tutte ll’ effettivi arreto ô pallone. arbitro VALERI 3 Nun me piacette, nè isso nè ‘e cullabburatore suĵe! Ma comme se fa a annullà ‘na rredda bbella comme a cchella ‘e Cagliècònno?E pe cche ccosa ? Pe ‘nn’urzo’ecose ‘e quacche centimetro ca nun fove chiaro si ce steva o no e cquase certamente nun ce steva, comme v’aggiu ggià ditto. Pe nun parlà d’ati granni fetenzie fatte ‘a ‘stu libbero prufessiunista (‘e che nun se sape...) rumano ca siscaje sempe, pe partito pigliato, contro ô Napule caputianno ‘e ffalte (i falli) e permettenno ê delinquente cagliarise è chiavà mazzate ‘a cecate senza vedé e ssenza sentí. Ma ‘a sfarma nun fove ‘a soja; fove ‘e chi mannaje a ‘nu rumano a arbitrà ‘na scuatra ca sta ‘nzeguenno ‘a Roma! E fermammoce cca. Ve faccio tante avucurie a vvuje e a ttutte ‘e vuoste p’ ‘e ffeste ca stanno venenno; ca ‘o Bammeniello ce benedicesse a ttutte quante a cchi ce vo’ bbene e a cchi nun ce ne vo’ speranno ca cagnasse idea e vve dongo appuntamento, si dDi vo’, a ll’anno nuovo cu ‘a speranza ca turnasse Mesto ô posto ‘e Maggio ca - ll’aggiu ditto - oramaje nun ce sta niente ‘a fà: è arrivato ô capolinea, anze ô deposito ‘e Marianella!!!! Staveti bbe’! R.Bracale Brak