NAPOLI – SAMPDORIA 6/01/14 (2 A 0) ‘A VEDETTE ACCUSSÍ

NAPOLI – SAMPDORIA 6/01/14 (2 A 0) ‘A VEDETTE ACCUSSÍ Ajere, pe ggrazzia d’’o Cielo, ‘a Pifania ce purtaje bbuono guagliú cu ttutto ca ‘ntribbuna vicino a De Chiacchiaroniis nce steva assettato chillu cestariello ‘e Giggino uocchie-stuorte ca porta jella luntano ‘nu miglio! Ma ajere nun ce putette e ‘o Napule risulvette ‘a pratteca sampedoria cu ddoje rredde d’ ‘o zútico (folletto)belga Mertens ca apprimma sfruttaje ‘nu pasiglio (suggerimento)arretrato d’’o Pipita sbluccanno finalmente ‘o fullé e ppo nchiudenno ‘a facenna cu n’azzeccato e priciso tiro ‘e punizziona. E accussí ‘o Napule rispunnette ê chiammate d’’a juve e d’’a Fiorentina, riducenno a ddoje lunghezze ‘a distanza dâ scuatra ‘e Garcia turnata malamente sciaccata da Turino (sponna janca e nnera).Certo êttemo aspettà ll’arrancua(la ripresa) pe festeggià, visto ca pe tutto ‘o primmo ajone ‘e cuane nun riuscetteno a sfruttà ‘e ttanti accasione avute, ma tutto summato, putimmo essere cuntente d’avé accumminciato cu pede justo ‘stu duimilaquattuordice e ca nun c’è rummaso ‘ncopp’ô vernecale(stomaco) tutt’’o mmagnà ‘e Natale e cchello ‘e ll’urdemo ‘e ll’anno! Passammo ê ppaggelle: RAFAEL 6,5 - Bravo e ffurtunato, ajere fove assaje priciso dinto a ll’asciute vasce e dint’ê chiusure ô lemmeto d’’a camma. Fullé doppo fullé ‘o guaglione sta cunquistanno sempe cchiú cunfianza (fiducia) dimustranno d’essere jucatore ‘e qualità! MAGGIO 6- Cu ttanta bbona vuluntà tentaje ‘e farese valé pure ‘ncupertura, cosa ca nun è mestiere suojo... e urgugliosamente tenette ‘a pusizziona nsi’ô prazzo (fino alla fine) alluntananno ògne minaccia. FERNANDEZ 6 ‘A fora ‘e ‘nu sfregazzo (sbavatura) durante ô primmo ajone, facette n’atalossa cchiú ca pusitiva. ALBIOL 6,5 ‘O sistimato ce mettette sempe ‘na toppa! Pure quanno Fernandèzzo ‘o lassaje sulo, nun arresecaje niente alluntananno ‘a minaccia cu dicisione e senza fà ricame! REVEILLERE 6 Facette chello ch’êva ‘a fà: ‘o difenzore senza sganciarse quase maje e rummanenno vascio a ccuvernà ‘a camma soja pe mettere ‘a musarola a n’accunto (cliente) scommeto comme a gGabbiadini. (dô 48° ARMERO 5,5 À dda dicere grazzie a bBanti ca lle perdunaje ‘nu fullone (fallo da rigore) dinto â camma luvarda.’Nu poco meglio ‘nfase uffenziva).Ma nun me cunvince! INLER 5 Jurnata no d’’o turco-napulitano ca perdette troppi palunne scatenanno ‘ocontropiete sampeduriano.’Nu tentativo ‘a fora e tanta cunfusione ‘nfase ‘e plantamiento (impostazione). Nun capisco ‘a che dipenne ca ‘stu jucatore, pavato caro, nun è mmaje riuscito a ddimustrà tutto ‘o valore suĵo nè cu Mazzarri, né cu Benitèzzo.Nun vulesse jastemmà, ma crero ca s’êss’’a sustituirlo o cagnarle pusizziona! DZEMAILI 5,5 Pruvaje a ttené allerta ‘o centrocampo e a cullecà difesa e attacco, ma ce riuscette poco: tanta corza e ttanta cegna (grinta) ma pure troppi jerre (errori). MERTENS 8 Atalossa sensazziunale d’’o zútico (folletto)belga ca ggià dê primme minute risultaje ‘mpressiunante pe comme currette e ppe comme se muvette crianno cuntinuamente superiorità nummereca e arrivanno ô tiro. ‘Na pennellata d’artista ‘a rredda ca sbluccaje ‘o fullé comme azzeccato e ppriciso fove ‘o tiro ‘e punizziona ca nchiudette ‘a pratteca! CALLEJON 6,5 Chisto è gghiucatore! Currette senza stancarese maje e dint’ê mumente ‘e difficultà, quanno ‘o Napule faticaje ‘nfase ‘e plantamiento(impostazione), isso s’avasciaje pe ddà cchiú cqualità â manovra; se facette vedé pure sotto porta, ma DaCosta lle dicette ‘e no. (da ll’82° RADOSEVIC sv) INSIGNE 4,5 Atalossa sprecata ‘a Lorenzigno: tuccaje tanti pallune e ccurrette assaje, ma fove zuco senza cunnimma;faticaje a zzumpà ll’ommo, perdette cchiú ‘e ‘na palla e sprecaje malamente ddoje bboni accasione. Don Rafele ll’à dda piglià p’’e rrecchie e à dda faticà pe ricuperarlo psicologicamente. HIGUAIN 7 Da Costa lle fermaje ‘nu tiro destinato ‘nfunn’â rezza e n’ati ddoje vote nun fove furtunato.Fove però isso ca ‘nventaje ‘a jucata ca prubbabilmente decidette ‘o fullé cu ‘nu pasiglio addietrato ca Mertens mettette a ffrutto.N’ata bbella sventagliata ‘ncopp’â dritta nun fove sfruttata ‘a Cagliecònno (dô 76° ZAPATA 6 Guvernaje bbuono quase tutte ‘e pallune avute dimustranno ‘e tené tecnica e ‘nu fisico ‘e luttatore.) BENITEZ 7 Custretto a ffà a mmeno ‘e culonne comme a bBehrami,comme a mMarekiaro, a zZuniga e a rReina,’o Napule facette ‘na bbona atalossa pure si nun riuscette a sbluccà ‘o fullé durante ô primmo ajone e êtte ‘a aspettà ll’arranca (la ripresa) pe ttirà ‘o capo ‘nterra. Decidette ‘e partí cu Mertens fantasista ô posto ‘e Pandèvvo e avette raggiona pecché ‘o guaglione belga lle levaje ‘e ccastagne dô ffuoco risulvenno ‘o fullé. Andivinaje pure a ccuncedere quacche minute a rRadoseviccio e a zZapata e ffove andivinata ll’idea ‘e sfruttà Armero ô posto d’’o francese p’appressurà (per spingere) ‘e cchiú ‘ncopp’â curzia ‘e mancina; ancòra poco suddisfacente ‘o centrocampo, ma a ‘stu punto s’à dda aspettà ‘e ricuperà a bBehrami e ‘o rinforzo dô mercato ‘e gennajo. arbitro BANTI 5 Vecchia cunuscenza e antica fetenzia, comme ô 99,9 pe cciento ‘e ll’arbitre taliane, ggià ati vvote ‘ncruciata dô Napule; ajere però nun ce facette gruosse tuorte e anze (forze pe farse perdunà ‘o ppassato) ce favurette nun siscanno ‘nu ricore contro Armero ca smarrunaje malamente.Nuje però favure inutile nun ne vulimmo! E‘nchiudimmola cca ringrazzianno ‘sti guagliune p’ avé vinciuto n’atu fullé ‘mpurtante! Forza Napule, Ciuccio fa’ tu e ghienno a bBergamo ,facce sunnà! Ce sentimmo. R. Bracale Brak