PURMIENTO COMME ‘O FACCI’ I’

PURMIENTO COMME ‘O FACCI’ I’ (stufato alla mia maniera) Chello ca serve pe seje perzone ‘Nu kilò e duiciento ‘e curazza d’annecchia a piezze ‘e cm. cinche pe quatto, pe ttre, ‘na cepolla ‘e Muntoro ammunnata e ntretata, ‘nu spiculo d’aglio ammunnato e ntretato, ‘na pastenaca grattata, lavata asciuttata e fatta a rundelle, ‘na llomma d’accio grattata, lavata asciuttata e fatta a pezzulle ‘e duje cm. ‘e squina, ‘na buatta ‘e ‘nu kilò (piso lisso) ‘e pummarole pelate, 800 gramme ‘e patane vecchie ammunnate, lavate e ffatte a felloce ‘e miezu centimetro ‘e spessore, ‘nu bicchiere d’uoglio auliva dunciglio, ‘na ciotola ‘e broro vegetale fatto cu ‘na farinula. ‘na presa abbunnante ‘e sale duppio, pepe niro mmacenato a ffrisco q.n.s., ‘nu tuppeto ‘e prutusino lavato, asciuttato e ntretato finu fino. Comme se fa Ricà tutto ll’uoglio dinto a ‘na prupurziunata cazzarola e mettere a zuffrijere a ffuoco allero ‘o ttrigliato ‘e cepolla, aglio, pastenaca e accio; appena è ppronto agnadí ‘e piezze ‘e carne e lassà suassà pe cinche minute ammiscanno spisso;a ‘stu punto agnadí ‘e pummarole, cummiglià ‘a cazzarola, avascià ‘o ffuoco e lassà cocere pe n’ora e a ll’urdemo agnadí ‘e ppatane, ricà ‘a ciotola ‘e broro, accuncià ‘e sale e ppepe e purtà a cuttura pe n’ata mez’ora. A ffuoco stutato derrammà cu ‘o tuppeto ‘e prutusino lavato, asciuttato e ntretato finu fino. Ammiscà, purziunà e mannà ‘ntavula caudo ‘e fuculare chistu friante purmiento comme ‘o facci’ i’. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà. Mangia Napoli, bbona salute! Scialàteve e cunzulàteve ‘o vernecale! Raffaele Bracale .