NAPOLI - SWANSEA (27.02.14 E.L.) 3 A 1 ‘A VEDETTE ACCUSSí

NAPOLI - SWANSEA (27.02.14 E.L.) 3 A 1 ‘A VEDETTE ACCUSSí Tutto a pposto, guagliú! Dicimmo tutto a pposto, ma mo ve dico. Ajere ‘mmerz’ê ssette d’’a sera ô san Paolo se jucaje ‘o fullé ‘e ritorno d’’e sidicesime d’E.L. e i cuane, chiammate a vvencere, doppo d’’o bbruttu pareggio casalinco ‘ncampiunato cu ‘o gGenoa, facetteno chello ca s’êv’’a fà. ‘Nzomma se vincette e sse passaje ‘o turno, ma quanta fatica e cquanta paura nsi’ a ll’urdemo, nsi’ addirittura ô 93° quanno finalmente se sciugliette ‘a ‘riola e Inlèrro mettette dinto ‘o pallone d’’o tre a uno nchiudenno ‘o fullé e assicurannoce ‘o passaggio a ll’ottave. Se vincette ancòra cu cchella maglia uovo-sbattuto ‘ncuollo e ccu ddint’ê rrecchie ‘a voce d’‘o Pampa Sosa ca menava ‘a favetta p’’e microfone ‘e SKY. Se vincette, sí ma che parpetazziona! Tanta ca a ‘nu certo punto, me mettette paura ca fósse juto a fferní comme contr’ô ggenoa e penzaje: chesta sta addivintanno ccanzona! Pe ffurtuna me sbagliaje e ‘o Napule riuscette a vvení a ccapo ‘e ‘na sfita scamosa, ‘e ‘nu fullé tatticamente cumplesso e ppure si s’à dda ancòra migliurà faticanno ‘e cchiú fisicamente e tatticamente tutto summato putimmo essere cuntente’e comme sta jenno ‘sta tempurata (stagione). Passammo ê ppaggelle. REINA 9 Nun putette farce niente ‘ncopp’â rredda ‘e De Guzmànno ca tiraje troppo ‘a vicino, ma p’’o riesto putimmo dicere ca sott’â cualificazziona ce mettette ‘a firma soja cu ‘na deviazziona miraculosa a dduje minute dô prazzo (dalla fine), comme pure facette dduje capulavore durante ô primma ajone quanno ascette a mmestiere, lliggenno bbuono a ppruposito ‘o tiempo nicessario. MAGGIO 5 Pe Tutto ‘o fullé se mantenette addereto â linia ‘e mità ccampo, ma cu ttutto chesto nun fove crestiano ‘e cuvernà bbuono ‘a camma soja e sufferette a rRoutledge e a cchiunque se truvasse a ppassà pe cchelli pparte comme dint’ âccasione d’’a rredda quanno addirittura s’addurmette cu ‘a zizza ‘mmocca e nun nchiudette ‘ncuollo a dDe Guzmànno. HENRIQUE 6- Durante ô primmo ajone, troppo spisso passaje palla arreto e ffaticaje a mmettere ‘a musarola a bBony, n’attaccante rugnuso e ‘mprevedibbile ca ‘nnaccasione d’’a rredda scanzaje ‘o brasiliano e servette cu ‘na magaria a dDe Guzmànno. ‘Ncumpenso ‘nfase ‘e plantamiento (di impostazione) se pigliaje ‘e rresponzabbilità ssoje quanno doppo ll’uno a uno ‘o Swansea se nchiudette. ALBIOL 7 Miezu punto ‘e cchiú pe ccomme salvaje ‘ncopp’â linia ‘na rredda ggià fatta; p’’o riesto ‘a ‘ntesa cu ‘o cumpagno ‘e sezziona nun fove acàbata (perfetta) cu quacche malu sfregazzo (sbavatura) ma cu ttutto chesto guaje nun ne facette. GHOULAM 5,5 Miezu punto mancante p’ ‘e ddoje timmuríe (punizioni) cuncesse ô finale, ch’êsse pututo sparagnarse cu ll’avverzario vutato ‘e spalle, timmurríe ca rijalajeno ddoje accasione ô Swansea. ‘Nfase d'asciuta ‘a qualità d’’o pere sujo fove ‘mpurtante. INLER 6 Dint’ê ddoje fase ‘e juoco ce mettette ‘o core p’essere a ll’ardezza nsi’ ô prazzo (alla fine) e tenette ‘a forza ‘e nun mancà a ll’appuntamento cu ‘o pallone ô 93°nchiudenno ‘a pratica. BEHRAMI 5,5 Se facette piglià ‘a quacche attacco ‘e blasite e nun furnette ‘a solita atalossa (prestazione) e ‘o Napule sufferette p’’e vvie centrale. INSIGNE 7 ‘Na vera perna ‘a rredda ca purtaje ‘o Napule ‘nvantaggio.Fove ‘o meglio nsi’ ô mumento d’’a sustituzziona, crianno spisso superiorità nummerica e dimustrannose ‘o cchiú ddiciso quanno puntaje ‘a porta. (dô 68° MERTENS 7+ Trasette e ffove súbbeto anàtropo (devastante). ‘A rredda d’’o Pipita[76°] nascette da ‘na percussiona soja dâ curzia ‘e dritta.’A tràsera d’’o Swansea, ca primma ch’isso trasesse parette ‘nvalicabbile, s’’a vedette sporca quanno l’arillo scennette ‘ncampo.) PANDEV 5,5 Accumminciaje bbuono cupulianno spisso dint’ô stritto, ma po venette meno e se perdette.Cunfezzionaje ‘na bbella ajuda (assist) pe Higuaínno ca però mannaje aveto. (dô 59° HAMSIK 6,5 – Nun tenenno a gGiorgigno, doppo ll'uno a uno, quanno ‘o Swansea aizaje ‘nu muro difenzivo don Rafele s’êtt’’a attaccà â qualità ‘e Marekiaro pe ccercà d’’o sfravercà e ‘o guaglione cu ccuraggio e cqualità se menaje dinto, truvanno spisso ‘o chesema (il varco)adatto,cupuliaje bbuono cu Mertenso e servette a Inlèrro ‘o pallone d’’o tre a uno.) CALLEJÒN 6 Tanta corza e tantu muvimento, ma cu ‘o Swansea ca ghiucaje a ttase (ritmo) sustenuto nun riuscette a ffà ‘a differenza. Quanno truvaje‘o chesema (il varco) nun truvaje adeguata assistenza dê cumpagne (dall'84' BRITOS sv) HIGUAIN 6,5 Miezu voto mancanto p’esserse magnato ddoje rredde durante ô primmo ajone. N’applavuso p’esserse truvato ô pizzo justo e ô mumento justo pe mmettere ‘mporta ‘a palla d’’o doje a uno, p’’a prusiatezza (generosità) dimustrata nsi’ ô prazzo, p’’a fatica sporca fatta e p’’o spirito ‘e sacrifiggio appalesato. BENITEZ 7 Quanno ‘o Napule fa fatica a custruí comme succedette ajere doppo ll 'uno a uno, ca ‘o Swansea nchiudeva tutt’’e cheseme (varchi), po’ ffà discutere ‘o fatto d’avé sciveto ‘e nun mettere a gGiorgigno dint’â lista d’’a salute,mantenenno cchiú ppussibbilità e ccupertura ‘ndifesa; ‘o Napule accumminciaje bbuono, ma sprecaje assaje sotto porta e ‘ntribbuna divano accumminciajemo a mmusechià cu ‘o fantasema d’’o fullé cu ‘o gGenoa annante a ll’uocchie, ma po don Rafele riuscette a ccagnà fullé mettenno dinto a mMertenso e a mMarekiaro arresecanno coccosa ‘ndifesa ô prazzo ‘e ‘nu fullé emuzziunante; ‘a nichessa però era ‘mpurtante e ffunnamentale nun sulo pe ccuntinuà ‘o cammino airopeo ma pure pe mmigliurà ‘o ranking ‘nvista ‘e ll'eventuale preliminare ‘e Ciampionsa ca ‘o Napule à dda affruntà comme testa di serie. P’’o mumento cu ll’E.L. ce aspetta ‘o Porto. ‘Ncruciammo ‘e ddete e ffacimmo corna! FORZA NAPOLI CIUCCIO FA’ TU! Arbitro: HATEGAN 5,5 Nun se facette piglià p’’o prozo da ‘o gallese ca se tuffaje dint’â camma ‘e ricore d’’e cuane, e cchesto è ppusitivo, ma ll’êss’avut’’a ammuní e nnun ‘o ffacette e cchesto nun sta! E cu cchesto ve saluto e si dDi’ vo’ ce sentimmo ‘a prossima vota ciové doppo d’’o fullé ‘e campiunato contro ô Livorno. Staveti bbe’ R.Bracale Brak