SWANSEA – NAPOLI (20.02.14 E.L.) ‘A VEDETTE ACCUSS

SWANSEA – NAPOLI (20.02.14 E.L.) ‘A VEDETTE ACCUSSí Êsse vuluto cuntarve bbelli ccose guagliú e mmece pozzo sulo parlarve ‘e ‘na chiena e ‘na vacante p’’o Napule ‘mpignato ajeressera ‘ncopp’ô campo e’’nu paisiello gallese p’’a sfita d’andata d’’e sedicesime d’E.L.:’a chiena pecché purtaje ‘a pella â casa e ‘a vacante pecché ‘na fetenzia ‘e rredda s’êsse avut’’a signà pe stà cchiú tranquille ‘nfra quinnece juorno ô san Paolo addó ‘e ‘na manera o n’ ata s’à dda vencere pe passà ‘o turno e nun è ‘na cosa ‘e pochi mumente pecché ‘o Swansea è scuatra tosta e scamosa e s’ à dda piglià cu ‘e mmolle!Chillo d’ajeressera nun fove ‘nu bbellu Napule anze nun fove isso, ma tutto summato ‘o risultato ‘e zzero a zzero po’ essere cunziderato pusitivo soprattutto p’’o fatto d’avé salvato ‘a porta; a ‘stu punto i’ dico ca ‘a cualificazziona è certamente pussibbile si ô san Paolo ‘o Napule torna a ffà ‘o Napule e si ‘o Swansea ce fa fà ‘o spezziale senza fà ‘o fenomeno. Chesto sperammo. Passammo ê ppaggelle. RAFAEL 8 Retumbante(Strepitoso). Cinche parate funnamentale. Se cunfermaje purtiere ‘e sustanza: senza d’isso p’’o Napule ô primmo ajone fósse stato notte. Strignette ‘e diente nsi’ ô quarantacinchesimo, ma po avette ascí pe ‘nu smaleditto ‘mpiccio a ‘nu denucchio. (Dô 46° REINA 6,5 Meno dicisivo d’’o culleca, ma sempe assaje pusitivo; sicuro quanno ascette e cquanno fermaje cu sicurtà a ‘nu paro ‘e gallese: Williamso e Routledge). MAGGIO 5 Me pare ca ll’aggiu sempe ditto ca oramaje è arrivato ô desserto e nun è cchiú ‘nu treno, ma ‘nu papunciello e si – comme succedette ajere - trova a uno comme Routledge, ca corre ddoje vote a isso è chiaro ca è ffurtuna si nun succede ‘o llutto! HENRIQUE 6 ‘O meglio a lla ddereto.Tuosto e addirittura forze troppo sgrimmo (ruvido) , ma fove chello ca ce vuleva; jucatore ‘e sustanza, perzunalità e ‘sperienzia! BRITOS 5- Ajere se vedette pecché nurmalmente don Rafele ‘o lassa fora e preferisce jucà cu Fernandèzzo. Ajere ‘o lungagnone s’arrangiaje cu ‘o mestiere, ma me facette vení ‘o friddo ‘ncuollo cchiú ‘e ‘na vota soprattutto quanno trasette ‘e sciuliata ‘ncuollo a cchi lle capitaje a ttiro,quanno sbagliaje ‘e diacunale jenno ‘ndifficultà cu Bony e quanno se facette mettere sotto dint’ô juoco aveto ch’êsse ‘a essere ‘o fforte suĵo. REVEILLERE 4 E che ne parlammo a ffà? ‘Nu chianto. Sempe dint’ê chiavette,nun fove maje a ll’aldezza; sempe braduso (lento) e ‘mpacciato, nun fove bbuono nè ppe frijere, nè p’arrostere; Dyerro ‘o pigliaje ‘ngiro e isso se facette piglià! INLER 5,5 Orfano ‘e Giorgigno, sufferette e luttaje pruvanno a ddà ‘o ritmo, ma ce riuscette poco o niente,e nun me sento ‘e darle ‘e cchiú pure si ce mettette bbona vuluntà. DZEMAILI 4,5 Meno luttatore d’’o cumpagno ‘e sezziona, se chiammaje fora ‘nfase ‘e plantamiento (impostazione), nun dètte maje ‘na mana a ll’attaccante e se facette ‘nfilà cchiú ‘e ‘na vota ‘nfase ‘e trancara (contenimento). INSIGNE 4,5 Don Rafele ll’êss’’a tirà ‘e rrecchie pe ricurdarle ca si joca accussí, ‘e mundiale s’’e ppo’ scurdà.’Nnairopa nun se po’ gghiucà accussí senza luttà o sacrificarse, annascunnenose senza tirà fora maje n’idea, ‘nu spunto, ‘na cosa nova; è overo ca avett’’a dà ‘na mana a Reveillere, ma êss’avuto fà ‘e cchiú . (Dô 75° MERTENS s.v.) HAMSIK 5,5 Partette bbunariello e gghiucaje ‘nu primmo ajone cu bbona vuluntà, ma po a ll’arrancua nun se vedette cchiú e nun ncarraje cchiú ‘na jucata; forze steva stanco. CALLEJÒN 6 Risultaje ‘o meglio d’’o Napule pure senza fà cape d’angelo. Jette vicino â signatura ‘nu paro ‘e vote; se sacrificaje a ddà ‘na mana a mMaggio, ma dètte pocu sustegno ô Pipita ca se ne pigliaje. HIGUAIN 5,5 Jucaje cu ‘o freno a mmano tirato; prubbabbilmente ammaccato dâ bbotta ca ll’êva dato culo’echiummo dummeneca passata, risultaje poco periculuso e ppoco tassuso (veloce).P’’o ritorno ce serve n’atu Pipita, no chillo d’ajeressera! (Da ll’83° PANDEV s.v.) ALL. BENITEZ 6- Purtaje bâ casa ‘nu zzero a zzero ca è mmeno ‘e quanto ce aspettavemo.Dicimmo ca forze ritardaje troppo ‘e cagne e ca forze êsse avuto alluccà cchiú assaje cu quaccuno ; pe ccereto ô san Paolo serve n’atu Napule soprattutto a nivello fisico. ARBITRO: Bebek (Croazia)6 Niente ‘a dicere. E cu cchesto ve saluto e si dDi’ vo’ ce sentimmo ‘a prossima vota ciové doppo d’’o fullé ‘e campiunato contro ô Crifone. Staveti bbe’ R.Bracale Brak