LIVORNO – NAPOLI (2/3/14) 1 A 1 ‘A VEDETTE ACCUSSÍ

LIVORNO – NAPOLI (2/3/14) 1 A 1 ‘A VEDETTE ACCUSSÍ Oramaje s’è ccapito guagliù! È ‘na jastemma menata: ‘o Napule nun riesce cchiú a vvencere cu ‘e piccerelle e manco ajere, a ll’ora streveza d’’e ppastarelle, ciovè ‘mmerz’ê sseje e mmeze,a lLivorno ‘o Napule nun ce riuscette e s’êtt’ âccuntentà ‘e ‘nu punticciullo ca nun levaje sete e servette sulamente a mmantenerce a sseje punte dâ Roma, pe pparta soja fermata ‘ncopp’ô zzero a zzero dâ scuatra d’’o chiagnazzaro;nun ce simmo! Nun è accussí ca se po’ arrivà ô siconno posto! Pe ffarlo s’ à dda vencere cu ‘e ppiccerelle cu ‘e ggrosse e cu ‘e mmezzane, cosa ca ‘o Napule pare ca nun è cchiú ccrestiano ‘e fà. Cumminfatte ajere ‘o Napule, passato ‘nvantaggio cu ‘nu ricore sacrusanto ca s’abbuscaje Pandèvvo e ca Mertenso mettette dinto cu ssicurtà(sicurezza) e pricisiona, spiazzanno ‘o purtiere, nun riuscette a ffà ‘a siconna rredda; pe gghionta ‘e ruotolo, doppo sette minute rijalaje ‘o pareggio ô Livorno cu n’utubbutto (autogol) ‘e Reina, nchiudette ‘o primmo ajone ‘ncopp’a ll’uno a uno e nnun avastaje tutta n’arrancua (ripresa) pe mmettere dinto ‘a siconna palla. C’è ppoco ‘a fa è ghiastemma menata ca oramaje ce à cuoveto e c’è ppoco ‘a fà! Nun servette nemmeno lervarse ‘a cuollo che maglia uovo-sbattuto e tturnà â maglia luvarda (azzurra); nun servette pure pecché ‘a vera divisa d’’o Napule nun à dda tené chelli ghiettatorie vrachesse luvarde, ma ‘e cazuncielle janche.’Nzomma cu ll’atalossa (prestazione) d’ajere ‘o Napule facette ‘nu buco dint’a ll’acqua jettanno punte e mmeliune…, sí meliune pecché ‘a qualificazione diretta ‘nCiampionsa ce assicurasse ‘nu cratisto (ottimo) sicuro guaragno dint’â tempurata (stagione) 2014-2015 mentre, classificannose ô terzo posto, ‘o Napule avesse ‘a jucà ‘e preliminare a mmità d’ austo,cu gghiucature spumpate dê mundiale e dô periodo ‘e vacanzie e ttutto chesto fósse ‘na cumplicazziona ‘a scanzà…, ma ‘e chisti passe , nun ce illudimmo..., ‘a veco difficile riuscí a surpassà ‘a Roma! Passammo ê ppaggelle: REINA 6 Rijalaje ‘o pareggio cu ‘nu sfurtunato utubbutto ‘e panza, ‘ncopp’ô primmo vero tentativo d’’o Livorno, pure pecché Britòsso lle franaje ‘ncuollo e ‘o ‘mpicciaje, ‘mmece d’ajutarlo. ‘Ncumpenso a ll’arrancua fermaje bbuono ‘nu tentativo ‘e Belfodíllo e n’ato ‘e Pauligno. MAGGIO 5 Penzaje sulo a ddifennere e nun se vedette maje annante; sufferette assaje primma a pPauligno e ppo pure a Emeghara.Ma ‘a frittata grossa ‘a facette dànno spazzio ‘suvrappusizziona a mMesbah ‘nnaccasione ‘e ll’azziona d’’a rredda livurnese. FERNANDEZ 6 Quacche sfregazzo (sbavatura) a ll’arrancua, ma senza cusecuenzie; ‘ncumpenso ‘nu bbellu primmo ajone quanno se facette vedé pure ‘nfase ‘e plantamiento (impostazione). BRITOS 6- ‘Naccasione d’’a rredda ‘mpicciaje a rReina, ‘mmece d’ajutarlo, franannole ‘ncuollo. Se facette perdunà a ll’arrancua ‘nchiudenno ‘ncanna ‘ncanna (in extremis ) a bBelfodíllo. E cchesto va pe cchello. GHOULAM 5,5 Difennette bbuono, ma lle dongo miezu punto mancante p’esserse mantenuto troppo vascio pure quanno ‘e cumpagne ‘o ‘mmitajeno a ssaglí. INLER 6 Accumminciaje bbuono cunfermanno ‘e truvarse bbuono tenenno a gGiorgigno vicino. Tuccaje tanti pallune e ppruvaje a ddà tassezza (velocità)ô ggiro-palla, però nun tentaje maje ‘o tiro ‘a fora. JORGINHO 6,5 Nun fove sfarma (colpa) soja si ‘e cumpagne nun credetteno â qualità ssoja e nun ghietteno a ddà sèguito ê Ianze suoje.Nun sbagliaje quase niente e ffove assaje bbravo a nchiudere ‘ncopp’a gGreco ch’era pronto a mettere ‘mporta! Mertens 7 ‘O meglio d’’e suoje; mettette dinto ‘o pallone d’’o ricore spiazzanno a bBardi, ajutaje a gGhoulàmmo ‘ncopp’â fascia mancina ‘nfase difenziva, radduppianno sempe e servette ll’ajuda (l’assist) d’’o pussibbile ddoje a uno a cchella vacca svizzera ‘e Zapata ca però nun ce arrivaje. Peccato! Hamsik 5,5 Nun fove ancòra isso; pruvaje a ffà quacche cusarella, ma senza risultate cuncrete; a ll’arrancua avette ‘na bbona accasione ‘e capa, ma nun ‘a sfruttaje e ppo sparette dâ scena. (da ll’83°ZAPATA 4,5 Trasuto a ffriddo, accumminciaje difennenno bbuono quacche ppallone pe ffà saglí ‘e suoje, ma lle mecco miezu punto mancante pecché braduso (lento) e ggravante comme a ‘nu cataplasemo nun fove crestiano ‘e jí a mmenà dinto ‘nu granne bbassurero (suggerimento) pittato ‘a Mertens e mannannolo fora ce levaje ‘o pussibbile ddoje a uno!) CALLEJÒN 5,5 Tenette bbòtta pe cquase tutt’’o fullé, ma po se ne scennette; ‘o spagnuolo ‘e stanco p’avé jucato sempe tanti fullé senza maje sparagnarse e sse vedette. Asciuto Pandèvvo fove custretto a ‘a fà ‘o primmo artigliero (prima punta), ma ‘e ccose meglie ‘e ffacette partenno ‘a dritta. PANDEV 6 - Tutto summato atalossa (prestazione) pusitiva d’’o macetone capace ‘e recogliere e difennere ‘o pallone dint’â camma ‘e ricore livurnese. Certo nun è ‘nu primmo artigliero (prima punta),comme ô Pipita, ma ‘o curaggio nun lle mancaje; s’abbuscaje ‘o ricore e gghiucaje p’’a scuatra. Nun ll’êsse fatto ascí; penzo ca forze isso ll’êsse sfruttato meglio ‘o bbassurero ‘e Mertenso. (dô 70°INSIGNE sv M’êsse aspettato ‘e cchiú d a Lorenzigno; è overo ca trasette dint’a ‘nu mumento difficile d’’o fullé, ma cunchiudette poco o niente.) BENITEZ 5,5 ‘O Napule accumminciaje bbuono facenno circulà ‘o pallone cu pacienza e ppricisione, ma – passato ‘nvantaggio cu ‘o ricore trasfurmato ‘a Mertens nun tenette ‘a forza ‘e fà ‘o siconno pure pecché don Rafele lassaje ca ‘o Napule suppurtasse a ll’arrancua ll’appressurà (la spinta) d’’o Livorno, addó ca êsse pututo anticipà quacche ccagno cunzideranno ca ‘a scuatra teneva dint’ê ccosse ‘a stracquezza d’’o fullé cu ‘o Swansea. ‘Mmece nun facette neppure ‘o terzo cagno. Forze nun fove ‘na granna penzata chella ‘e dicere ô Pipita ‘e farese ammuní durante ô fullé cu ‘o gGenoa.Don Rafele po, mo cchiú ca maje, à dda sturià coccosa pe ffà sí ca ‘a scuatra, fatta ‘a primma rredda, à dda cercà pure ‘a siconna e tterza, pecché, a cquanto pare, ‘na rredda nun avasta pe vvencere! arbitro MAZZOLENI 4 (‘e stima) Chist’arbitro ‘e ‘na manera o ‘e n’ata nun ce porta ce porta bbuono; pure si ajere grossi fetenzie nun ce n’ à fatto, è bergamasco e juventino e ppirciò putesse pittà pure ‘o sole nun s’ammereta maje cchiú ‘e quatto. E mmo, cu ‘a vocca amara pe nun avé vinciuto, ve saluto e ce sentimmo si vo’ dDio â prossima vota. Staveti bbe’ R.Bracale Brak