NAPOLI – FIORENTINA (23.03.14) 0 A 1 ‘A VEDETTE ACCUSSÍ

NAPOLI – FIORENTINA (23.03.14) 0 A 1 ‘A VEDETTE ACCUSSÍ Sto’ ttroppo ‘ntussecato d’’a delusione avuta ajeressera soprattutto pecché pe n’ora bbona ‘o Napule êva miso ‘nsotto ‘a scuatra ‘e Montella nun riuscenno però a sfunnà ‘nu poco pecché ‘nu granne Neto cacciaje ‘a scienza fermanno pe ttre vvote ‘e tentative d’’o Pipita e de n’atu pare ‘e cuane, ‘nu poco pecché ‘ntribbuna vicino a Dela ce steva assettato chillu cestariello ‘e ggiggino uocchie-stuorte ca sicciaje a mmeglio a mmeglio e soprattutto pecché chillu tagliaperucchie ‘e Tagliavento êva cunziderato chiara accasione ‘e rredda ‘a discesa centrale ‘e Bakiccio ca se steva abbianno verzo â porta pe ccuje quanno [37°] Ghoulàmmo,tentanno d’anticiparlo, tuccaje pede e ppalla facennolo cadé, ô tagliaperucchie nun lle parette overo ‘e puté caccià fora ‘o cuano lassanno ‘o Napule a gghiucarsela ‘ndiece pe quase n’ora. Ora mo nsi’ a cchillu mumento ‘e padrune ‘e casa êvano tenuto ‘mmano ‘o fullé, riuscenno a mmettere ‘ndifficultà ‘e viola pure ‘ndiece e cchesto nsi’ a ll’87° quanno succedette ‘o llutto, s’avutaje ‘o canisto e ô prazzo (alla fine) vincette ‘a Fiorentina lassannome ‘o ttuosseco ‘mpont’ô musso e ‘mmocca ‘nu rusario ‘e maleparole e ghiastemme pe tTagliavento ca si ‘a mmità ‘o còglieno s’è ‘nguajato pe ttutto ‘o riesto d’’a vita soja... Ce vulette vedé perdere e cce vedette e mmo ato ca siconno posto... cca ce âmm’ ‘a stà attiente a nun perdere pure ‘o terzo. Passammo ê ppaggelle: REINA 5,5 - Miezu punto mancante p’esserse fatto purtà a spasso ‘a Matri, senza riuscí a llevarle ‘o pallone, e pp’avé lassata sguarnita ‘a porta; p’’o riesto se dimustraje sicuro ‘ncopp’a ‘nu tentativo curto sempe ‘e Matri e ‘ncopp’a quacche tentativo ‘a fora. Reveillere 5,5 P’avé lassato sulo sulo a Joaquínno ca ce facette ‘o servizzio; p’’o riesto cu mmestiere riuscette a mmantènere a Cuadrado e se sganciaje spisso p’accumpagnà ll’azziona e nun ce scurdammo ‘e ‘na bbella diacunale a ll’arrancua pe ssalvà a rReina. HENRIQUE 6,5 ‘Na sicurezza a ccentro d’’a difesa. Vincette ògne brica (duello) e sbrugliaje cchiú ‘e ‘na situazziona periculosa ‘ncopp’ê repartite (ripartenze) viola. Albiol 5,5 Stanco, nun furnette ‘a solita atalossa (prestazione); se facette zumpà ‘a Gomèzzo ‘nnaccasione d’’o ‘mpiccio ‘e Ghoulàmmo e cuncedette ‘na palla ‘mpurtante a mMatri. GHOULAM 5,5 Accuminciaje bbuono ‘o fullé nun cuncedenno niente dê pparte soje e appressuranno (spingendo) cuntinuamente; però, pesce ‘e cannuccia, sapenno ‘e che panne vesteva Tagliavento se facette cogliere ‘ncopp’ô fatto a ppiglià pere e ppallone ‘e Bakiccio e se facette menà fora lassanno ‘e suoje ‘diece. INLER 6 Smistaje bbuono ‘o pallone, ma passanno ‘e minute calaje soprattutto comme prutezziona d’’a tràsera (difesa). Ce pruvaje cchiú ‘e ‘na vota senza però vedé maje ‘a porta, JORGINHO 5,5 ‘A primma parta d’’o fullé, quanno truvaje spisso ‘o chesema (varco) ‘mmiez’ê mmaglie viole, fove bbona, ma doppo ll’apòstraca (espulsione) ‘e Ghoulàmmo fove custretto a ccorrere ‘e cchiú e fenette senza cchiú sciato. INSIGNE 5 Pure essenno uno d’’e poche a ppruvarce sbagliaje troppo, soprattutto quanno cercaje ‘a porta. Putesse e avesse fà ‘e cchiú! (dô 76° MERTENS 6 Nun avette grossi ppalle ‘a jucà, ma, pe nnove minute, appena putette appressuraje (spinse) cu ddicisione nsi’ a cquanno ‘nu scarparo viola nun ‘o stennette mettennole fora uso ll’astràcalo (caviglia) senza ca ‘o tagliaperucchie dicesse niente!) (da ll’85° PANDEV sv) HAMSIK 5 Fove chiaro ca ‘o guaglione tène ‘nu prubblema psiculoggico. Servuto da Insigne, ô primmo ajone, tiraje troppo centralmente; avette cchiú ‘e n’accasione, ma preferette tracchijà (temporeggiare). Uno comme a isso nun po’ badà sulo â fase passiva. CALLEJÒN 6 Sacrificannose se mettette a ddisposizziona d’’a scuatra. Accumminciaje comme esterno uffenzivo, po êtt’’a fà ‘o terzino doppo ll’apòstraca (espulsione) ‘e Ghoulàmmo e, ttrasuto Behrami, jett’’a fà ll’esterno uffenzivo ‘sta vota a mmancina. HIGUAIN 6 Ô pprincipio ‘e fullé Neto cu ‘nu miraculo lle levaje ‘a suddisfazziona ‘e signà; s’avasciaje pe ffavurí cu ‘a qualità ssoja, ll’esterne, ma accussí facenno risultaje troppo luntano dâ porta. (da ll’81° BEHRAMI 6 - Se piazzaje a ffà ‘o terzino ‘e dritta e ffacette ‘o ssuĵo.) Benitez 5,5 Miezu punto mancante p’avé ritardato ‘a sustituzziona d’ Insigne e p’avé levato ‘o Pipita, ma cchiú ‘e chesto nun le se po’ ddicere; nun fove sfarma (colpa) soja si ancòra ‘na vota ‘e cuane sbagliajeno sotto porta e si Neto se mettette a ffà ‘o fenomeno! ‘A Fiorentina arrivaje a ttirà ‘mporta doppo n’ora ‘e juoco e ttutto summato chesto dimostra ca ‘e cuane steveno mise bbuono ‘ncampo. Peccato ca â fine d’’a jostra (giostra) ‘o Napule se truvaje ‘e viola cchiú vvicine ‘e tre ppunte. Sperammo ca ‘stu fullé ce serve ‘e ‘mparatora p’’a finale ‘e coppa itaglia e gghiammo annate; ‘o Napule, cu ‘nu poco ‘e cchiú pricisione e ddicisione sotto porta, è cchiú fforte d’’a Fiorentina! ll’arbitro TAGLIAVENTO 3 Vulesse proprio vedé ‘o cummissario ‘e campo comme ll’à trattato a cchistu tagliaperucchie(parrucchiere) ‘e Terni (ca si fa tinture e ppermanente comme arbitraje ajeressera... ‘e ssignore lle scippano ‘a faccia). Ajeressera ‘stu ‘ntontero ausaje dduje pise e ddoje mesure e cchelle riservate ê cuane foveno sempe scarze comme succedette quanno, pe ‘nu ‘ntervento senza consiquenzie,isso siscaje e ddicritaje ll’apòstraca (espulsione) ‘e Ghoulàmmo, cosa ca ce custaje ‘o fullé, mentre po ‘o stesso ‘ntervento, ma cchiú ppesante fatto ‘ncuollo a Mertenso ca ce refunnette ll’astràcalo (caviglia) isso nun dicette niente; p’’o riesto sistematicamente se ne futtette d’ ‘o recolamento i ‘e ffóte (falli) ‘e ssiscaje ô ccuntrario. Era venuto pe ffarece perdere e ce facette perdere! E mettimmo punto cca. Si Di’ vo’ ce sentimmo ggioverí ca vene . Staveti bbe’! R. Bracale Brak