TORINO – NAPOLI (17.03.14) 0 A 1 ‘A VEDETTE ACCUSSí

TORINO – NAPOLI (17.03.14) 0 A 1 ‘A VEDETTE ACCUSSí Missione cumpiuta guagliú a ‘nu minuto dô prazzo (dalla fine) e ttre punte dint’â sacca! Eppure ajeressera a tTorino, sponna granata, ‘o Napule scennette ‘ncampo cu n’interrogativo: qualu traguardo ‘nteressava ê ggiuvinotte ‘e don Rafele: ‘a speranza ‘e angappà ‘a Roma ô siconno posto ‘ncampiunato o ‘a nicessità ‘e spremmerse assaje giovedí ca vene pe ddà ô Porto ddoje palle e nun pigliarne dint’ô fullé ‘e ritorno p’’a cualificazzione ê quarte d’E.L.? E ‘e ggiuvinotte ce detteno ‘a risposta justa: cca nun se jetta niente, vulimmo tutto e senza sconte! E accumminciajeno pigliannose ‘e tre ppunte ô Comunale doppo ‘nu fullé sufferto, ma purtato ‘mpuorto credennoce nfi’ a ll’urdemo, cu ‘na zampata a ll’89° d’’o Pipita doppo ‘na corza fatta a spurtellate cu ‘o centrale Glikco ca quanno se vedette perditore, comme po dimustaje ‘a moviola, se menaje ‘nterra lassanno via libbera ô cuano ca jette a ffà sicco a pPadelli; e mmenu male ca Doveri,arbitro prubbabbilmente lazziale, nun se facette piglià pe cculo e lassaje correre. Siconna nichessa (vittoria) ‘ncama (in zona) Cesarini ca da ajere è ‘a cama Benitèzzo! Vulimmo dicere ca ‘o Napule fove furtunato, ca recugliette cchiú ‘e chello ch’êva semmenato? E dicimmolo..., ma nun ce ne fotte niente pure pecché, a gguardà bbuono, nun se tratta sulamente ‘e bbona sciorta (di fortuna), benzì se tratta ca ‘a scuatra ‘e don Rafele riesce nsi’ a ll’urdemo a ffà valé ‘o motulo suojo appressuranno (spingendo) cu ‘nu tiki-taka cuntinuo e cratizzanno (ottimizzando) ‘a fatica d’’e meglio ca tene, cosa ca fa sbaglià ll’avverzario.Facimmoce caso: ‘nnairopa ce stanno tanti scuatre comme ô Napule ca jocano cu ‘o stesso tiki-taka ca nun è spettaculare, ma asfissiante e esasperante e risolvono tutto cu quacche ghiucata maggistrale ‘e ll’artigliere (top-player) lloro, cosa ca ajere succedette cu ‘o Pipita e â semmana passata cu Cagliecònno.Certo fósse meglio vencere pe tre o quatto a zzero, ma si succedesse ancora ‘e vencere p’uno a zzero a ll’urdemu minuto, a mme nun me dispiacesse! Passammo ê ppaggelle: REINA 6,5 – Furtunato, quanno servette fove salvato ddoje vote dô palo, ma facette vedé ‘e che bbuoni panne veste n’atu paro ‘e vote lassanno ‘e granate a vvocca asciutta. REVEILLERE 5 Ca tene n’aità s’abbia a ffà sentere; pigliato ‘ntassezza (in velocità), jette dint’ê chiavette; se lassaje scappà a dDarmiànno ca arrivaje a ttirà,e mmenu male ca truvaje a rReina; quanno po raramente arrivaje ‘ncopp’â linea ‘e funno nun cunchiudette niente. (dô 74° HENRIQUE 6 Trasette súbbeto e bbuono ‘nfullé facenno ‘o laterale ‘e dritta cu ttanta qualità e prova ne fove ca ô finale ‘o Napule jucaje quase sempe dô lato suĵo.) FERNANDEZ 6,5 Sbrugliaje cchiú ‘e ‘na situazziona periculosa jucanno cu cuntinuità, nchiudenno a mmestiere ‘ncopp’ a cchi capitasse, capitasse e spisso mettette ‘na pezza a quacche fessaria d’’e mediane. ALBIOL 6 Jucatore ‘e mestiere, pure affannanno quacche vvota, riuscette sempe a nun fà succedere ‘o llutto e tenette d’uocchio a cCerci ca partette assaje largo. GHOULAM 5,5 ‘Nflessione a ppietto ‘e chello ca putesse dà.Chiammato ‘ncausa ‘nfase ‘e disancamiento (disimpegno) sbagliaje troppo e, soprattutto ô primmo ajone fove fora pusizziona. INLER 5 Atalossa (prestazione) poco cunvincente d’’o turco-napulitano ca facette troppi prane (errori) ‘nfase ‘e reclaggía d(impostazione) e dètte poca cupertura â tràsera ( difesa). (dô 63° BEHRAMI 5 Serata no ‘e Valònno ca ggiraje vvacante perdenno cchiú ‘e ‘nu pallone comme chillo lassato a kKurticcio ca servette a Immobile ca però, pe bbona sciorta nosta, sprecaje mannanno ‘ncurva). JORGINHO 6 Miezu punto ‘e cchiú pe cchillu bbellu pallone a ppassatora (filtrante) pe Cagliecònno ô primmo ajone, ma p’’o riesto l’atalossa soja fove scarzulella pecché perdette diverzi pallune e nun riuscette a cupulià (dialogare) cu ‘e cumpagne pure dànno ‘a ‘mpressione ca fósse ll’unico capace ‘e puté sfravecà ‘o muro d’’o Toro. MERTENS 6+ Poco cercato soprattutto durante ô primmo ajone fove sinamparco (comunque) ll'unico ca riuscette a ppuntà ll'ommo e a ttrasí dint’â tràsera assaje nchiusa d’’o Torino e a ccercà ‘a porta. HAMSIK 6 Atalossa scarzulella ‘a soja, ma lle mecco miezu voto ‘e cchiú pe cchella pennellata finale ca lanzaje ô Pipita p’’a rredda d’’a nichessa (vittoria). P’’o riesto Marekiaro tuccaje mille pallune senza però dà zuco â manovra. CALLEJÒN 5,5 Nun fove ‘o jucatore ca cunuscimmo; forze, doppo ‘e tante fullé jucate, sta ‘ncrisi fisica; pe gghionta ‘e ruotolo ‘o Torino nun lle concedette ‘o spazzio pe gghí ‘mprufunno e riusaltaje essere ‘na mauserra (pistola) senza ‘o caricatore. (da ll’81° INSIGNE sv) HIGUAIN 6,5 Nun ghiucaje ‘nu granne fullé pecché Glikko ‘o cuntrullaje bbuono i ‘e cumpagne ‘o cercajeno poco. Po, però, chi tiraje ‘o capo ‘nterra ? Sempe isso, sempe ‘o Pipita. Anantícato (Insostituibile). Benitez 6 – Vincettemo e avette raggione isso pure si ‘o juoco d’’e cuane nun fove brillante; durante ô primmo ajone ‘a scuatra dètte ‘a ‘mpressione ‘e se sparagnà pe ghiucarse tutto a ll’arrancua (ripresa) contro a ‘nnu Torino ca si difenneva urdinatamente, ma senza essere periculuso dint’ê repartite (nelle ripartenze)’a fora ‘e ‘nu tiro ‘e Bovo ‘a luntano ca cugliette ‘o sette e ‘nu tiro centrale ‘e Meggiorini parato. A ll’arrancua (ripresa) ‘o fullé s’arapette pure pecché trasetteno primma Immobile e ppo Cerci ca nun assicurajeno ‘o stesso cuntribbuto difenzivo ‘e bBarreto e de Meggiorini, ma ll’isurrupío (l'equilibrio) resistette nfi’ ô prazzo (alla fine). bBona ‘a difesa, scarzulillo ‘o centrocampo, ma facette bbuono a ttené ‘ncampo nsi’ a ll’urdemo a mMarekiaro ca pennellaje ‘o lanzo dicisivo p’’o Pipita. bBona pure ll’idea ‘e usà a hHenrique comme terzino ô posto ‘Reveillere, sparagnato forze pe ggioverí. ll’arbitro DOVERI 6 Vecchia carta canusciuta ‘stu ‘mpiacato (ma nun se sape ‘e che) vulterrano, forze tifoso d’’a Lazzio, ca però sta ‘ncopp’ô stato paca d’Agnelli, teneva quacche debbeto cu ‘o Napule e ajere se ne levaje quaccuno nun facennose piglià pe cculo ‘a Glikco e nun fermanno ll’azziona d’’o Pipita ca risulvette ‘a prattica. ‘Nconchiusione ce serveva ‘e vencere e se vincette. Chesto conta e ‘o riesto so’ vuommeche ‘e zetella attaccate cu ‘e nnucchetelle. Peccato sulo ca ll’Udinese mmerze ê nnove nun riuscette a ffermà ‘a Roma! E cu cchesto ve saluto e si dDi’ vo’ ce sentimmo viernarí doppo d’’o fullé ‘e ritorno cu ‘o Porto ô san Paolo speranno ‘e puterve raccuntà bbelli ccose. Staveti bene! R.Bracale Brak