NCE SIMMO!...

NCE SIMMO!... I Bbella nce simmo ormaje, Pasca è vvicina! N’ata vutata d’uocchie e pure chesta pure chesta quaresema ca appesta fernesce e torna …‘addore ‘e giesummino. Ritorna abbrile, sciorano ‘e ciardine e s’appripara ‘a meglia ‘e tutt’ ‘e ffeste: è Ppasca ormaje ,e âmm’ ‘a spatrià ‘e ffeneste pe ffà trasirla cca chest’aria ffina d’’a primmavera nosta auriosa e bbella! E ce âmm’ ‘a appriparà ca ‘o calannario chesto mo dice: “Scava ‘e pparattelle e tiénete a mmanese ‘o nnicessario; arape ‘e stipe e caccia tutto ‘a fora pecché s’ à dda ‘mpastà, ca chest’è ll’ora! …” II Ggià dint’ ô furno veco sistimate ‘o casatiello, ‘o tòrtano e ‘e ppastiere… ggià veco ‘a ‘nzogna p’ auntà ‘e tturtiere, ggià ‘o ggrano è ccuotto e ‘a ricotta appruntata p’ ‘o dorge ‘a tutte quante decantato, p’’o cchiú spiciale dorge d’ogge e ajere… Nce simmo: va’! E ffa’ ‘e ccose a dduvere; appronta ddoje sperlonghe cu ‘e ffellate; m’arraccumanno, nun scurdarte niente: salame, pruvulone e ppo uno ‘e tutto ‘a coppa e ppo ‘a ricotta e tiene a mmente ova tosta, capecuollo, presutto ventresca a ffelle e ssaciccia piccante ca st’anno voglio farme n’atu ttanto! III Po fatte ‘a lista e scinne; va’ ô mercato a scégliere cu metodo e ggiurizzio: nun fa ô ssolito tuĵo ca tiene ‘o vizzio ‘e accuntentarte ‘e chello ca t’ è ddato senza chiaitarte ‘a rrobba cchiú priggiata, comme si ‘avessemo pe cumparizzio e nno pavanno senza schiribbizzio! ‘Mmece ‘a pavammo ‘sta rrobba e ssalata! Pe ccuje, miéttete e scarta ‘accuppatura, scava dint’ ê spaselle e dint’ ê cceste e ghienno a ffunno scígliete ‘a verdura chella cchiú adatta e gghiusta p’’a menesta: ‘a cecoria, ‘a vurraccia e ‘e scarulelle… e a pparte po ‘e gguappe mammarelle! IV Tu me può dí: “Ma è Ppasca, no Natale…. Ch’hê ‘a fà cu’e scarulelle e cu vurraccia?!...” È inutile – i’ rispongo – ca faje ‘a faccia e ‘o musso amare… Certo, è nnaturale ca stammo a Ppasca, ma a bbene o a mmale, mammà ‘a faceva; se scurciava ‘e bbraccia e ‘a lavava scurrènnola a setaccio e doppo cotta e arregulata ‘e sale, ‘a metteva a pappiarse dint’ ô broro cu ‘o culillo ‘e presutto, ‘o piezzo ‘annecchia cu ‘e murzelle ‘e furmaggio culor d’oro, ddoje pummarole, ma senza pellecchia e cu ‘o mazzetto, ‘a cepolla e ‘a peperna: ‘nu broro gustuso all’uso ‘e taverna! V E tu vulisse ca a mmeno i’ ne facesse? Tu pretendisse chesta guapparia ch’ i’ abbandunasse ll’use ‘e casa mia, ll’uso ‘e mammà e st’anno te dicesse: “ Va bbuó, nun dammo aurienza… fa ll’istesso! Cagna menú! Leva ‘sta fessaría d’ ‘a menesta e d’’o bbroro e ccomme sia decide tu senza farte ‘nteresse né ssorde, né fatica…. Ce arrangiammo: ‘nu primmo, ‘nu siconno e ‘nu cuntorno… E ppo tírate ‘a porta…. Cca mangiammo ggià tutte ‘e juorne assaje e senza scuorno… pe ccuje sparagna! E nun piglià ‘o crapetto ca i’ m’accuntento ‘e ‘nu paro ‘e purpette!...? VI Addó!? Gnernò! T’ ‘o ppuó scurdà!… chist’anno Pasca ‘âmm’ ‘a festiggià comme cunviene; pe ccuje teté pe ffà ‘e ccose perbene ce s’à dda appriparà no ‘ncanna ‘ncanna, ma tutto cosa bbuono prugammanno senza farce truvarce scarze ‘e lena arrangiuliate quase e ammalapena! Accumminciammo ampressa: mo pe ttanno pe nun farce truvà scuperte ‘e niente dô ruoto cu ‘o crapetto, ô beneditto, dâ ‘ncappucciata fresca ô scialamiento d’ ‘e ccarcioffole ‘a fà ‘ndurate e ffritte, d’’e mmammarelle vaso e mmecco cca comm’ ‘e ffaceva ‘a bonanema ‘e mammà! VII P’’o vino po, nenné t’îsse azzardarte!?…, Nun ffà ca ‘o ppiglie tu! P’ammore ‘e dDio! Me voglio cunziglià cu chi sacc’ io: voglio ‘na cosa ‘e prezzo, fatta a arte, fatta a mmestiere, ca si no me ‘nquarto e me ‘ntosseco Pasca, arrassusia!... Pirciò vi’ ‘e nun purtà ‘a chesta via rrobba ‘e cantina, sfusa e ssenza carta senz’etichetta, spisso vattiata, rrobba ch’è ffatta ‘e certo cu ‘e ccartelle e è ‘mpupazzata pejo ‘e ‘na zetella! VIII Tu m’ hê capito? Me songo spiegato? Pasca âmm’ ‘a farla cu ògne sentimento, voglio ‘na Pasca granne overamente spennenno ‘e sorde uno ‘a coppa a n’ato scialanno comme è gghiusto ‘e ‘sta jurnata, senza penzarce, senza pentimento e a ttavula nun ce à dda mancà niente nce voglio tutta spasa e appriparata ‘a rrobba ca ‘sta festa cca se chiamma: ‘o ruoto ô furno, ‘o tòrtano,’a menesta, fellata, pizza rustica ‘int’ â ramma, carciòffele e ‘a pastiera ca è ‘na festa!... Tutto ce voglio, tutto… e tu dammillo pure si me n’attocca ‘nu murzillo! IX Pure si chistu ‘nfamo diabbète e chesti bbubbazzelle ca m’agliotto pe fa scorrere ‘o sango ‘ncoppa e ssotto, m’’o stanno ‘mpurtusanno pe dereto…. privannome ‘e ògni ccosa… ‘stu dicreto ‘sta vota ‘o straccio, oje bbella e me ne fotto! E, succedesse pure ‘o quarantotto, scordo anàlese e pinnule ô ccumpleto! E ca venesse pure ‘a fine ‘o munno, nun voglio rinunzià ô riesto ‘e niente! ‘Sta Pasca ‘a voglio festiggiarla a ffunno: tutto m’ à dda passà pe sott’ ê diente… Cca nuje campammo ‘na vota surtanto, e ppo schiattammo e gghiammo ô campusanto!... X E nce voglio arrivà a ccuorpo sazziato e sciuotto ‘e vernecale, sciuotto ‘e panza… senza pentirme e senza fà lagnanza p’esserme fatto privo e sparagnato, peffino ‘e Pasca, ‘e ‘na bbona magnata…. pecché so’ ccerto ca - si è p’ ‘a mangianza - manco san Pietro lla lle dà ‘mpurtanza e ce perdona cchiú de ‘na sgarrata… E ‘mparaviso assieme ê puverielle sa’ quanta ggente sta ciotta e pasciuta…, mentre chi à sparagnato ‘a caccavella nun trova posto e piglia ‘na smestuta, talmente ‘na scusuta ‘e mantesino rrobba ‘a sentirse ‘o ggelo dint’ ê rine! XI Lassa ca aggi’ ‘a zucarme ‘a smestutella pe quacche zzarro o p’ ‘e tante peccate ca nsino a mmo ‘a quanno songo nato aggiu ‘nfilato comme a ffile ‘e perle, ma no pecché so’ stato ‘o nnacchennello ca ‘e tutto e ttutto s’è sempe privato, ca nun à maje dint’ ô ruoto alliccato e ca n’à fatto sulo sputazzelle, vedenno ll’ate sazziarse comme a crape, e ffarse ciuotte ciuotte a nnomme ‘e dDio, surzïà ‘o bbicchiere e accummincià dô capo, cuntente e ccu ‘na faccia d’alleria cu ‘o musso spuorco ancòra ‘e marzaletta e d’’e mmulliche ‘e ll’urdema scarpetta! XII E ritruvarle lla bbelle e pasciute a pparo a pparo aunite tutte quante né cchiú, né mmeno comme a ll’ati sante… giacché ‘o Signore – e cchesto è risaputo – ll’aíza ‘a mana a cchi è cannaruto! Lla ‘ncoppa, lla nce saglie chi è ggravante chi è ciuotto e cchino e none chi è vacante, chi sta a stecchetto o è ‘nu malepatuto… No, chisti cca â via ‘e fora so’ cacciate E ll’ànno fermo, fermo ànno ‘o scaccione… e ‘a ògni paraviso alluntanate! Nun ponno stà ‘mmiez’ â cummertazzione pecché so’ state scieme e tiene a mmente se mmeretano ‘o ‘nfierno sulamente! XIII E i’ nun ce vogl’jí! E cchesto è ccerto: nun songo micco e nné songo sciabbacco… voglio pigliarme ‘e muorte ‘e chi me ‘nzacca dint’ ô tauto e me porta all’apierto! Nun me ne fotte… i’ voglio stà ô cupierto pe ll’autu munno e ffà a pParasacco febbie e ppernacchie e darle ‘o meglio smacco jenno lla ‘ncoppa cumme a ‘nu lacierto ‘ncerato e sodo, a ccuorpo ‘e bbuonu piso pe me piglià ‘nu posto dint’ â gloria, e averlo‘mpremio i’ pure ‘o Paraviso scanzannome pessino ‘o purgatorio, p’averle tutte quante festiggiate ‘e ssante feste, ‘e ffeste cumannate! Raffaele Bracale (dal vol. CU ‘E MMANE ‘NSACCA Ed. f. c. Napoli 2011 )