BUCATINE CU LL’ALICE

BUCATINE CU LL’ALICE chello ca ce vo’ pe sseje perzone 600 gramme ‘e bucatine, miezu kilò d’alice fresche, ciento gramme d’alicesalate sott’uoglio, ‘dduje cucchiare ‘e semmente ‘e fenucchio, ‘nu cucchiaro ‘e pignuole ‘nu cucchiaro abbunnante d’uva passa, ddoje bustine ‘e safrone (zafferano), ‘nu bicchiere d’uoglio ‘auliva dunciglio (e.v.p.s. a f.), dduje spicule d’aglio ammunnate e ntretate finu fino, sale duppio ‘na vrancata, sale fino e ppepe janco macenato a ffrisco q.n.s., pane rattato cquatto cucchiare. comme se fa Lavà e pulezzà ll’alice levanno capa, coda, mmennute (interiora) e spina e farne ‘e ognuna dduje sulumiglie (filetti), lavarle ancòra e asciuttarle. Piglià ‘nu rutiello largo, ricarve (versarvi) ll’uoglio e ‘o ttrigliato d’aglio farle culurí a ffuoco sustenuto e agnadirve (aggiungervi) apprimma ll’alice salate e ddoppo ca cheste se so’ sciugliute dint’ a ll’uoglio agnadí ‘e sulumiglie d’alice fresche e ffà suassà (rosolare) pe cinche minute; a ‘stu punto agnadí ll’uva passa ammullata e spremmuta, ‘e pignuole, ‘nu cucchiaro ‘e semmente ‘e fenucchio, ‘e ddoje bustine ‘e safrone, pocu ssale fino e ppepe janco macenato a ffrisco quanto ne piace; avascià ‘o ffuoco e fà cocere pe ‘nu quarto d'ora. Fraditanto mettere ô fuoco ‘na caurara cu abbunnante acqua salata (sale duppio) e cumfromme jesce a vvollere agnadirvi l’atu cucchiaro ‘e semmente ‘e fenucchio,e farve àrvere (lessare) ‘e bucatine teniente teniente; quanno so’ ppronte, scularle e revacarle dint’ ‘o rutiello cu ‘a sarzulella d’alice, ammiscà, derrammarve(spargervi) ‘ncoppa ‘o ppane rattato e ppassà pe ddiece minute ‘o rutiello dint’ô tiesto (forno)caudo (200°). Tirà fora, purziunà e serví caude ‘e tiesto ‘sti sabruse(gustosi) bucatine. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale .