NAPOLI - VERONA (18/05/14) 5 A 1 ‘A VEDETTE ACCUSSÍ

NAPOLI - VERONA (18/05/14) 5 A 1 ‘A VEDETTE ACCUSSÍ E accussí ajere, guagliú, se nchiudette ‘o campiunato e se nchiudette cu ‘na nichessa (vittoria) sustanziosa dinto a ‘nu san Paolo addó cu trummette e trummettelle facetteno festa sulo diecemila guagliune tifuse, sistimate dint’ê distinte, visto ca Tosèllo levaje ‘o sfizzio a ttutte ‘o riesto d’’e tifuse napulitane ‘e stà vicino â scuatra lloro pe ringraziarla d’’a bbella tempurata (stagione) purtata a ttermine. Nuje però, ‘ntribbuna divano, v’aggi’’a dicere ‘a verità, nun è ca ce spassajemo assaje; certo ce facette piacere vencere..., ma ajere comm’ajere fove ‘na nichessa (vittoria) contr’ê muorte; nun ce fove maje fullé (partita) e ggià ô prazzo (alla fine) d’’o primmo ajone ‘o Napule êva mettuto tre ppalle ê spalle d’’o purtiere veronese e ‘o riesto ‘o ffacette a ll’arrancua (ripresa) nchiudenno ‘a prattica cu ‘nu retissante (squillante) cinche a uno e facetteno tutto cosa ‘e cuane pecché ‘a rredda d’’e verunese fove n’utobbutto (autogol) ‘e Zuniga ca ‘ncopp’a ‘na timmuría (punizione) d’Iturbe, nun se facette ‘e cacchie suĵe e, deviannòla, spiazzaje ô povero Dobblasso ca ‘a steva commetamente aspettanno ‘ncopp’a cchill’atu palo... Uh! ca ll’ànn’ ‘a caucià! “E ffatte ‘e ccorna toje!”,dich’ i’! “Hê rutto ‘o saciccio a don Rafele pe farte trasí ‘ncampo? T’à accuntentato? Ma mo vide ‘e nun dà ‘mpiccio..., miettete dint’a n’angulillo e nun ce abbuffà ‘a zampogna!” ‘Mmece se vulette mettere ‘ntridece e facette ‘a frittata! Pe ffurtuna ca ‘o Napule nun se scumpunette e ppurtaje a ttermine ‘a prattica p’’o divertimento d’’e diecemila guagliune, ca – veri signure, figlie ‘e signure – nun rignetteno ‘e mmerda ( comme ‘mmece êvano fatto ‘e guagliune juventine a tTurino) ‘e jucature avverzarie! Passammo ê ppaggelle: DOBLAS: 6,5 ‘O Verona facette overamente poco pe darle penziere, ma chella grama vota ca fove chiammato ‘ncausa rispunnette cu ‘nu granne ‘ntervento ‘nterra facenno annuzzà ‘ncanna a ‘nu verunese ‘o tiro a bbotta sicura.Êsse pututo pure fermà ‘o timmurría (punizione) d’Iturbe si Zuniga nun ll’êsse schiattato ll’ove dint’ô panaro! MAGGIO: 6 Urdinaria amministrazione.Nun fove chiammato a ffà ato. HENRIQUE: 6,5 Pure ajere ll’atalossa (prestazione) d’ ‘o brasiliano fove sustanziosa e cunvincente e dimustraje ca addó ‘o mette, ‘o mette don Rafele, a ddritta o a ccentro ‘o risultato è ssempe bbuono! BRITOS: 6 Tutto tranquillo dê pparte soje. GHOULAM: 6 Appressuraje (spinse) cchiú ‘e Maggio e ‘o ffacette sempe pusitivamente, pure si cu scarze risultate pratiche. JORGINHO: 6,5. Povero Mandorlini; se magnaje ‘e mmane penzanno d’averlo ceduto a ggennajo! (dô 78° LASICKI: sv). DZEMAILI: 6 Sustanza, tanta corza e ffatica scura. (dô 59° ZUNIGA:5 Inutile e ddannuso). CALLEJON: 7,5 Comme êva prufetizzato don Rafele,ajere signaje ‘a vintesima rredda ‘e ll’annata soja, redda ca rappresentaje ‘a centesima ‘ntempurata (in stagione) d’’o Napule. Che ato? Cunfezziunaje ‘nu zucchero d’ajuda (assist) primma dettanno ‘o pasiglio e ppo jenne a ccruzzà (crossare) pe zZapata a ttu ppe ttu cu ‘a porta aperta. Meglio ‘e chesto? (dô 46° Radosevic: 6 Cane ‘e presa è e cchello facette.). MERTENS: 8 Ajere ‘o meglio d’’o mazzo; ddoje ajude (assist) pennellate e ddoje rredde, una meglia ‘e ll’ata ca facetteno ‘mpazzí ‘e guagliune ‘ncopp’ê spalte d’’o san Paolo. INSIGNE: 6,5. Se vedette ca êsse vuluto spaccà ‘o munno pe cunvincere a pPrandelli a purtarselo ‘mBrasile, ma nun lle riuscette ‘e partecipà ô festivàllo d’’e rredde signate. Peccato. ZAPATA: 7. Da matarazzo ‘e sbreglie e uggetto misteriuso a scarfesciuzzo (cecchino); ajere se cungedaje cu ddoje rredde; chi sa si servono per farlo cunfermà! BENITEZ 8 Lle cuntesto sultanto d’avé fatto trasí a zZuniga, ma p’’o riesto nun sbagliaje niente, cunfermanno ‘na granna criscenza d’ògne reparto cu meccaniseme oramaje cunsulidate cu ggente comme Ghoulàmmo, Henrique e gGiorgigno, ca ànnu cagnato faccia â scuatra e ponno essere ‘mpurtante assaje pure p’’a tempurata (stagione) ca vene. ll’arbitro PAIRETTO 6 ‘e ‘ncuraggiamento; quacche vvota lle s’appilaje ‘o siscariello e nun siscaje, ma p’’o riesto niente ‘a dicere. E cu cchesto ve saluto, ve ringrazzio ‘e ll’attenziona ca m’ âte dimustrato pe tutt’’a p’’a tempurata (stagione) e ve dongo appuntamento nun saccio a cquanno e ppe che ccosa.FORZA NAPOLI! CIUCCIO FA’ TU! R.Bracale Brak