SAMPDORIA – NAPOLI ( 11/05/14) 2 A 5 ‘A VEDETTE ACCUSSÍ

SAMPDORIA – NAPOLI ( 11/05/14) 2 A 5 ‘A VEDETTE ACCUSSÍ Prattica risolta, guagliú. Ajere a ll’ora d’’a tiella ‘o Napule scennette ‘ncampo a mMarassi contr’â Sampedoria pe purtà ‘mpuorto ‘a decima nichessa (vittoria) esterna d’’o campiunato, vattenno ‘o recòrdo precedente. Don Rafele aveva ggià puntato ‘stu fatto da quacche semmana e ce riuscette a ll'urdema accasione pussibbile e ‘o ffacette addirittura sbrasanno. Overo ca ‘mporta â scuatra duriana jucaje ‘nu pierepetterra scarzo assaje ca ô prazzo (alla fine) d’’o fullé (incontro) tenette ‘ncopp’â cuscienzia allimmeno ‘nu paro ‘e rredde cuane, ma ‘o Napule, pe cchello ca se vedette, se mmeretaje ‘e vencere largo e nun s’arrubbaje niente e cce dètte ‘a suddisfazziona ‘e vedé turnà a ssignà a Marekiaro ca (favurito ‘a ‘nu granne cruzzo ‘e Zapata ca ‘o mettette a ttu ppe ttu cu ‘a porta spalancata) nun se facette prijà e finalmente mmettette dinto chillu beneditto pallone turnanno a ffirmà ‘o tabbellino d’’e marcature !’Nzomma, tutto summato ajere p’’o Napule a mMarassi, contro a ‘na scuatra ca nun teneva nè preoccupazzione, nè speranze ‘e coccosa, fove ‘na scampagnata e ‘o fullé êsse pututo ferní pure cinche o seje a zzero pe nnuje e fósse stato pure meglio... Ma mo nun mettimmoce a ccercà ‘o pilo dint’a ll’uovo!Passammo ê ppaggelle: REINA 6 Nun putette farce niente ‘ncopp’ô tiro d’Edèrro, (lassato libbero ‘a Maggio)ca ncarraje a ttirà ‘na vreccia furtunata ca apprimma tuzzaje ‘nterra, po vasaje ‘o palo e finalmente se ‘nfilaje ‘mporta. P’’o riesto sicuro ‘ncopp’ a quacche tentativo duriano. (dô 78° DOBLAS 5,5 Maje chiammato ‘ncausa; chella vota ca succedette se facette cogliere ‘mpriparato pure si ‘o tiro centrale ‘e Wszolekco fove assaje putente) MAGGIO 5,5 Turnato a gghiucà dimustraje bbona vuluntà e pruntezza ‘nfase difenziva sbruglianno quacche situazziona ‘a fora ‘e chella ‘e quanno nun riuscette a nchiudere ‘ncuollo a Edèrro. FERNANDEZ 6,5 Atalossa (prestazione) pusitiva ‘e ll’argentino pure si ‘na vota se perdette a mMaxi Lopèzzo, ma senza consequenzie.Se facette vedé pure dint’â camma ‘e ricore duriana, ma fove sfurtunato pecché ‘o purtiere lle riuscette a ffermà ‘a cabbesera (colpo di testa) mannanno ‘a palla ‘nfacci’ô travesagno (traversa), cosa ca però favurette ‘a signatura ‘e Zapata ca sbluccaje ‘o fullé. MESTO 6 Stranamente utilizzato comme centrale ‘a don Rafele, rispunnette cu n’ atalossa (prestazione) pusitiva ‘e de granne appricazziona. Bravo a ffermà cchiú ‘e ‘na vota chi capitaje, capitaje. RÉVEILLÈRE 5,5 – Presidiaje bbuono ‘a cama soja, ma accumpagnaje poco o niente ll’azzione. Durante ô primmo ajone (tempo) ‘nfase difenziva arresecaje n’utubbutto (autogol)chiammannose ‘e muorte ca giustamente lle facette Reina. INLER 6,5 Atalossa (prestazione) assaje pusitiva d’’o turco-napulitano ca gestiunaje (gestí) bbuono ‘o pallone senza sfregazze (sbavature) o prane (errori) e accumpagnaje spisso ll'azione cu cqualità. JORGINHO 6- ‘Nu prano (errore) retissante (clamoroso) ô pprincipio ch’êsse pututo custà caro; meglio a ll’arrancua, ma, tutto summato, êsse pututo fà ‘e cchiú! CALLEJON 7 Mettette ‘a firma soja sott’ô tabbellino d’’e marcature ‘ncullabborazziona cu ‘o purtiere duriano, cu ‘na punizziona pennellata a ffilo ‘e palo assicurannose ‘o diacennuvesimo centro d’’a tempurata; ô ssolito po dètte ‘na granna mana ‘nfase passiva.(dô 72° ZUNIGA 6 Finalmente se pigliaje ‘a mana a dderitta ‘e farese vedé ‘ncundizziona, ‘ncampo addó mancava dô vintotto ‘e settembre ‘e ll’anno passato. Sfresaje (Sfiorò) ‘na rredda cu ‘nu tiro ‘a fora.) HAMSIK 7 Cunfermaje tutte ‘e prucresse fatte dint’a ll’urdemu mese e ffove prutacunista ‘e n’atalossa (prestazione) ‘mpurtante;cupuliaje (dialogò) a mmestiere cu ‘e cumpagne, se sacrificaje ‘nfase difenziva e ffinalmente!, turnaje a ssignà sfruttanno, cu ‘nu caratteristico ‘nzerimento centrale, ‘o cruzzo (cross) fatto ‘a Zapata. C’è ppoco ‘a fà: ‘o Napule nun po’ ffà a mmeno ‘e ‘nu Marekiaro ‘nforma! (dô 65° MERTENS 6 Currette assaje, ma nun riuscette a ttruvà ‘a chesema (varco) justa pe partecipà pur’isso â festa.) INSIGNE 7,5 ‘Ncriscenza. ( in crescita) Atalossa (prestazione) assaje pusitiva a ttutto campo pe Lorenzigno, ca nun sulo signaje ‘na granna rredda, ma jucaje sempe p’’a scuatra e nun se sparagnaje maje rincurrenno ll’avverzario nsi’ a dinto â camma ‘e ricore cuana. Pronto pe pPrandelli. DUVAN 7,5 Miezu punto ‘e cchiú nun tanto p’’a rredda signata, facennose truvà pronto ô posto justo, ô mumento justo, quanto pe cchella fatta signà a mMarekiaro cu ‘nu granne cruzzo (cross); jucatore pur’isso ‘ncriscenza (crescita) a ppietto d’’e primme tiempe, avesse ‘a jucà ‘nu poco ‘e cchiú e nun fósse sbagliato ll’anno ca vene, si a ggiugno DeLa accatta ‘nu bbuonu sustituto d’’o Pipita, a ddarelo ‘mpriesteto ‘nserie B. Benitez 7,5 ‘O Napule ‘e don Rafele recugliette ‘a decima nichessa esterna ‘ncampiunato vattenno ‘o recòrdo precedente e si purtaje a ‘na sola rredda dâ quota ciento ‘ntempurata (in stagione) e à dda fà ancòra ‘nu fullé. Tutte ‘ndivinate ‘e pprove fatte cu mMesto, Maggio e ppure cu zZuniga.A ‘stu punto che ddicere d’’a primma tempurata (stagione) ‘e don Rafele? Nun ce putimmo lagnà, dich’i’ pure si ce po’ sta quacche rammarico p’essere arrivate, ô prazzo (alla fine) d’’o campiunato, troppo luntano dâ primma; ‘na cosa è ccerta: ‘a fase uffenziva funziona a mmaraviglia, si sistemammo meglio ‘o centrocampo e ‘a tràsera (difesa) ggià dâ prossima tempurata, putimmo turnà a ssunnà! Forza ‘o Rafè, ca ce sta quacche cestariello ca te sta aspettanno â chesema (al varco)! arbitro CHIFFI ‘e Padova 5 N’atu criaturo ‘ncopp’â strata d’’o Napule. Sta addivintanno ‘na canzona; chisto d’ajere, ‘nu ‘ngignere ‘e vintinove anne fove addirittura esurdiente ‘nserie A; nun ce capette quase niente e de consequenzia siscaje a vienetenne e ssenza criterio caputianno ‘e falte (falli) e cchi ne facette ‘e spese, pure si pe ffurtuna senza cunsequenzie, fove ‘o Napule! E ccu cchesto ve saluto e si dDi’ vo’ ce sentimmo llunnerí ca vene pe ll’urdema ‘e campiunato dô san Paolo tristamente a pporte nchiuse. R.Bracale Brak