NAPOLI –KALLONI amichevole (28/7/14) 3-1 ‘A VEDETTE ACCUSSÍ

NAPOLI –KALLONI amichevole (28/7/14) 3-1 ‘A VEDETTE ACCUSSÍ Eccuce n’ata vota cca, guagliú, ma ll’aggi’’a dicere ca ajere ce facettemo ‘a croce cu ‘na cosa ca nun me piacette: piglià ‘na rredda a ll’uttantunesimo, addó êvamo ‘nchiuso ‘o primmo ajone ‘ncopp’ô tre a zzero e nniente faceva suspettà ca nun êssemo pourtato a ttermine a pratteca senza ‘ncassà rredde; ‘mmece nun ghiette accussí, l’arrancua fove assaje peggio rispetto ô primmo ajone e ‘ntribbuna divano ce rummanettemo male! Ma jammo cu ordine: Dint’â furmazziona d’ ‘o Napule contro ô Kalloní don Rafele facette a mmeno ‘e cchiú d’uno mannanno ‘ncampo dô primmo minuto a mMichu ca però nun fove schierato comme artigliero (prima punta) ma ê spalle d’’o martarazzo ‘e sbreglie: Duvànno Zapata dint’ô pacchetto d’’e ttre meze ponte cu Cagliecònno e Insigne.Eppure ‘o Napule passaje ‘nvantaggio ggià ô diciassettesimo e pproprio cu Cagliecònno ca andivinaje ‘nu diacunale ca che vuó piglià e sbluccaje ‘o risultato. ‘O spagnuolo mettette dinto pure ‘a siconna palla, chella d’’o doje a zzero devianno pe scagno cu ‘na spalla ‘nu tiro ‘e Zapata...e ‘nchiudette ‘a pratteca trasenno pure dint’a ll’azziona d’’o tre a zzero quanno ‘na cunchiusiona soja fove deviata dint’â porta greca da Anastasiadisso, difenzore d’’o Kalloní, scuatra simpatica, ma niente ‘e che! A ll’arrancua, ‘o Napule pure p’’e troppe sostituzzione fatte ‘a don Rafele nun fove cchiú isso, nun fove cchiú periculuso e addirittura a ll’uttantunesimo ‘o Kalloní signaje ‘a rredda d’’a bbannera cu ‘nu certo Adegio, (trasuto proprio a ll’arrancua [ripresa]), ca apprufittaje ‘e ‘nu prano (errore) ‘e marcatura ‘a parte d’’o cchiú guaglione d’’e cuane, trasuto ô posto ‘e Koulibalý, ‘ncopp’a ‘nu tiro ‘e squina; che disdetta, che peccato!Ma è pproprio overo ca nun se po’ frijere ‘o pesce cu ll’acqua... e Luperto ‘o ddimustraje! ‘Na cunziderazziona a pparta pe cchella fetenzia ‘e divisa cchiù adatta â scuatra ‘e wallerettino mazzarri ca ô Napule: mettitavillo dint’ê cchiocche ca ‘o culore d’’o Napule è ‘o lluvardo (azzurro) e à dda essere chillo; tutt’’o riesto è ppuppú, ppuppú!... Nun me facite vedé cchiú chellu schifo d’ajere!!! Passammo ê ppaggelle va’: RAFAEL sv – Nun fove maje praticamente ‘mpignato seriamente. (dô 69° COLOMBO 6- Avette ‘a ‘mpressione ch’êsse pututo fà coccosa ‘e cchiú ‘ncopp’â rredda subbíta; ‘ncumpenso ô finale riuscette a mmetterce ‘na bbona pezza respingenno ‘na conchiusione ‘a fora forte e ppericulosa.) MAGGIO 5,5 Nun me piacette; pure si spisso accompagnaje a Cagliecònno,’o ffacette cammenanno ‘ncopp’a ll’ova, ‘mmece ‘e correre, mancaje ll’appuntamente cu quacche bbona palla e nun andivinaje nisciunu cruzzo (cross).(dô 46° MESTO 6- Restaje quase sempe vascio, futtennosene d’accumpagnà a vVargasso ‘ncopp’â curzia!) KOULIBALY 7 Comme era succieso cu ‘a primma asciuta, se cunfremmaje ‘nfra ‘e meglie: anticipaje spisso facenno valé ‘e cqualità ssoje tenniche e ffisiche e dimustranno ‘e sapé leggere a mmestiere ll’azziona. (dô 69° LUPERTO 5 Nun ce simmo! N’ à dda magnà furne ‘e pane! Troppo guaglione e ssenza perzunalità, tenette ‘ncopp’â cuscienza ‘a rredda d’Adegio) ALBIOL 6 ‘O spagnuolo rummanette ‘ncampo pe ttutt’ ‘o fullè (match) dimustranno d’essere ggià ‘ncundizziona; p’’a verità nun tenette ‘a fà ‘na grossa fatica, ma fecette sempe arremarrà (ripartire) ll’azziona a mmestiere. BRITOS 6- Pure si riuscette a ggarantí cupertura e centimetre ‘ncopp’ê ppalle aute, dètte cchiú ‘e ‘na vota ‘a ‘mpressione d’essere fora pusizziona (dô 46° GHOULAM 6 Mesto rummanette vascio e isso avette ‘o canzo e ‘a libbertà p’ appressurà (spingere) cu cuntinuità) RADOSEVIC 6,5 - Bbuono ‘o primmo ajone d’’o guaglione cileno ca dimustraje d’essere migliurato dinto a tutt’ ‘e ddoje ll’epate (fasi) ‘e juoco. (dô 60° INLER 6- Cu quacche prano (errore) ‘e troppo, dimustraje ‘e nun essere ancòra pronto.) JORGINHO 6,5 - Se pigliaje p’’a mano ‘a scuadra ggià ê primme minute cuntrullanno a mmestiere ògni ppalla.’O truvaje migliurato assaje pure fisicamente, signale d’avé faticato bbuono dint’ô ritiro a Ddimaro. (dô 46°GARGANO 5,5 – Nun saccio ‘a do’ lle vene a ddon Rafele a vederlo ommo d’ordine; p’’a verità nun facette grossi fessarie, ma rallentaje troppo ll’azziona cu cuntinue ppasiglie (passaggi) addietrate) CALLEJON 7+ Assulutamente ‘o meglio:sbluccaje ‘o fullè (gara) cu ‘na cunchiusione spettaculare,redubblaje (raddoppiò) devianno pe scagno, ‘e spalla ‘nu tiro ‘e Duvànno e ppo ce mettette ‘o ssuĵo appemunnanno (propiziando) ll'utubbutto (l’autorete) d’’o tre a zzero. (dô 46° HAMSIK 6- ‘A scuadra a ll’arrancua (ripresa) nun ripetette ‘a prova d’’o primmo ajone e isso nun riuscette a trascenarla.) MICHU 5,5 – Overo ca se trattaje, p’’o Muscio, d’’a primma asciuta, ma ajere me parette ll’aseno ‘mmiez’ê suone; à dda migliurà ‘a cundizziona pe puté fà valé ‘e cqualità ssoje ca nisciuno discute, ma ajere nun riuscette a ffarese cunziderà nè comme trecquartista, nè, a ll’arrancua,comme artigliero (prima punta).S’à dda aspettà! (dô 64° PANDEV 6 ‘E stima; trasette ô mumento ca ‘o juoco rallentaje, ma avette pochi pallune pe ffà chello ca sape fà.) INSIGNE 6+ Po’ ffà e à dda fà ‘e cchiú soprattutto ‘ncopp’â curzia ‘e mancina; ajere me piacette ‘nu paro ‘e vote e soprattutto quanno lanzaje a Cagliecònno ‘ncopp’a chell’ata curzia cu ppricisione ‘e rilurgiaro. (dô 46° DUMITRU 5,5 Aizaje porvera, tentanno quacche cusarella e perdenno troppi ppalle!) DUVAN 7 – Pure cunfermanno quacche prucresso rummane sempe ‘nu matarazzo ‘e sbreglie braduso (lento) e pesante, ca primma ‘e partí palla ô pere pe ffà male, ce vo’ uno ca ‘o votta arreto; tentaje però ‘e farese vedé dint’â camma cupulianno (dialogando) cu ‘e cumpagne;suojo ‘o tiro ca deviato ‘e spalla ‘a Cagliecònno, addiventaje ‘a rredda d’’o doje a zzero. (dô 46° VARGAS 5,5 Comme a dDumitru aizaje porvera, rummanenno pe ttutta ll’arrancua ll’uggetto misteriuso ch’è ssempe stato!) BENITEZ 6 ‘E stima, pecché don Rafele tène ancòra tanto, tanto e ttanto ‘a faticà! Avucurie e sperammo ca, cu cchello ca tène, ‘nu gattò ‘o riesce a nciarmà e nun ce avimmo accuntentà ancòra ‘e patane fritte! ‘Na raccumandazziona a pparte: nun ‘e ffacesse mettere cchiú ‘ncuollo chella zezzosa divisa d’ajere, ca aggio pure ‘a ‘mpressiona ca porta jella! E cu cchesto ve saluto e ve dongo appuntamento, si dDi’ vo’, â prossima vota ca nun saccio quann’è! R.Bracale Brak