ATLETICO BILBAO – NAPOLI prevío ‘e ritorno (27/8/14) 3-1 - ‘A VEDETTE ACCUSSÍ

ATLETICO BILBAO – NAPOLI prevío ‘e ritorno (27/8/14) 3-1 - ‘A VEDETTE ACCUSSÍ Che delusione guagliú e cche nervatura!Si a ‘stu mumento désse ‘nu muorzo a ‘na vipera ll’accedesse ‘e tuosseco. Ajeressera a bBilbabo, dint’â tana d’’e cumpagne basche, ‘a scuatra ‘e don Rafele nun riuscette a ffà tutto chello ca nujaute spéravamo. E fernette cu ‘na mazziata sacrusanta e ‘a scuatra ‘e don Rafele nun riuscette a staccà ‘o biglietto p’’e ggirune d’’a Ciampionsa, nun riuscette a pigliarese ‘o posto ca lle cumpetesse dint’â sbrennente (luccicante) vetrina d’’e ggranne d’Airopa.Certo doppo d’’o prevío (preliminare) d’annata fenuto uno a uno ô san Paolo ‘o fatto se sapeva ca nun fósse stato facile e cumm’infatte nun fove semprice, ma maje penzavo ca succedesse chello ca ‘mmece succedette! Maje penzavo ca ‘e cuane avesseno sbracato tanto e rijalato no una, ma ‘a bbellezza ‘e tre rredde ê cumpagne basche. ‘Mmece ‘a difesa, accumincianno ‘a Maggio, jette dint’ê chiavette e cchiú de uno facette ‘na fessaria appriesso a n’ata fino a ppigliarle malamente ‘ncopp’ê rrecchie! E ddicere ca doppo ‘nu primmo ajone jucato sí ‘nsuggezziona, ma senza particulari pericule,’o Napule arapette ll’arrancua (ripresa) cu ‘a cegna (grinta) justa e mMarekiaro se ‘mmentaje ‘na rredda capolavoro ca ce allargaje ‘o core comme a ‘nu cufunaturo e ce dètte ll’illusione ca ‘o Napule êsse pututo ancappà ‘a cualificazziona. Ma chi t’’o dà?! Chillo fove ‘o cunto a gghí pecché ‘o Napule jenno ‘nvantaggio êsse avuto ‘a pruvà a ffà ancòra male repartenno ‘ncuntrattacco (contropiede) e sfruttanno ‘e curzie cu Cagliecòn(no) e mMertens(o), ma ‘e ccose nun ghiettono accussí e cu ‘nu centrocampo ca nun custrueva ‘e cuane se facetteno scamazzà dint’â trecquarta lloro e ‘o pareggio basco arrivaje troppo ampresso pe sfarma (colpa) ‘e Maggio ca, ‘ncopp’a ‘nu tiro ‘e squina (angolo) se perdette a Aduriz(zo) ca libbero e ffranco mettette ‘a palla ê spalle ‘e Rafa(ni)ello. Po succedette chello ca nun t’aspiette: ‘a tràsera (difesa) crullaje ‘mparanza facenno prane (errori) ‘a curtellate comme a cchillo d’Albiòllo e Rafaèllo ca ‘a facetteno overamente grossa rijalanno ‘o doje a uno e cu isso ‘o fullè (match). E lassammo perdere ‘a terza rredda ca fove overamente comica pe sfarma ‘e ll’arbitro, ‘e ll’assistente e de chill’alleccute d’’e cuane ca se fermajeno ‘mblocco aspettanno ‘nu sisco pe nn’ úrzo ‘e cóse (fuorigioco), sisco ca però nun arrivaje. ‘Nzomma chella rredda poco regulare nchiudette ‘a facenna e avettemo ‘a delusione cucente ‘e nun essere ammesse â Ciampionsa cu ‘o periculo mo ca quacche bbona pedina aiza ‘ncuollo e sse ne va facennoce restà curnute e mmazziate! Che delusione guagliú e cche nervatura! Mo sperammo ca ‘stu fatto nun fósse ‘nu male efudío (viatico) p’’o campiunato.Sperammo ca don Rafele (sempe ca nun se ne va pure isso...) se scorcia ‘e mmaneche e p’’o campiunato ttrova ‘a soluzziona adatta p’’o centrocampo addó se venceno ‘e fullè. Chello ch’è stato, è stato e guardammo annante. Nun me dicite niente, ma paggelle nun ne faccio, sto’ troppo ‘ncazzato, allisciasse quacche ttre e ppo me ne pentesse pe ccuje mecco cinche a ttutte quante (pure a cchi è rimasto ‘mpanca... e ppure a Marekiaro ca doppo d’’a rredda sparette),quatto a don Rafele, a Rafa(ni)ello e a cCagliecòn(no) e ttre a mMaggio e Albiòllo. E cu cchesto ve saluto e ve dongo appuntamento, si dDi’ vo’, â prossima vota doppo d’’a primma ‘e campiunato ! R.Bracale Brak