NAPOLI – SPARTAK PRAGA E.L. (18/9/14) 3 A 1 ‘A VEDETTE ACCUSSÍ

NAPOLI – SPARTAK PRAGA E.L. (18/9/14) 3 A 1 ‘A VEDETTE ACCUSSÍ S’êv’ ‘a fà e accussí ffove guagliú! S’êv’ ‘a vencere e sse vincette !Ajeressera ô san Paolo estreglia (debutto) nichéfura (vittoriosa) d’’o Napule dint’ô turneo airopeo ‘e cunsulazziona. Poca ggente presente ‘ncopp’ê bbemate (spalti), ma tutte curiuse ‘e vedé quale fósse stata ‘a riazziona d’’e cuane doppo d’’a carocchia pigliata ‘ncasa cu ‘o Chievo. E aggi’’a dicere, ca tutto summato, fove bbona e avettemo ‘a suddisfazziona ‘e vedé ascí scunfitte dô san Paolo ‘e pariente lasche ‘e Marekiaro, ma soprattutto avettemo ‘a suddisfazziona ‘e vedé ‘o Pipita mettere dinto ‘nu ricore (chillo d’’o mumentaneo pareggio) dint’â stessa porta e ‘ncopp’ô stesso palo ‘e chillo falluto cu ‘o Chievo, signo ca ‘o guaglione sciso ‘ncampo cu ‘nu pèro cuntuso, nun s’era fatto cundizziunà dô prano (errore) ‘e dummeneca passata turnanno a essere isso comme po se vedette cchiú ddoppo quanno cu ‘nu granne ricamo a ppuntaggiorno ‘ncopp’â mancina, mettette ‘ncopp’ô pèro ‘e Mertenso ‘o pallone d’’o vantaggio cuano, vantaggio ca po ‘o stesso Mertenso facette cchiú sustanziuso cu ‘na granna jucata ca lassaje cu ‘a vocca aperta pure a Insigne assettato ‘mpanca. ‘Nzomma ô finale foveno tre ‘e sfugliatelle dispenzate dâ premiata pasticciaria ‘e don Rafele e avesseno putute essere pure ‘e cchiú si Cagliecònno nun fósse stato sfurtunato schiggianno ‘o travesagno cu ‘na bbotta dô lémmeto d’’a camma e ssi Marekiaro avesse miso ‘mporta e nno mannato ‘ncurva ‘nu commeto pallone ca ll’era arrivato ‘a ‘na rispinta d’’o purtiere ‘ncopp’a ‘na bbotta ‘a fora ‘e Gargano. Pacienza! ‘A cosa trista però fove n’ ata e ciovè chella ‘e scuprí ca ‘o peggio cestariello prisente‘ncopp’ê bbemate (spalti) d’’o san Paolo nun fove ggiggino-uocchie stuorte, ma proprio Aurelione de papponiis ca comme s’assettaje ‘ntribbuna, ppó e ‘o Spartak Praga passaje ‘nvantaggio cu ‘o primmo tiro fatto ‘mporta.E cche saciccio! E statte â casa! Chi t’à ‘mmitato?,chi t’à chiammato? Fance stà cuiete! Vinne a ll’arabbe e vvattenne! Passammo ê ppaggelle: RAFAEL 6 [‘e stima]. ‘Ncopp’ô tiro d’ Husbauer(ro) nun ce putette fà niente, visto ca ‘o slovacchio riuscette a ffà passà ‘a palla ‘mmiezo a ‘na serva ‘e cosce, mannanno ‘o pallone a vvasà primma ‘o palo e ppo a ttrasí dinto; p’’o riesto nun arresecaje niente, pure quanno ‘a tràsera (difesa) trabballaje ‘nu poco. HENRIQUE 6,5 Mettette cchiú ‘e ‘na pezza, dànno ‘na mano a ttutte ‘e cumpagne ‘e sezziona(reparto). KOULIBALY 6 Cu ‘a palla ‘nfra ‘e piere, facette spaventà ‘nu poco ‘e presente ô San Paolo. Meglio quanno fove chiammato a ausà ‘o fisico e ‘o capucchione. ALBIOL 6 Tutto summato cancellaje ‘a brutta atalossa (prova) cu ‘o Chievo cu nuvanta minute d’attenziona e de granne applicazziona; tanti bboni cchiusure e bbona qualità a ll’epata ‘e plantamiento (in fase di impostazione). BRITOS 5 – Sbagliaje paricchio lassanno, arreto a isso, troppi bbuche; se vedette ca comme esterno fa troppa fatica. INLER 6 S’êtte cuntentà cchiú ‘e difennere ca ‘e custruí juoco e spalliggiato ‘a Gargano, facette chello ch’êv’ ‘a fà! GARGANO 6,5 ‘O mestiere suĵo è cchillo ‘e spezzà ‘o juoco e ‘o ssape fà bbuono; ajere cercaje pure, ‘nu paro ‘e vota ‘a porta cu bbelli tire ‘a luntano, ma p’’o riesto nun ll’addimannate ‘e guvernà ‘o pallone: nun è arta soja! MERTENS 8 Sempe periculuso cu ‘e cunchiusione ‘a fora,avette ‘a ‘nteliggenza [nun perdenno ‘e vista ‘o Pipita] ‘e farese truvà ô posto justo, ô mumento justo pe mettere dinto ‘a palla d’’o vantaggio; ma ‘o capolavoro ‘o facette quanno trasette dint’â camma, se ne jucaje tre o quatte depositanno ‘mporta ‘a palla d’’o tre a uno e facennose perdunà ‘e avé cercato ‘e cupià a mMaradonna signanno ‘e mano e ppe cchesto s’abbuscaje ‘nu cartellino jalizzo (giallo) . Sperammo ca Insigne, guardannolo, s’è ‘mparato coccosa! CALLEJON 6+ Uno ‘e chille ca lla ‘nnante se muvette ‘e cchiú: pruvaje spisso ‘a cunchiusione e cugliette pure ‘o sette d’’o travesagno (traversa),però nun riuscette a cuncretizzà.(da ll'84° LOPEZ sv) HAMSIK 5,5 - Ancòra nun ce simmo! Pruvaje a ffà ‘o riggista avanzato, furnenno ‘int’ô pprufunno palle ê cumpagne, ma fove troppo braduso (lento) e ttroppo cumpassato e cquanno avette ddoje ggranne accasione, ‘na vota cugliette ‘o travesagno (traversa),n’ata vota mannaje ‘o pallone ‘ncurva! Chi t’è stramusica! ( da ll’82° ZUNIGA sv) HIGUAIN 8,5 – Turnaje a essere ‘o jucatore cchiú ‘mpurtante p’’a scuatra;nun êss’ avut’’a jucà ma ô finale risultaje uno d’’e meglie d’’o mazzo: suĵo ‘o ricore ‘e ll'1-1, suĵo ‘o ricamo a ppuntaggiorno ca purtaje ô doje a uno.BentornatoPipita! (dô 69° MICHU 5 Ô finale avette spazzio pe ccercà gloria, ma mancaje ‘e cuncretezza e determinazziona!) All. BENITEZ 7 S’accuntentaje ‘e ‘nu rutizzio (turnover) ‘e quatto elemente,lassanno giustamente ‘mpanca a mMaggio e a Insigne e facenno a mmeno pure ‘e Ggiorgigno. Ô pprincipio me parette assaje nervuso, ma po passanno ‘e minute e vedenno comme ‘a scuatra [ca ce steva ‘e capa e dde cosce] steva riaggenno, se rilassaje. Spero ca ‘sta nichessa (vittoria) d’ajere fósse ‘nu bbuonu efudío (viatico) p’’a trasferta d’Udine. ARBITRO: Kevin BLOM (Olanda) 6 Niente ‘a dicere! E ccu cchesto ve saluto e si dDi’ vo’ ce sentimmo lunnerí ca vène. Staveti bbe’. R.Bracale Brak