NAPOLI – TORINO (5.10.14) 2 a 1 ‘A VEDETTE ACCUSSÍ

NAPOLI – TORINO (5.10.14) 2 a 1 ‘A VEDETTE ACCUSSÍ ‘Assa fà â Maronna!Ajeressera guagliú arrivaje n’ata nichessa (vittoria) napulitana ô san Paolo. Ma quanta sufferenza, quanta! Oramaje s’è ccapito ca ‘a suggità à dda acchiappà ‘mparanza a ttutte quante e ll’à dda purtà o ô Carmene, o â Maronna ‘e ll’Arco, o a pPumpeje o a mMuntevergene e ss’ à dda decidere a ffarle benedicere pecché accussí nun po’ gghí cchiú annanze. Cca nun se po’ ccampà ‘e parpete. Ajeressera primma ca Insigne menasse dinto ‘o pallone ‘e ll’uno a uno ricuperanno ‘o stuco (gol) ca mmerdarella êva fatto purtanno ‘nvantaggio ‘o Toro e pprimma ca po ô 72° Cagliecònno mettesse ‘mporta‘o pallone d’’o risultato definitivo, Insigne e ‘o Pipita se magnajeno cchiú ‘e ‘nu stuco (gol). E cchesto nun po’ gghí! Cca nun se po’ ccampà ‘e parpete! Sinamparco (comunque) pure si chella d’ajere nun fove ‘na granna nichessa (vittoria) e ffove troppo sufferta, i’ ‘a cunzidero ‘e bbona eufemía (augurio) e dde sustegno (viatico) p’’o prosecujo d’’o campiunato e ppe cchello ca nce aspetta dint’ô turneo d’E.L. Passammo ê ppaggelle: RAFAEL 5 Poco ‘mpignato; nun me sento ‘e darle sfarme (colpe) ‘ncopp’ô stuco (gol) ‘e Quagliarella, ma ancòra psicologicamente bluccato comme se vedette quanno sbagliaje ‘nu paro ‘e asciute; ‘o facesse arrepusà e pruvasse Andujarro. MAGGIO 5 Ll’epata d’appressurazziona (fase di spinta) fove bbunarella; finalmente ‘ncarraje ‘nu cruzzo (cross) e arrivaje ‘ncopp’ô funno, ‘mpignannose..., ma arreto jette sempe ‘nsufferenza; sfarma soja ll’avé lassato ‘nghiuco a qQuagliarella. ALBIOL 6 Comme a uno ca mo stesse ascenno ‘a sott’ô mantesino, arresecaje assaje trattenenno p’’a maglia a mmerdarella dint’â camma nosta. P’’o riesto urdinaria amministrazziona. KOULIBALY 6,5 Ata bbona atalossa (prestazione) ‘e ‘nu difenzore cu ‘nu fisico chino ‘e saluta ca se facette rispettà e anticipaje spisso chiunque lle capitasse. ZUNIGA 6 Bbona atalossa (prestazione) pure p’’o ballarino culumbiano cunnita ‘a bboni discese e cratiste (ottime) chiusure. Ajuda (assist) dicisivo p’ Insigne. INLER 6,5 Ajere ‘o turco-napulitano me piacette: lanzaje, urchestraje e deriggette cu pperzunalità trachetianno (scuotendo) ‘e suoje; tiraje periculosamente, ma Gillet lle dicette ‘e no! Peccato! GARGANO 6 Ô ssolito:tanta corza, tanti bbuoni cuntraste, ma a cqualità nun ce simmo! Però ‘o carattere e ‘a cegna (grinta)lle fanno guadagnà ‘o seje. (dô 67° LOPEZ 6+ Meglio ‘e Gargano p’’a qualità, se piazzaje a ffà trancara (diga)tentanno ‘e ‘ncauzà [arginare] ‘o finale cranata). CALLEJON 6,5 Se vedette cchiú ppoco d’ati vvote, ma cu ‘nu tiro streuzo riuscette a ssignà ‘o stuco(gol) d’’o surpasso e chesto conta assaje! Furtunato? Bbuono! MICHU 5 ‘Nu franfellicco inutile; lle riuscette pe scagno cu ‘na cabbesera (colpo di testa) ‘e centrà ‘o travesagno (traversa) ma, p’’o riesto sulo sustentazziune (appoggi) e muvimenti sbagliate; tenuto troppo ‘ncampo s’abbuscaje pure ‘nu cartellino jalizzo (giallo) pe ppruteste.(dô 71° MERTENS 5,5 Soprattutto p’’o contropiede sprecato ô finale quanno ce mettette troppo a ppiglià ‘na dicisione e Insigne fenette ‘nnúrzo ‘e cóse [in fuorigioco]). INSIGNE 6,5 – Sbagliaje dduje stuche (gol) facile ô primmo ajone (nel primo tempo) e parette ca ‘a serata se mettesse storta; pe ffurtuna però a ll’arrancua (ripresa) sfruttaje ‘accasione cchiú ddifficile signanno ‘o stuco d’’o mumentaneo pareggio e ppo cumpletaje ll’opera servenno ll’ajuda (assist) dicisivo pe Cagliecònno. HIGUAIN 5,5 Me dispiace ‘e nun puterlo mettere ‘e cchiú; è overo ca faticaje p’’a scuatra currenno assaje, ma sottoporta sbagliaje troppo. Nun saccio quanno, ma ‘o stuco (gol) primma o doppo à dda arrivà! (Da ll’ 85° MESTO sv) ALL. BENITEZ 6,5 Certo isso nun tenette sfarme (colpe) si ‘e suoje se magnajeno cchiú ‘e ‘nu stuco e ssi ‘o purtiere cranata facette ‘o fenomeno; sinamparco (comunque) ‘o Napoli s’ ammeritaje ‘e vencere cu ‘o juoco e ‘o ggenio (voglia)cu ttutto ca don Rafele facette jucà a ‘nu franfellicco comme a mMichu; dich’ i’: Marekiaro tene ‘a freva e nun te ne puó serví? Miette Zapata e sposta ‘o Pipita ô posto ‘e Marekiaro, ma nun mettere a cchist’inutile lungagnone spagnuolo! Però tra ‘na cosa ‘e n’ata ‘o Napule sta â terza nichessa cunzecutiva d’’e ccinche prummise da don Rafele.Sperammo ca ll’ate fosseno meno sufferte! ll’arbitro MASSA 5 ‘Stu bancario d’Imperia ca arbitraje ajeressera p’ ‘a siconna vota ‘nu fullé d’ ‘o Napule ô san Paolo nun me piacette! Troppo guaglione, senza sperienzia e ssoprattutto senza curaggio, sufferette ‘o bblasone d’’a maglia cranata e trattaje ê turiniste cu ‘e guante ggialle sparagnannole cchiú ‘e ‘na cosa e cchesto senza dicere ‘e tanti ati fetenzie assurtite cuncesse ê guappe i ê mammasantissime ‘e Ventura ca mazzuljajeno ê cuane senza ca isso ‘ntervenesse e ‘e mmettesse a dduvere! E ccu cchesto ve saluto e si dDi’ vo’ ce sentimmo â prossima vota ca, mo comme a mmo, nun saccio quann’è, speranno sinamparco (comunque) ca ve pozzo cuntà ‘e n’ata nichessa (vittoria) cuana. Accussí sperammo! Staveti be’! R.Bracale Brak