NAPOLI – VERONA (26/10/14) 6 A 2! ‘A VEDETTE ACCUSSÍ

NAPOLI – VERONA (26/10/14) 6 A 2! ‘A VEDETTE ACCUSSÍ Êva ‘a succedere guagliú; primma o doppo êva ‘a succedere ca Marekiaro e ‘o Pipita se scetasseno dô suonno! E ssuccedette ajere a ll’ora d’’e ppastarelle e d’’o rusolio quanno ‘o Napule finalmente ritrovaje ‘e stuche (gol) d’’e pedrere (frombolieri) suoje e ffove festa ô San Paolo addó cumplessivamente ne cunzignajeno seje ôVerona. E ddicere ca s’era misa malamente p’’e guagliune ‘e don Rafele, ch’erano jute sotto doppo scarze trenta siconne pe ‘nu stuco d’Halfreddsònno. ‘A riaziona cuana però fove a mmorte ‘e subbeto e ‘o purtiere verunese Rafaèllo abbiaje a ccaccià ‘a scienza e a ffà ‘e miracule pure isso, comme fanno tutte ‘e purtiere ca veneno a nNapule.., ma nun ce putette niente ô 44° ‘ncopp’â bbotta ‘e Marekiaro, ca facette ‘o bbisso ô 58° della ripresa.Trasette però dint’ô Verona,’nu certo Nico Lopèzzo ca firmaje ‘o doje a ddoje; lla ppe lla però se scatenaje finalmente ‘o Pipita ca nne facette tre e nn’êsse fatto pure quatto si ll’arbitro e ‘o signalinie êsseno cecato bbuono! Â festa finale nun mancaje Cagliecònno e Mandorlini i ‘e suoje se carriajeno ‘nu cuoppo ‘e seje cresommole,una cchiú zzucosa e n’ata! Dalle ‘nfaccia! Passammo ê ppaggelle: RAFAEL 6: È pproprio scalugnato ‘stu guaglione; pure ajere s’abbuscaje ddoje carocchie senza tené però nisciuna sfarma (colpa); ‘ncumpenso, ‘ncopp’ô doje a ddoje, facette vedé ca tene stoffa cu dduje ‘ntervente cratiste (ottimi) ca salvajeno ‘o risultato. MAGGIO 6: Appressuraje (spinse) assaje scevusciannose (sovrapponendosi) a Cagliecònno, ma –ô ssolito – fove poco priciso cu ‘e cruzze (cross). ALBIOL 6,5: Miezu punto ‘e cchiú p’’a crusé (percussione) ca fruttaje ll’ajuda (assist) p’’o Pipita ca purtaje ‘o Napoli ‘ncopp’ô mumentaneo cinche a ddoje, ma ‘o fullé (incontro) fove ‘nsagliuta p’’o spagnuolo ca se lassaje surprennere d’’a partenza lanzata d’’o Verona e doppo appena trenta siconne ‘e juoco, cu ‘na respinta troppo centrale, cunzignaje palla a ll’islandese Halfredssònno ca, nun guardato nè ‘a Giorgigno, nè ‘a Lopezzo, facette ll’uno a zzero p’’o Verona. Atu prano ca tenette ‘ncopp’â cuscienza ‘nzieme a Koulibalý fove chillo d’esserse fatto cartià dô Lopezzo verunese ‘int’a ll’azziona d’’o doje a ddoje, ma p’’o riesto riuscette a ffà chello ch’êv’’a fà. KOULIBALY 6.5: Si nun fosse stato p’’a fessaria fatta ascenno ‘e prozo (fondoschiena) ‘ncuollo ô Lopezzo verunese ‘int’a ll’azziona d’’o doje a ddoje, se fósse mmeretato allimmeno miezu punto ‘e cchiú, pecché ‘o ggiuvinotto fove dignificato (maestoso) e se facette truvà a ttutte ‘e pizze. GHOULAM 6: Pure ‘o terzino algerino facette vedé cchiú ‘e ‘na migliuria (miglioramento) partecipanno ‘e cchiú ô juoco curale d’’a scuatra e sbaglianno poco o niente a ll’epata difenziva (in fase difensiva). DAVID LOPEZ 6-: Pure pe isso ‘o fullé (incontro) fove ‘nsagliuta visto ca, pronti via, e nun ghiette a nchiudere ‘ncopp’ a ll’islandese Halfredssònno. Ma po se ripigliaje e venette fora risultanno ‘o classico centrocampista ca nun se vede, ma se sente, tatticamente priciso e pulitelico (prezioso)comme a ‘nu surdatiello ca nun vène meno ê ccunzegne. JORGIHNO 6: Miezu punto mancante pe nun avé guardato a ll’islandese Halfredssònno, ma po se facette nutà ‘e cchiú a ppietto d’’e fullé(incontri) passate facennose truvà sempe ‘int’ô vivo d’’o juoco. (Dô 72° INLER 6: Don Rafele ‘o facette trasí pe ddà sustanza ô centrocampo ‘nsufferenza e ‘o turco-napulitano facette tutt’’o duvere suĵo risultanno ‘mpurtante pure a ll’epata ‘e trancara (in fase di contenimento). CALLEJON 7,5: Ma ch’ato à dda fà? Faticatore nato, difennette, sviluppaje ‘a manovra ed attaccaje jucanno sempe p’’e cumpagne; appaciucaje (propiziò) ‘o stuco (gol) d’’o pareggio e ppo signaje ‘o quarto cu ‘nu diacunale forte e priciso ca nchiudette praticamente ‘e juoche e lle fruttaje p’’o mumento ‘o primmo posto dint’â crassifica ‘e ll’artigliere (cannonieri) cu ssette stuche (gol). Ma ch’ato à dda fà? HAMSIK 7: Partette malamente ‘o slovacco, po â ‘ntrasatta (all’improvviso) s’ appicciaje sbluccannose ô San Paolo e mmettenno a ssigno ‘na pareglia (doppietta) ‘mpurtante p’’o risultato. ‘E pusitivo pure quacche repartita (ripartenza) nun sfruttata a dduvere e cchillu bbellu ajudo (assist)p’’o stuco (gol) ‘e Cagliecònno.Don Rafele ‘o sustituette sulo pe ffarle piglià giustamente ll’applavuso d’’o San Paolo.(Da ll 84° HENRIQUE sv) INSIGNE 7-: Finalmente ‘na granna atalossa ‘e Lorenzigno; lle mancaje sulamente ‘o stuco pe ‘ncurnicià ‘a serata; isso ce pruvaje d’ògne mmanera, ma ‘o Rafaello verunese pareva ca teneva ‘nu cunto suspeso cu ll’esterno cuano! (Da ll 80° MERTENS 6,5: Tridece minute ‘ncampo: justo ‘o tiempo ‘e prucurarese ‘nu sacrusanto ricore e mmustrà tutte ‘e cqualità ssoje!) HIGUAIN 8,5: Tracche, trezziole, biancale e bbotteammuro!Finalmente è riturnato ‘o Pipita, e ‘o ffacette comme sulo ‘e granne campiune sanno e pponno fà. Signaje quatte stuche ‘o centrattacco argentino,ma ll’arbitro ce ne cunvalidaje sulo tre! Peccato! ‘Ncumpenso ce arrecriajemo gudennoce tutto ‘o repertorio suojo d’attaccante ‘e razza e ggranne sciantiglione (fuoriclasse):classe, caruscupía (opportunismo) timusía (caparbietà) soprattutto dint’ô stuco d’’o tre a ddoje e pricisione cu ‘o ricore ca fissaje ‘o risultato ‘ncopp’ô seje a ddoje! È tturnato ‘o Pipita, è tturnato! BENITEZ 6.5: Ajere don Rafele non deludette ‘o San Paolo: sprunaje a dduvere ‘a scuatra ca scennette ‘ncampo cu ‘a capa e cu ‘e ccosce e cu ‘a nicessaria cattiveria.Certo ‘o Napule à dda ancòra faticà ‘ncopp’a ll’epata difenziva (fase difensiva) pecché nun se po’ ppiglià ‘nu stuco doppo vintinove siconne e essere custrette a attaccà pe quarantacinche minute primma ‘e riuscí a ppariggià, nè se po’ farese agguantà ‘ncopp’ô doje a ddoje doppo d’essere passate ‘nvantaggio. Tutta ‘a scuatra però dimustraje ca finalmente ‘o ppoco ‘e cazzimma è stata truvata e ca se po’ cuntinuà ‘ncopp’a ‘sta strata! I’ ce mettesse ‘a firma a ppiglià sempe dduje stuche si po ne facessemo seje o sette! Arbitro GERVASONI e segnalinea 4 Ca Giulietta fósse ‘na zoccola se sapeva, ma ca s’ ‘a facesse cu st’arbitro mantuvano e cu ‘o signalinea suojo ‘e dritta, ‘o scuprettemo ajere quanno arbitro e signalinea annullajeno ‘nu stuco regulare d’’o Pipita pe nn’ urzo’ecóse (fuorigioco) ca vedetteno sulo lloro e cchella zoccola ‘e Giulietta! Però po ‘o Madonna se vedette quanno nun putette fà a mmeno ‘e siscà ‘o ricore ca ‘o Pipita trasfurmaje purtannose ô stesso ‘o pallone â casa p’’e tre stuche mise dinto! E ccu cchesto ve saluto e ssi dDi’ vo’ ce sentimmo ggiovedí ca vène speranno ca fraditanto miercurí nun ce ‘ntussecammo, jenno a bBergamo contr’â scuatra travante (satellite) d’’a juve! Staveti bbe’! R.Bracale Brak