JUVENTUS – NAPOLI (supercoppa 22.12.2.014) 7 A 8 ‘A VEDETTE ACCUSSÍ

JUVENTUS – NAPOLI (supercoppa 22.12.2.014) 7 A 8 ‘A VEDETTE ACCUSSÍ Biancale, fuja-fuje, trezziole e bbotte a mmuro guagliú!Ajeressera a dDohà [Qatarre] ‘o Napule se jette a ppiglià chella Coppa ca ô 2012 a pPichino chillu sicchio ‘e lota ‘e Mazzoleni êva rijalato a bBuffonno e socie.Ma ajeressera ‘o Napule se levaje ‘e pprete ‘a dint’ê scarpe vincenno, pe otto a ssette, meritatamente e aunestamente ll’edizziona nummero vintisette d’’a Supercoppa itagliana e ‘o catòrtama (successo) ‘ncopp’a cchella vecchia zoccola janca e nnera arrivaje cu ‘a bonafficiata (lotteria) d’’e ricure doppo cientovinte minute cumbattute e ttutto summato, isurrupiuse (equilibrati),ca s’erano nchiuse ‘ncopp’ô doje a ddoje. Ve conto ‘mpoche parole comm’erano jute ‘e fatte: ‘e ccose nun s’erano mise bbone p’’o Napule visto ca ‘a juve ggià ô 4° minuto era passata ‘nvantaggio cu cchella scigna ‘e Tevezzo ch’êva apprufittato ‘e ‘na fessaria cullettiva d’’a tràsera (difesa) cu Lopezzo ch’’e capa,‘mmece ca annante êva mannato ‘o pallone arreto addó Albiollo e Koulibalý s’erano ustaculate dànno va libbera ô tracchiuso ca futtette ô prevetariello nuosto. Però ‘a risposta d’’o Napule nun se facette aspettà troppo pure si nun fove furtunata e Marekiaro ô 15° cugliette ‘nu palo retissante (clamoroso) cu Buffonnno fora causa. Primma ‘e ll'intervallo ‘a juve ce pruvaje n’ata vota sempe cu ‘a scigna e Rafiluccio se facette valé. ‘A musica cagnaje a ll’arrancua (nella ripresa) quanno ‘o Napule turnaje ‘ncampo diciso a ttruvà ‘o stuco (gol) cu ttutt’’e mezze, ma pareva proprio ca ‘a sciorta nun ne vulesse sapé d’ajutarce: Cagliecònno sbagliaje ‘a pusizzione favurevole, retissantamente (clamorosamente) mentre Gonzalone cu ‘na magaria, cugliette n’atu palo scartellato e avettem’ âspettà ‘o 67° pe vedé ‘o Napule afferrà ‘o pareggio proprio cu ‘o Pipita, ca fove maggistrale a devià ‘e capa ‘nu granne cruzzo (cross) ‘e De Guzmànno. Ô finale ‘o tracchiuso ce pruvaje ancòra, ma inutilmente e accussí s’êtt’ ‘a jí ê prustètiche (supplementari), ca paretteno quase ‘a carta-cravone (fotocopia) d’’e nuvanta minute regulamentare cu juve n’ata vota annante e ssempe cu ‘o tracchiuso e ppareggio d’’o Napule addiruttura ô 118° e ssempe cu ‘o Pipita ca ‘a terra, ‘mmiezo a dduje juventine, futtette a bbuffonno ca però primma era stato capace ‘e fermà ddoje cunchiusione periculose d’’e cuane. ‘Nzomma a cunte fatte nun avastajeno manco ‘e prustètiche (supplementari) e ffove nicessaria ‘a bonafficiata (lotteria) d’’e ricure ca, cu ‘nu granne Rafiluccio, premiaje giustamente ‘o Napule ntussecanno ê telecroniste d’’a RAI, Tardelli,Marotta, Agnelli e Allegri. Comme se sape, ‘o Signore nun pava ô sapato e ccu dduje anne ‘e ritarde, Pichino fove vennecato!’A Maronna s’è vista! Passammo ê ppaggelle: RAFAEL 8.5 Aspettaje ‘e ricure pe ffarese valé addivintanno uno d’’e prutacuniste d’’a serata. MAGGIO 6- Appressuraje (spinse)cu ddecisione ‘ncopp’â curzia soja,pure si cu pocu zuco, quase comme ê tiempe bbelle ‘e ‘na vota. ALBIOL 5,5 ‘Na fessaria ‘nnaccasione d’’o primmo stuco (gol) d’’o tracchiuso.Ma po se repigliaje e tutto summato tenette ‘o campo decentemente. KOULIBALY 5,5 ‘Ncullabburazziona cu Albiòllo rijalaje ’o primmo stuco (gol) ô tracchiuso.Ma po se riscattaje a ll’arrancua (ripresa) fermanno ‘nu tiro, a bbotta sicura, ‘e Vidallo.È gguaglione e ppo’ ssulo migliurà! GHOULAM 6 Appressuraje (spinse)cu cuntinuità e ppricisione ‘ncopp’â curzia soja. LOPEZ 5,5 Miezu punto mancante pe cchella sciaurata fessaria ‘e mannà ‘o pallone arreto ‘mmece ca annante; p’’o riesto fove priciso e urdinato ‘mmiez’ô campo. (dô 46°INLER 6 Dette cchiú cualità ô centrocampo d’’o Napule.) GARGANO 6 Facette chello ca sape fà cumbattenno cu ccegna (grinta) e ‘urostía (determinazione) a ccentrocampo. CALLEJON 5,5 Se magnaje n’ accasione retissante (clamorosa) a ll’arrancua (ripresa); cupuliaje (dialogò) a mmestiere cu ‘e cumpagne, ma sbagliaje ‘o ricore! HAMSIK 6.5 Jucaje overamente bbuono pe quase tutt’ ‘o tiempo ca restaje ‘ncampo (incontro), ma êsse avut’’a essere cchiú priciso sotto porta. (dô 34°MERTENS 5.5 Nun trasette bbuono dint’ô juoco e ppe ghionta ‘e ruotolo sbagliaje ‘o ricore.) DE GUZMAN 7 Dicisivo ‘nnaccasiona d’’o primmo stuco d’’o Pipita cu ‘na jucata e n’ajuda (assist) ‘a veru sciantiglione (fuoriclasse). (dô 105°JORGINHO 6 Trasette pe ttirà ‘nu ricore, ma nun ce riuscette; p’’o riesto quacche buonu palleggio ‘mmiez’ô campo.) HIGUAIN 8.5 ‘E n’ata categoria! Signaje dduje stuche (gol) uno ‘e capa, n’ato ‘e pere ‘a granne sciantiglione (fuoriclasse) e artigliero (bomber) ‘e razza; cugliette pure ‘nu palo cu ‘na jucata ‘e classe e accumpagnaje p’’a mana ‘a scuatra nfi’ ê ricure. All.: BENITEZ 7 ‘O rre ‘e coppa! ‘A scuatra soja nun venette maje meno pe ttutte ‘e cientovinte minute ‘e juoche e purtaje ‘mpuorto ‘a supercoppa cu ‘na nichessa (vittoria) d’’o core e dd’’a cegna (determinazione).ca purtaje ‘a firma ‘e don Rafele. Arbitro: VALERI 6 Pigliaje quacche zzarro, ma fessarie e ffetenzie grosse nun ce ne facette! A ‘stu punto che dicere? Sulo ca tutte avimm’’a essere suddisfatte ‘e comme sta fenenno ‘o duimilaquattuordice: vattere ‘na scuatra forte comme ‘a juve è assaje bello...e ce mette ‘mpace cu ‘o Cielo e ‘o munno! E mmo putimmo pre jí a festiggià scialanno cu vermicielle a vvongole, mussillo fritto, capitune, vruoccole, ‘nzalata ‘e riforzo, scioccele,roccocò,struffole,mustacciuole,susamielle, raffiuole e ppasta riale. Mo sí ch’è Natale! Alleluja, alleluja, alleluja. Â faccia d’’a R.A.I. e de chi ce vo’ male! E ccu cchesto ve saluto, ve faccio ll’avucurie mieje e ssi dDi’ vo’ ce sentimmo a ll’anno nuovo! R Bracale Brak