NAPOLI – PARMA (18/12/14) 2 A 0 ‘A VEDETTE ACCUSSÍ

NAPOLI – PARMA (18/12/14) 2 A 0 ‘A VEDETTE ACCUSSÍ Ce vuleva, guagliú, ‘nu poco ‘e bbona sciorta e ffinalmente ajeressera ‘o campiunato ce permettette ‘e vedercela ‘ncasa cu ll’urdema d’’a classe e nun c’êttem’’a sfurzà manco assaje pe mmetterce dint’â sacca ‘a nichessa (vittoria) ca p’’o mumento ce cunzente ‘e metterce ‘nsulitaria ô terzo posto ‘ncrassifica, nichessa ca rappesentaje ‘nu bbuonu efudío (viatico) p’’o scontro ‘e llunnerí ca vene quanno a dDohà ce jammo a gghiucà ‘a Supercoppa contr’â juve.Certo me fósse piaciuto ‘e cchiú si ‘o Napule avesse fatto ‘na sbrasata ‘e quatto, cinche stuche (reti), ma cuntentammoce d’avé vinciuto pe ddoje a zzero senza fà ‘e valle ‘ncopp’â mmunnezza, soprattutto pecché – doppo d’’e chianette pigliate dô Milanno – era nicessario turnà a vvencere e si ajeressera ce avastaje sulo ‘o primmo ajone pe ffarlo, sentite a mme, meglio accussí! Passammo ê ppaggelle: RAFAEL sv:Nun tenette niente ‘a fà e ffove furtunato quanno ‘na palla malegna ‘e Lodi cugliette ‘o palo vascio, lle sbattette ‘ncopp’ê spalle e gghiette fora. MAGGIO 6: ‘Na diacunale azzeccata e funnamentale ô pprincipio ‘e fullè (gara) pe llevà a cCassano ‘a pussibbilità ‘e mettere paura a Rafiluccio; po finalmente ‘nu bbuonu cruzzo (cross) ‘e mancina pe ll'uno a zzero ‘e Zapata; p’’o riesto urdinaria amministrazziona. HENRIQUE 6: A ccunte fatte nun êtt’’a marcà a nnisciuno visto ca ‘o Parma nun teneva n’attaccante overo.’Nzomma ‘o fullè (gara) justo pe ritruvà cunfianza (fiducia). BRITOS 6: Comme p’’o cumpagno ‘e sezziona, però ll’ècchese bbulugnese poco mancaje ca signasse! GHOULAM 6,5: Bravo cu ‘nu paro ‘e chiusure durante ô primmo ajone, ma assaje attiento pure a ll’arrancua (ripresa) e pPalladino ca ‘nturniaje dê pparte soje,êtt’ ‘a fà acqua dâ pippa. GARGANO 6,5: Facette chello ca sape e ppo’ ffà muvennose ‘mperpetuo e ccu ‘e soliti prane (errori) a ppalla ‘nfra ê piere.Penzo però ca tutto summato ‘na maglia ‘e titulare p’’a Supercoppa se ll’ammeretasse. Chi sa’ che ne penza don Rafele... DAVID LOPEZ 6: Se piazzaje a ccentro facenno ‘nu bbuonu culaturo (filtro), ma spisso rallentaje ll'azziona. Nun se po’ avé tutto dâ vita! MERTENS 6: ‘O ricore nun ‘o tiraje troppo bbuono, ma ‘o stuco arrivaje sinamparco (comunque).E menu male pecché ‘o guaglione êv’’a ritruvà cunfianza (fiducia) dint’ê mezze suĵe.Sperammo ca ggià da llunnerí ca vene turnasse a essere ‘o jucatore petillante (frizzante) d’ ‘a passata tempurata (stagione)! ( dô 65° DE GUZMAN 6: Sempe presente p’appressurà (spingere) soprattutto a dritta e ddispunibbile a rriturnà pe ddà ‘na mana a ll’epata difenziva [in fase difensiva]). HAMSIK 5,5: Me fósse aspettato ‘e cchiú ‘a Marekiaro ca ‘mmece se dimustraje ‘o solito jucatore a mmiezu servizzio ‘e ll’urdimi tiempe tuccanno tanti pallune, ma senza cacciarne zuco. CALLEJON 6: Miezu punto ‘e cchiú p’esserse ‘mmentato ‘o sumbrero ‘ncopp’a Ggobbi ca lle fruttaje ‘o ricore d’’o doje a zzero, ma p’’o riesto sprecaje troppi pallune, signo d’’o mumento poco pusitivo d’’o spagnuolo. (Dô 78° JORGINHO sv ‘O vedette troppo miccio, sciupatiello e ssenza culore; fósse ‘o miedeco suojo lle facesse ‘na ricetta tutta carne ‘e cavallo e de lentuorno ‘na vutata e ‘na ggirata). ZAPATA 7: Oramaje ‘o matarazzo ‘e sbreglie nun è cchiú ‘na surpresa e ppure cu ‘o Parma dimustraje ‘e mmeritarese d’essere titulare: ‘O stuco suĵo fove ‘nu cuncentrato d’ ‘e cqualità soje d’ artigliero (d'attaccante d'area): putenza, cegna (grinta) e ccazzimma; p’’o riesto dimustraje ‘e saperce fà pure quanno partette ‘mprecressiona. (Dô 70° HIGUAIN 6: Trasette cu ‘o sanco a ll’uocchie cercanno disperamente ‘e turnà a ttruvà ‘a strata d’’o stuco perduto;manco ajere ce riuscette, ma vederlo accussí chino ‘e gulío (voglia) nun pote ca fà piacere. Me piacesse vederlo nchietta (in coppia) cu‘o matarazzo ‘e sbreglie ô posto ‘e Marekiaro.) ALL. BENITEZ 6: ‘E stima pecché ll'avverzario d’ajere fove accussí scarzo ca ‘a scuatra ‘e don Rafele avette vita facile; sinamparco (comunque) ‘e nuvanta minute d’ajere foveno ‘nu bbuono allenamento p’’o fullè (gara) ‘e lunnerí quanno m’aspetto ca ‘o Napule ce désse ‘a primma vera suddisfazziona ‘e ‘sta tempurata (stagione). ARBITRO: DI BELLO 6 Arbitraje a ll’ingrese, ma vedette tutto chello ch’êv’’a vedé! E ffermammoce cca. Si dDi’ vo’ ce sentimmo marterí ca vène, doppo d’’a trasferta p’’a Supercoppa, speranno ca ‘sta vota nun ce facesseno n’atu trave ‘e fuoco comme a pPichino.Staveti bbe’! R. Bracale Brak