NAPOLI - TRABZONSPOR [E.L.] (26/02/15) 1 A 0 ‘A VEDETTE ACCUSSÍ

NAPOLI - TRABZONSPOR [E.L.] (26/02/15) 1 A 0 ‘A VEDETTE ACCUSSÍ ‘Na furmalità guagliú, chisto fove ‘o fullè (incontro) d’ajeressera ô san Paolo contro ê turche d’’o Triccabballacchesporro o comme cacchio se chiamma. ‘Na furmalità, ‘nu bbuono allenamento ca se vincette facile e ssenza nisciuna preoccupazziona. Anze me fósse aspettato ca, doppo d’ ‘a sbrasata ‘e ‘na semmana fa a tTrebbisonda, ajeressera ‘o Napule avesse vinciuto cchiú llargo, ma nun succedette pecché chell’anema longa d’’o purtiere d’’o Triccabballacche se mettette cu ‘a panza e ccu ‘o penziero pe vencere ‘o dessaffío (la sfida) perzunale cu cCagliecòn(no) e mmannaggia a isso ‘a vincette e ppe quatto o cinche vote fermaje ‘e ccunchiusione ‘e Calletí levannoce ‘o sfizzio ‘e fà n’ata sbrasata ca ce fósse stata tutta visto ca pure ‘a scuatra d’’e ssiconne e tterze linie misa ‘ncampo ‘a don Rafele era assaje cchiú mmeglia ‘e chella, cumpleta ‘e tutte ‘e titulare, d’’e pellerine turche! E accussí c’êttem’ ‘a cuntentà ‘e vencere p’uno a zzero e i’ spero ca ll’ati stuche (gol) nun fatte ajeressera ‘e cuane (azzurri) s’’e ssongo astipate p’’o dessaffío (la sfida) ca a tTorino ll’aspetta dummeneca a ssera ca vene contr’â scuatra ‘e Ventura, contr’ô Torino ca nunn è n’uosso proprio facile ‘a rusecà. Ma chesto ‘o vvedimmo llunnerí ca vene. Pe mmo vedimmo ‘e ppaggelle d’ajeressera: RAFAEL 6,5: Turnato titulare doppo d’’a papera ‘e Palermo ‘ncampionato, ajeressera facette ‘o duvere suojo;dicisiva ‘a parata ‘ncopp’â cunchiusione ‘e Zengínno ô finale d’’o primmo ajone (primo tempo), quanno salvaje ‘o vantaggio cano (azzurro). MESTO 6-: Partette titulare dô primmo minuto doppo paricchiu tiempo e ffacette ‘a taraffella (compitino) soja lla a ddritta senza ‘mpiccio e ssenza ‘mpaccio e sse pigliaje pure ‘o sfizzio ‘e cercà ‘a porta ‘a luntano. Ma nun è mmestiere suojo e nnun ‘a truvaje; êsse fatto meglio a ppassarla chella palla! HENRIQUE 6: Miso ‘ncampo a ffà ‘a parte d’ Albiollo, mustraje carattere, bbona vuluntà e senzo d’’a pusizziona purtanno ‘mpuorto ‘na serata tranquilla e ssenza nisciuna sufferenzia (patèma). BRITOS 6: lLe capitaje ll’accunto (cliente) cchiú scuonceco e ppericuloso: Cardozo,ma isso lle mettette ‘a musarola cu ‘e bbone o cu ‘e ttriste e nun lle cunsentette maje ‘e spaventà a rRafiluccio, ‘o prevetariello. GHOULAM 5,5: Miezu punto mancante pecché cu ttutto ca dint’â camma (zona) ‘e cumpetenza soja nun ce foveno quase maje prubbleme, isso preferette rummané vascio senza appressurà (spingere) comme êsse pututo fà. JORGINHO 5,5: Miezu punto mancante pecché pure jucanno comme lle piace a isso, senza pressiona(pressing) ‘e ll’ avverzario ‘ncopp’ô cuollo e ccu tantu spazzio annanze pe puté avanzà e allargà ll’azziona, dê piere suoje nun partetteno pallune ‘nteressante! INLER 5,5: Titulare comme ‘na semmana fa, ‘sta vota sbagliaje quacche ppasiglio e nun se vedette ô lémmeto d’’a camma turca.Che peccato! MERTENS 6,5: Miezu punto ‘e cchiú pe ppremio ‘e chillu lanzo ‘e cinquanta metre a ttaglià ‘o campo pe gghí a ppezzecà a cCagliecònno ‘nnaccasione ‘e ll'uno a zzero. P‘’o riesto solita atalossa (prestazione) allera e friccecosa. DE GUZMÁN 6,5: Miezu punto ‘e cchiú pe ppremio ca, doppo tanti caspillagge (sprechi) ‘e ll’urdimi tiempe, finalmente centraje ‘a porta sfruttanno ll’accasiona capitatele.Po, ma forze pure pecché ‘e turche foveno poca cosa, partecipaje sempe attivamente ô juoco accussí comme vo’ don Rafele. ( Dô 69° GABBIADINI sv) CALLEJÓN 6-: Miezu punto mancante pecché pure ‘mpignannose e ffacenno ‘nu fullè (gara) a ttutto campo, currenno comme a ‘nu pazzo sotto e ‘ncoppa lla a ddritta, perdette sistematicamente ‘o dessaffío (sfida) cu ‘o purtiere Arikanno ca pe cquatto vote lle dicette ‘e no. Pe gghionta ‘e ruotolo ce se mettette pure ‘o palo a ddicerle no; ‘nzomma ‘nu periodo ca tutto lle va stuorto... à dda passà ‘a nuttata! (Dô 76° HAMSIK sv) HIGUAÍN 6: ‘E stima, pecché ‘o fullé (match) lle servette sulo comme ‘nu bbuonu allenamento pe ppripararse ‘nvista d’ ‘o dessaffío (sfida) cu ‘o Torino. (Dô 63° ZAPATA sv) ALL. BENITEZ 6,5: Mettette ‘ncampo ‘a scuatra d’’e ssiconne e tterze linie, facenno ‘nu granne rutizzio (turn-over)e sinamparco (comunque)riuscette a ttené sott’ô pacchero ‘o Trabzonsporro.Spero ca se ‘nventa coccosa pe ffà turnà a ffà fà a cCagliecònno ‘e ccose ca ‘o ggiuvinotto spagnuolo sape fà! Arbitro BEBEK 6,5 - Avette pochi accasione pe ssiscà e nun siscaje pure pecché ‘e falte (falli) foveno poche;avette po ll'accasione pe vedé bbuono e fà bella fijura e ffove quanno Atikco ‘a mettette dinto, ma partenno chiaramente ‘nnurzo’ecóse (fuorigioco) e isso annullaje. E bbasta accussí. Cu cchesto ve saluto e ssi ‘o Signore ‘o vvo’ ce sentimmo â prossima vota, doppo d’’o fullè ‘e dummeneca ca vene contr’ô Torino a tTorino, speranno ca ve pozzo cuntà bboni ccose. Staveti bbe’! R.Bracale Brak