DINAMO MOSCA - NAPOLI [E.L.] (19/03/15) 0 A 0 ‘A VEDETTE ACCUSS

DINAMO MOSCA - NAPOLI [E.L.] (19/03/15) 0 A 0 ‘A VEDETTE ACCUSSÍ Ajere all’ora d’’e ppastarelle (‘mmerz’ê sseje) ‘o Napule scennette ‘ncampo a mMosca pe ll’antraffa ‘e ricresso (incontro di ritorno) ‘e ll’uttave d’ E.L. e pe ddifennere ‘o tre a una ‘e ll’affarta (andata) e – casu maje pe mmigliuralo e passà ‘o turno qualificannose p’’e quarte. E cce riuscette, guagliù cu don Rafele ca mannaje ‘ncampo ‘a meglia furmazzione dispunibbile e ppure si fove custretto a ffà a mmeno ‘e Gargano e Koulibaly, facette turnà ‘ncampo Maggio a ddritta cunfermanno Ghoulàmmo chiammato a ffà ‘o straurdinario a mmancina cu Albiollo e Britòsso a ccentro mentre ‘mmiezo ô campo Lopezzo fove miso ‘nchietta cu gGiorgigno, facenno risciatà Inlerro doppo tre antraffe cunzecutive: alll’ attacco po, tenennose ‘mpanca Marekiaro e De Guzmanno dètte giustamente spazzio a Mertenso cu cCagliecònno e Gabbiadini a ddà manforte ô Pipita ca a ll’affarta (andata) êva fatto ‘o guappo cu ‘a Dinamo e ll’êva cunzignato tre ppurpette tre! ‘Nzomma comme ve stongo dicenno ajere a mMosca ‘o Napule, doppo nun saccio quantu tiempo cunquistaje, cu ‘nu pareggio pe zzero a zzero, ‘e quarte ‘e ‘na manifestazzione airupea comme ê tiempe bbiate ‘e Maradona; s’êsse pure pututo vencere e ppe tre o quatto vote ‘o Napule ce jette vicino senza però riuscirce; ma nun fa niente: ‘a cosa ‘mpurtante era ‘a cualificazziona e cchella nun mancaje comme nun mancaje ‘a riazziona â brutta antraffa (partita) cu ‘o Verona. Passammo ê ppaggelle: ANDUJAR 6,5 Nun avette fà cape d’angele, ma se facette apprezzà pe ccomme ascette auto, nun lassanno palla ê russe e ppe ccomme sbraitaje cu ‘e cumpagne, mettenno paura a ll’avverzarie! MAGGIO 5 – Miezu punto mancante pe ccomme sbagliaje ‘na cabbesera (colpo di testa) a dduje metre dô stuco (dal gol); p’’o riesto lle mancaje ‘a tase-antraffa (il ritmo partita) e se vedette. Spisso fove ‘nnattrasso (in ritardo), lassanno prairie (praterie) addereto a isso e ggià durante ô primmo ajone se facette ammuní comme a ‘nu fesso arresecanno ‘e restarce ‘ndiece pe tutt’ ‘o fullè (match). Una cosa bbona facette: chella ‘e farese stennere ‘nterra dint’â camma (area) russa, ma ll’arbitro ulandese nun vulette vedé. ALBIOL 6 – S’ ‘a vedette ‘e bbella cumbattenno cu ‘nu marcantonio comme Kuranyi, ma po riuscette a mmetterle ‘a musarola e ‘o terisco nun facette danno. BRITOS 6,5 Atalossa (prestazione) ‘e sustanza d’’o lungagnone uruguajano ca risultaje funnamentale nchiudenno sempe e spicialmente ô pprincipio ‘e ll’arrancua (ripresa) quanno ‘a Dinamo pruvaje ‘o sièjo (assedio): fove isso ca muraje ‘na periculosa cunchiusione ‘e Kokorínno. GHOULAM 6,5 - Chiammato a ffà ‘e straurdinarie a mmancina se vedette cchiú a ll’epata (in fase) difenziva ca uffenziva. Ma fove cchiú ‘mpurtante nchiudere ògne chesema (varco) ca dà ‘na mana a Mertenso.E ll’algerino ‘o ffacette. JORGINHO 6 - Migliurato a ppietto ‘e ll’urdemi asciute, facette tutto chello ch’êv’ ‘a fà; troppo bbello ‘o bbassurero (suggerimento) cu cchillu pallone sibbendo (filtrante) ca Cagliecònno mannaje a ffà ‘a bbarba ô palo luntano schiggiannolo. LOPEZ 6 - Sufferette quacche ppoco sulo quanno ‘a Dinamo attaccaje ‘nforze, ma p’’o riesto mettette ordine e facette culaturo (filtro) ‘nnante â tràsera (difesa). GABBIADINI 6 Nun truvaje nè ‘o stuco (gol) nè ll’ajuda (assist) p’ ‘e cumpagne, ma sinamparco (comunque) ll’atalossa (prestazione) soja fove pusitiva soprattutto durante ô primmo ajone quanno purtaje palla partenno spisso cu ttassezza (velocità); a ll’arrancua (ripresa) se vedette cchiú ppoco. (Dô 71° HAMSIK 6,5 – Comme a ll’antraffa ‘e ll’affarta (andata) trasette súbbeto ‘nfullè (in partita), avasciaje ‘e tase (i ritmi) e furnette a cCagliecònno ‘na palla d’oro ca però ‘o spagnuolo sciupaje) José Maria CALLEJON 5,5 Miezu punto mancante pecché nun se ponno jettà a mmare tanti accasione; n’avette una sapurita durante ô primmo ajone e ‘a sciupaje mannanno ‘o pallone còmmeto a ffà ‘a bbarba ô palo luntano schiggiannolo. Facette ‘e peggio a ll’arrancua (nella ripresa),quanno lle mancajeno ‘e fforze e ttiraje chianu chiano ‘a duje passe sciupanno ‘o bbassurero (suggerimento) ‘e Marekiaro. N’attaccante nun po’ prermetterse cierti fessarie! MERTENS 7 Tutto summato, ‘o meglio d’’e suoje, ce mettette corza, cegna (grinta) cu tutt’ ‘o repertorio ‘e ricate (dribbling) finte e ttire e ssulo ‘o travesagno (traversa) lle fermaje ‘nu pallone a ggiro destinato dint’ô sette luntano.Peccato! (Dô 64° DE GUZMAN s.v. Ce mettette tanta corza, ma ne cacciaje pocu zuco senza maje riuscí a ddà sustanza a ll’azziona.) HIGUAIN 5 ‘Nu punto mancante pecché si a ll’antraffa (partita) d’affarta (andata) era stato ll’erdo (eroe) d’’a situazziona, ajere nun riuscette a llassà ‘o signo, anze spisso druigliaje (dormicchiò) nun sfruttanno maje a dduvere quacche ppallone avuto. All’arrancua (ripresa) addirittura doppo d’esserse vippeto ‘o purtiere e averlo miso assettato ‘nterra sciupaje tutto cosa cu ‘nu pallunetto sballato addó teneva ‘na porta spalancata annante! ‘O Pipita è ‘a curona d’’a capa mia ‘ma ‘sta fessaria nun ce ‘a ppozzo perdunà! (Da ll'81° ZUÑIGA s.v.) All. BENITEZ 7 - Primmo ‘ntrenatore (allenatore) ‘e ll'ebbroca DeLa a ccogliere ‘e quarte ‘e ‘na cumpetizziona airupea: Mazzarri, ‘nCiampionsa, era stato eliminato primma. Mettette ‘ncampo ‘na scuatra cumpatta e accorta,arresecanno poco o niente e ggestiunanno (gestendo) a mmestiere ‘o tre a uno ‘e ll’antraffa (partita) d’affarta (andata). arbitro: NIJHUIS (ulandese) 5,5 Addó vedette e addó cecaje e ppe furtuna vedette bbuono ca pe ddoje vote ‘a Dinamo signaje cu dduje jucature chiaramente ‘nnurzo’ecóse (fuori gioco), ma po lle mancaje ‘o curaggio ‘e siscà ‘nu ricore pe ‘nu fóte (fallo) ‘ncuollo a mMaggio ca sulo chella cosa bbona facette! E bbasta accussí. Cu cchesto ve saluto e ssi ‘o Signore ‘o vvo’ ce sentimmo â prossima vota, doppo d’’o fullè (match) casalinco ‘e dummeneca a ssera ca vene contro a ll’Atalanta speranno ca [corna facenno] ve pozzo cuntà bboni ccose. Staveti bbe’! R.Bracale Brak