NAPOLI – SAMPDORIA (26/04/15) 4 A 2 ‘A VEDETTE ACCUSSÍ

NAPOLI – SAMPDORIA (26/04/15) 4 A 2 ‘A VEDETTE ACCUSSÍ Finalmente, guagliú, finalmente! Ajere pe ‘na grama vota tutte jucaje a ffavore d’’o Napule e ògne scuatre ce facette ‘nu cresemisse ‘e contratiempe: ‘a vecchia zoccola abbuscanno dô Toro, ‘a scuatra d’’o pupone e de monzú garsià facennose paccherià ‘a ll’interre, e cchella d’’o pappavallo ‘e lotito facennose fermà ‘ncasa dô Chievo ‘ncopp’a ll’uno a uno...Pe nu parlà d’ ‘o Milanno (paccariato a Udine) e d’’a Fiorentina ca, ‘ncasa soja fove scummata ‘e sango dô Cagliare pe ttre a uno. ‘Nzomma ajere pe ‘na grama vota tutte jucaje a ffavore d’’o Napule e ffinalmente ‘o Napule, ‘na grama vota, nun ‘a perdette ll’accasione e asfardanno ‘a scuatra d’’e lupe ‘e mare cu ‘a pippa ‘mmocca cunzulidaje ‘o quarto posto ‘nsulitaria rusecanno punte a rroma, lazzio e juve. Finalmente! Ajeressera ô san Paolo tutto jette a cciammiello e ccu ttutto ca ‘ntribbuna nce stevano assettate paricchi cestarielle, se vincette e sse vincette bbuono, pure rijalanno ‘nu sfurtunato tuterma (autogol) ‘e vantaggio â scuatra d’’o zincaro ! Meglio tarde ca maje..., ma che nnervatura a ppenzà a ttutt’ ‘e punte jettate p’’a via! Ma oramaje è gghiuta accussí e ppacienza! Passammo ê ppaggelle: ANDUJAR 6 Serata tranquilla.Avette recogliere sí, ê spalle soje ‘e pallune ‘e dduje stuche (gol), ma nun foveno sfarma (colpa) soja: ‘o primmo fove ‘nu tuterma (autogol) sfurtunato d’Albiolle e cchill’ato ‘nu tiro ‘a fora ‘e Murielle, ch’isso nun vedette ‘e partí. P’’o riesto urdinaria amministrazziona. HENRIQUE 6,5 Atalossa (prestazione) sustanziosa dinto a ttutt’ ‘e ddoje ll’epate (fasi): adderete fove uno d’’e cchiú ppusitive e annante, cu ‘nu paro ‘e bbassurere (suggerimenti) geniale, dimustraje ‘e tené ‘o pere brasiliano. ALBIOL 5,5 ‘Nnaccasione d’’o tuterma (autogol) fove overo sfurtunato,ma po se repigliaje pure si cchiú ‘e ‘na vota se truvaje fora pusizziona. BRITOS 6- Partette pur’isso cu ‘o pere sbagliato facennose [‘nnaccasione d’’o primmo stuco d’’a Sampedoria] piglià dâ tassezza (velocità) d’Ederre ca se facette a isso e a gGhoulamme. Ma po chianu chiano se repigliaje e ffacette ddoje o tre bboni cchiusure. GHOULAM 5,5 All’ epata difenziva (in fase difensiva) dimustraje cchiú ‘e ‘na febblessa (pecca) soprattutto durante ô primmo ajone sotto a Ederre, ma quanno appressuraje (spinse) stette ‘int’ô ssuojo!. JORGINHO 6- Tutto summato ll’atalossa (prestazione) soja nun fove malamente, pure si êsse pututo fà ‘e cchiú; se truvaje bbuono ‘nchietta cu Lopezze, sustataje (impostò)e urtizzaje (verticalizzò) cu pperzunalità. David LOPEZ 7 Granna atalossa d’’o spagnuolo ca – finalmente! – ‘mpignaje a vViviano dànno ‘na mano a ll’attaccante, jucaje a ttutto campo difennenno e ripartenno. Se chiammaje ll’applavuse d’’o san Paolo quanno ‘on Rafele ‘o chiammaje fora. (Dô 76° GARGANO 6 ‘e stima) CALLEJON 6,5 Tiraje, currette, cruassaje (crossò),’nzomma ce pruvaje sempe, pure si nun fove assaje cuncreto. Mesciabbe nun ‘o fermaje maje. GABBIADINI 7 – Segnaje ancòra e ‘o stuco suojo fove ‘e chilli pesante pecché rimettette ‘nnantraffa (in partita) ‘o Napule.È overo ca ‘ncopp’ô stuco suojo, Viviano lle dette ‘na bbona mana, facennose passà ‘a palla ‘mmiez’ê ccosce,ma ‘o pasiglio (passaggio) ca mannaje ‘mporta ô Pipita fove rrobba ‘a fà arrecrià! (Dô 66° HAMSIK 6,5 Trasette súbbeto ‘nnantraffa (in partita). ‘Mpignaje a vViviano e se prucuraje ‘o ricore, dimustranno d’attraverzà ‘nu bbuonu mumento.) INSIGNE 7,5 – Lorenzigno fove cunvincente cu n’atalossa carativa (generosa)[pure ‘ndifesa]ca riuscette addirittura a emuzziunà soprattutto pe ccomme cercaje e truvaje ‘o stuco (gol) a sseje mise ‘a ll’accidente (dall’infortunio) cosa ca ‘o passiunaje (commosse) nfi’ ê llacreme! Gonzalo HIGUAIN 8 Tirato a llucido! Ch’attaccante, che ghiucatore! ‘O primmo stuco (gol) fove chillo ‘e ‘nu vero artigliero (bomber), ‘a dedica e ll’abbrazzo a mMertenso, chille d’ommo-scuatra; ‘ncopp’ô ricore fove friddo, priciso e ddiciso; p’’o riesto mettette ‘mmostra tutto ‘nu repertorio fatto ‘e sponne, sustentazzione (appoggi), pasiglie tassuse (scambi veloci) e cunchiusione cuntinue; ‘nzomma ‘nu ciclone (uragano) ‘ncopp’â scuatra d’’o zincaro: 16 stuche ‘ncampiunato, 50 cu ‘a maglia luvarda (azzurra). (Da ll’82° ZAPATA sv) ALL. BENITEZ 7,5 – Vincette ancòra e cchi vence ave sempe raggione; ‘o Napule, ca è ‘ncorza p’’o siconno posto e ppe ll’ E.L. quanno attacca diverte e fa paura.Ajere don Rafele putette cuntà ‘ncopp’a ‘na scuatra ca ‘o tteneva e ‘ncopp’a ‘na truppa aunita ca bumbardaje ‘a porta d’’a scuatra d’’o zincaro cu ‘a bbellezza ‘e vintuno tire. E scusate si è ppoco! l’arbitro DOVERI 5 ‘E poca stima, trattannose ‘e carta canusciuta abbituato ‘ncampiunato o ‘ncoppa itaglia a trattà ‘na chiaveca ‘e scuatre meridiunale soprattutto cu cartelline jalizze (gialli) ad capocchiam. Cosa ca puntualmente succedette ajere pure si m’aspettavo pure ‘e pejo ‘a ‘stu guaglione, ‘mpiacato [nun se sape ‘e che] vulterrano ‘e trentaseje anne! E cu chesto ve saluto e ce sentimmo, si dDi’ vo’, viernarí ca véne doppo d’’a trasferta ‘e ggiovedí a Empoli. E abbiàmmo a ffà corne! R.Bracale Brak . .