ROMA – NAPOLI (04.04.15) 1 - 0 ‘A VEDETTE ACCUSSÍ

ROMA – NAPOLI (04.04.15) 1 - 0 ‘A VEDETTE ACCUSSÍ E cche vuó fà bbona e ssanta Pasca guagliú?...Chi t’’o ddà?! Tengo ‘o vveleno nfi’ a ‘mpont’ô musso e ogge assettannoce a ttavula so’ ssicuro ca ce ‘ntussecammo tutto chellu bbene ‘e dDio ca ‘sta festa se chiamma! E ppecché? Pecché ajere a ll’ora d’’o tòrtano e d’’a ‘nzalata ‘ncappucciata a ll’Ulimpico ‘e roma ‘o Napule se facette vattere dâ scuatra ‘e monzú garsià e se ne turnaje â casa cu ‘na vranca ‘e mosche ‘mmano doppo n’antraffa (partita) ca fove tutto fummo e nniente arrusto! E cche supressata! Nunn’ è ppussibbile; i’ nun ce pozzo credere. Cheste so’ ccose ‘e pazze: ‘a roma meza vota tiraje ‘mporta e ssignaje, mentre ca ‘o Napule sprecaje ddoje o tre accasione cu Cagliecònno, De Guzmanno, Mertenso e gGabbiadini e nun riuscette nun dico a vvencere, ma manco a ppariggià ll’antraffa (partita) chiave ‘e tutt’ ‘a tempurata (stagione). Vuje capite? Cheste so’ ccose ‘e pazze! E vvenimmo ê ppaggelle: ANDUJAR: 5 Nun facette niente pe ttutta ll’antraffa (partita) e rrumanette fremmo pure ‘ncopp’ô tiro ‘e Pjanicccio senza manco ffà vvedé ca tentasse coccosa. MAGGIO: 5 Nun fove sempe puliero (lucido) quanno êtt’ ‘a difennere e sse vedette poco ‘nnante. ALBIOL: 6- Quacche sfregazzo (sbavatura) cca e lla, ma cumplessivamente mustraje bbona sicurtà (sicurezza) BRITOS: 6 A surpresa don Rafele ‘o preferette a cKoulibalý e ‘o difenzore uruguajano se facette apprezzà cu ‘nu paro ‘e chiusura a cciammiello. GHOULAM: 5 Ahia, ahia:lassaje sguarnita ‘a faja (fascia) soja e ‘a Roma sbluccaje ‘o risultato!E ffove sempe dê pparte soje ca ‘a scuatra ‘e garsià tentaje ‘e fà coccosa. D. LOPEZ: 5,5. Pe ffà, facette chello ca êv’ ‘a fà, spezzanno ‘o juoco ‘e ll’avverzarie e cce mettette ‘o fisico sí, ma poca qualità; ‘a sfarma (colpa) cchiú ggrossa soja fove chella ‘e nun gghí a nchiudere ‘ncuollo a Pjaniccio ca signaje tiranno libbero e ffranco a bbotta sicura. JORGINHO: 5 Né ccarne, né ppesce; braduso (lento) aizaje cchiú porvere ‘e ll’ate,nun cupuliaje (dialogò) cu ‘e cumpagne e puntualmente fove scavalcato dê lanze luonghe d’’e difenzure e suvrastato da ll’avverzarie. CALLEJON: 5 N’ata antraffa (partita) senza acute e ccu ‘na granna accasione sciupata. Ma che lle sta succedenno a pPeppe ‘a ‘nguenta? (Dô 61° GABBIADINI: 5,5. Subbeto periculuso cu ‘nu bbellu tiro a vvolo ca De Santisso sventaje; però po sbagliaje ogni tipo ‘e sustentazziona (appoggio). MERTENS: 6,5. Troppo ‘nnammurato d’’o pallone, ê vvote ruvinaje demmarragge (spunti) ‘nteressante e spurte(accelerazioni) periculose tentanno sempe ‘na cosa cchiú d’’o nicessario e perdette ‘na bbona accasione cunchiudenno chianu chiano! DE GUZMAN: 4,5. ‘A fissazziona ‘e don Rafele!N’êsse ‘ncarrata meza soprattutto a ll’epata ‘e sustentazziona (in fase d’appoggio).Perdette ‘na granna accasione pe pariggià e p’’o riesto nun lle riuscette manco ‘e fà ‘o raccordo ‘nfra ‘e sezzione (reparti) Sustituito troppo tarde e ccu uno poco adatto â plantiglia (al ruolo) (Da ll’ 81° INSIGNE: sv) HIGUAIN: 6. Pure essenno ‘e tutt’ata pasta d’’e cumpagne e riaggenno e lluttanno sulo contro tutte, lle mancaje ll’aragnazzo (sfregio) dicisivo pecché nun ll’ arrivajeno rifurnimente! (Dô 76° ZAPATA: s.v.) All.: Rafa BENITEZ 5 Bbrutta scunfitta pe ‘nu Napule ca nun fove puliero (lucido), ca aizaje troppa porvera e nne facette troppu fummo cu nniente arrusto; pe pparta soja don Rafele sbagliaje furmazzione nfessennose cu De Guzmanno e ffove tardivo cu ‘e sustituzzione. Peccato! arbitro RIZZOLI 4 Vecchia scadente carta canusciuta: ‘na fetenzia ‘nternazziunale, anze mundiale, isso i ‘e cullabburature suoje.Siscaje sempe ‘ndanno d’ ‘e cuane (azzurri) caputianno falte (falli); nun assignaje ‘nu ricore sacrusato a Ccagliecònno stiso ‘ncopp’â linia d’’a camma(area) ‘e ricore rumanese [e ‘a linia – ve ricordo ca fa parte d’’a camma (area)]: isso ce dette sí ‘a timmurría (punizione), ma ce pigliaje p’’o prozo spustanno ‘a palla fora d’’a camma; cose ‘e pazze! Pe gghionta ‘e ruotelo fove sempe ‘e maneca larga cu ‘e cammurriste rumanise ca mazzulajeno ‘ê guagliune ‘e don Rafele senza ca isso dicesse maje niente e soprattutto fove ‘e maneca larga cu De Rossi sparagnannole ô pprincipio ‘o siconno cartellino jalizzo (giallo) pe nun ghiettarlo fora! Primma ‘e nchiudere e de salutarve, cunzentiteme justo ddoje parole pe ddicerve tutto ‘o schifo mio p’’e core contro ê napulitane e p ‘’e strisciune uffenzive contro â mamma ‘e Ciro Esposito esposte a ll’ Ulimpico, durante ll’antraffa(partita), strisciune ca nisciuna autorità facette levà, mentre [che nnuvità!] dâ curva partette ‘a solita canzona:(«Vesuvio lavali col fuoco»); naturalmente rizzoli e socie nun vedetteno nè ssentetteno niente e se guardajeno bbuono ‘e suspennere ll’antraffa (partita) comme ‘mmece êsse avut’ ‘a fà! Ma se sape: rizzoli abbacca cu cchi vence e a ‘stu mumento ‘o viento sta ‘mpoppa a rumanise e llazziale. Pacienza! E cu cchesto ve saluto e si ‘o Signore ‘o vvo’ ce sentimmo â prossima vota, ca me pare avesse ‘a essere ggiovedí ca vene. Staveti bbe’! Bbona Pasca ô stesso cu ‘na bbona saluta! R.Bracale Brak