JUVENTUS – NAPOLI (23/05/15) 3 A 1‘A VEDETTE ACCUSSÍ

JUVENTUS – NAPOLI (23/05/15) 3 A 1 ‘A VEDETTE ACCUSSÍ Che mmunnezza e cche nnervatura , guagliú! È overo ca nnun me ne fotte niente si â tempurata (stagione) ca vène nun ghiammo ‘nCiampionsa e fforze nce attocca ancòra ‘na vota ll’E.L., ma è ggrossa ‘a collera p’avé perzo e mmalamente contr’â vecchia zoccola janca e nnera [ca nun tène cchiú spazzio ‘ncopp’â maglia, addó metterese scudette, stelle e stelletelle] e ca ajere ‘ncasa soja êsse pure pututo perdere si sulo ‘e cuane [ajere ancòra, e sperammo pe ll’urdema vota, cu cchella fetenta jettatoria divisa ‘nu ginso e ‘na pugnetta ncuollo] avesseno jucato cu ‘nu poco ‘e cegna (grinta) e ccazzimma... ‘Mmece chi t’’o ddà, chi? Nun tenetteno nè ccegna (grinta) nè ccazzimma... dimustranno ‘e nun essere scugnizze, ‘e nun avé maje jucato ‘mmiez’ â via, arreto â Miscelenne, nè ‘ncopp’ô Maciello...Dimustrajeno d’essere tanti signurine ‘e bbona famiglia cu ‘e cazette ‘e seta i ‘o ttè ê ccinche dint’ê ttazze ‘e purcellana ‘e Capemonte, addó ca a nnuje ce fósseno servute maste fravecature e mmeze cucchiare cu ‘e mmarenne dint’ô cuzzetiello ‘e palatone! Figurateve ca p’accummincià a vvedé ‘nu poco ‘o Napule ‘e jucà êttemo aspettà ll’arrancua avenno nchiuso ‘o primmo ajone (primo tempo) ‘nsotto ‘e ‘nu stuco (gol) rijalato pe ‘na fessaria ‘e Gulammo ca lassaje trasí dint’â camma nosta a pPereyra libbero e ffranco ‘e culpí ‘a palla a bbotta sicura dint’â primma e unica accasiona capitata â bbanda juventina. E nnun è ca ce jette meglio a ll’arrancua (ripresa) pecché ‘na vota afferrato p’’e rrecchie ‘o pareggio cu Lopezzo [lesto a rrepiglià ‘a respinta ‘e Bbuffonno quanno chisto paraje ‘o ricore tirato malamente da Lorenzigno] perdettemo ddoje o tre accasione pe ppassà ‘nvantaggio e rijalajemo ‘o siconno e tterzo stuco (gol) â bbanda juventina cu n’ati ddoje fessarie noste: ‘a primma d’Albiollo ca se facette superà ‘mtromma ‘a Sturaro e ‘a siconna ô finale quanno Britosso riaggenno a ‘na pruvucazziona ‘e chillu figlio ‘e coperativa ‘e Morata, lle dètte ‘na capata ‘nfaccia e se facette jettà fora cuncedenno ‘o ricore ca Pepe mettette a ssigno cu ‘na bbotta centrale.E accussí jette a fferní ca perdettemo n’antraffa (partita) ca s’êsse avut’’a vencere cu ‘a speranza d’arrivà a cchillu terzo posto e ca ‘mmece cu ‘a prossima certa pastetta ‘nfra Roma e Llazzio nun vedimmo manco cu ‘o cannucchiale! Votta a fferní ‘stu campiunato, votta a vvutà fuoglio! Paggelle? E cche ppaggelle jate ascianno cu chisti chiare ‘e luna, cu chest’ata delusione? Perdettemo malamente e mmecco tre a ttutte quante da don Rafele a ll’urdemu guaglione ‘e macazzino, arbitro cumpreso, soprattutto p’’o dispiacere ca me detteno p’avé ccunzentite a ttanti ffetenzie ‘ncopp’ê bbemate (spalti) ‘e sfotterce cantanno a sfuttò Oj vita, oj vita mia! ‘Nu tre a pparte po nce ll’aggi’ ‘a cunzignà a cchella faccia ‘e cestunia ‘e bbuffonno ca ajere ògne ppalla ca pigliaje sbuffava guardannose attuorno cu cchell’aria ‘e pataterno quase vulesse dicere:Tenite mente che ddio ‘e favore ve sto facenno a gghiucà, addó me ne putesse stà ‘nzieme cu ‘a cummara mia! E ccu chesto ve saluto e si dDi’ vo’ ce sentimmo doppo d’’o scontro casalinco contr’â scuatra d’’o pappavallo ‘e lotito, scontro ca mo comme a mmo nun conta cchiú ‘nu cacchio comme fenesce fenesce! Staveti be’. R.Bracale Brak