NAPOLI – MILAN (3.05.15) 3 a 0 ‘A VEDETTE ACCUSSÍ

NAPOLI – MILAN (3.05.15) 3 a 0 ‘A VEDETTE ACCUSSÍ Ajeressera guagliú granna nichessa (vittoria) napulitana ô san Paolo, ca servette a ddà ‘na risposta ê ttanti ciucciuvettole[comme a gGentile, a bBergomi e a fFerrara] ca mettetteno ll’uocchie lloro sicche ‘ncuoll’ô Napule, ma ca ajeressera nun ce putetteno pecché ‘a nichessa arrivaje, ‘mpurtante e nicessaria cunquistata ‘ncapo ‘e ‘na sittantina ‘e minute senza zuco e ccunnimma, ma ca nun foveno maje periculuse p’’o Napule ca ô nuvantesimo cunzignaje tre bbabbà a Inzaghi e ssocie e ssagliette a cinquantanove punte ‘ncrassifica rusecanno coccosa â scuatra d’’o pappavallo ‘e lotito e mantenenno ‘o passo ‘d’’a roma; ‘nzomma ‘na nichessa ch’ i’ cunzidero ‘nu bbuono efudío (viatico) p’ ‘o fullè (match) casalinco d’affarta (andata) d’ E.L. ‘e ggiovedí ca vene contr’ ô DNIPRO, antraffa (partita) ca s’à dda vencere e vvencere largo, senza piglià stuche (gol). ‘Nzomma,turnanno ô fullé (match) d’ajeressera, putimmo dicere ca ‘e cchianette pigliate a Empoli, ggià mise ‘e parte foveno sulo ‘na sbutecata pigliata ‘ncopp’â strata ca porta â Ciampionsa; ajeressera nun ce fove quase antraffa(partita) i ‘e cuane se ne vedetteno bbene ‘e ‘na scuatra ‘e sbandate e ssulo quacche pprano (errore) dint’a ll’urdemu pasiglio (passaggio) i ‘e pparate ‘e Diego Lopezzo salvajeno ‘o Milanno da ‘na paccheriata cchiú cauzante. Passammo ê ppaggelle: ANDUJAR SV: Serata tranquilla e ssenza prubbleme; unu periculo ‘na cabbesera (zuccata) ‘e Bonaventura ca però scardaje sulo ‘o palo esterno. P’’o riesto nun avette manco alluccà o chiammà ‘e muorte a cquaccuno! MAGGIO 6,5: Dètte granna sustentazziona (sostegno) a Cagliecònno a ddritta, currenno sempe senza fermarse. ALBIOL 6: Êtte sulo ‘a cuntrullà apprimma a dDestro e ppo a pPazzini, ca però nun ‘o detteno ‘mpiccio! BRITOS 6: Nisciuno lle dètte ‘mpiccio o prubbleme. GHOULAM 5,5: Pe bbona parte ‘e ll’antraffa (partita) nun facette quase niente; po – finalmente! – ô finale ‘ncarraje a cquaglià ‘na cosa bbona e, ttrasenno dint’â camma milanista, mettette ‘mmiezo ‘a palla ca fruttaje ‘o tre a zzero. Sperammo ca ggiovedí facesse ‘e cchiú! DAVID LOPEZ 5,5: Êtte fà poco a ll’epata (fase) difenziva, visto ca ‘o Milanno annante aizava porvere, ma pure a ll’epata (fase) prupusitiva nun se facette apprezzà tanto. (Da ll’ 84° LUPERTO sv: Benvenuto a ‘stu guaglione d’’o nuvantaseje). JORGINHO 5: Ancòra ‘na bucciatura; a ‘nu certo punto ‘ntribbuna divano ce steveno venenno ‘e riscenzielle e ce dimannavamo ‘ncoro: “Ma don Rafele quanno ‘o leva, quanno?” Se jucava diece contro a unnece e ‘o bbrasiliano nun fove crestiano ‘e fà vedé ‘a cualità ssoja, chiammannose fora e sbaglianno tanti pasiglie (passaggi) pure facile. (Dô 55° GABBIADINI 7: Comme sempe trasette e ffove dicisivo: se guadagnaje ‘nu ricore, ca Mazzoleni nun penzaje ‘e siscà, tiraje ‘mporta ‘nu tummolo ‘e vote e, seguenno a mmestiere ll’azziona, se facette truvà ô punto justo, ô mumento justo pe mmetere dinto ‘a palla d’’o tre a zzero ca nchiudete ‘a prattica.) CALLEJON 6: Êsse pututo fà ‘e cchiú, soprattutto a ll’epata (fase) ‘e cunchiusione, ma ll’avastaje d’essere ‘nu periculo cuntinuo crianno scumpiglio dint’ â tràsera (difesa) d’’e milaniste. HAMSIK 7: ‘E primmu lanzo se ‘mpezzaje dint’â camma piccerella, recuglienno ‘nu bbasurero (suggerimento) ‘E Lorenzigno e ubblicaje a dDe Sciglio a ‘na falta (fallo) ca lle custaje ‘o cartellino russo; po pe bbona parte ‘e ll’antraffa (partita) restaje a gguardà nsi’ ô 70° quanno se decidette a ppiglià ‘mmano ‘a situazziona e sbluccaje ‘o fullè(match) cu ‘na bbotta a mmesura ‘e dritta. INSIGNE 7,5: Uno d’’e poche d’’e suoje a stà veramente ‘nserata e a ssapé ‘mmentà coccosa e nne dette prova ggià dô primmo minuto quanno lanzaje Marekiaro a ppigliarese ‘o ricore o quanno mettette a cCallejon sulo annante a lLopezzo. ( Dô 69° MERTENS 6,5: Trasette ‘e ggenio e sse dètte súbbeto ‘a fà mettenno ‘ncopp’ô pere d’’o Pipita ‘a palla d’’o doje a zzero e mmannanno ô manicomio cchiú ‘e ‘nu difenzore.) HIGUAIN 6,5: ‘O tiempo ‘e farese ‘a croce e sbagliaje ‘o ricore e ‘sta cosa ‘o mettette fora d’antraffa (partita) pe paricchiu tiempo, tanto ca ‘ntribbuna divano ce penzavamo ca don Rafele ll’avesse levato. Quanno però Marekiaro sbluccaje ‘o fullè(match) pure ‘o Pipita se repigliaje, riuscette a ssignà ‘o stuco d’’o doje a zzero [sidicesimo ‘ncampiunato]e ffavurette (propiziò) ‘a terza signatura. All. BENITEZ 6: Miezu punto mancante pecché si pe parta soja ‘o Napule se cumplicaje ‘a vita e ddoppo d’essere rummaso cu uno ‘e cchiú nun riuscette a gghiucà cu ssultura (scioltezza), don Rafele tardaje a ffà quacche ccagno.Pe ffurtuna ca po, ‘o Napule – truvato ‘o vantaggio – se ne vedette bbene! arbitro MAZZOLENI 4: Po’ ppittà ‘o sole pe mme rummane chillo ‘e Pichino e ‘o ricore datoce doppo quaranta siconne nun serve a abbunarle ‘e diebbete ca tene cu nnuje, pure pecché nun ce ne siscaje n’ato ‘ncuollo a gGabbiadini e ppo comme a ‘nu trappano s’avutaje malamente dicenno, a mMaggio: “ Ma che ca**o vuoi?!” E cu cchesto ve saluto e, si ‘o Signore ‘o vvo’, ce sentimmo â prossima vota doppo ‘e ll’antraffa casalinca d’E.L. contro ô DNIPRO ‘e ggiovedí ca vene. Staveti bbe’! R.Bracale Brak