PARMA - NAPOLI (10/05/15) 2 A 2 ‘A VEDETTE ACCUSSÍ

PARMA - NAPOLI (10/05/15) 2 A 2 ‘A VEDETTE ACCUSSÍ Niente ‘a fà, guagliú! È ‘na jastemma menata ca ce à cuoveto malamente... Nemmeno ajere ‘o Napule sapette apprufittà d’’o sciuliamazzo pigliato dâ scuatra ‘e monzú garsià e da chella d’’o pappavallo ‘e Lotito e se ne turnaje dô Tardini ‘e Parma cu appena ‘nu punto addó ca êsse avuto ‘a vencere senza prubbleme si sulo avesse jucato cu ‘o sanco a ll’uocchie pe nuvantaquatto minute... ‘mMece chi t’’o ddà?! Chi t’’o ddà?! ‘O Napule rijalaje ll’intero primmo ajone â scuatra d’’e ducale, nun ghiucanno quase e ss’arricurdaje ‘e fà ‘o Napule sultanto a ll’arrancua (nella ripresa) quanno fove troppo tarde pe ppurtà a ccuttura ‘o zuco... Pe gghionta ‘e ruotolo ‘o purtiere nuosto penzaje bbuono ‘e fà â scuatra ‘e Donadoni ‘nu paro ‘e cresemisse ‘e contratiempo e ppigliaje dduje stuche (gol) uno cchiú ffesso ‘e n’ ato: ‘o primmo ascenno a scampulo ‘e mele cutogne ‘ncopp’a ‘nu tiro ‘e squina (angolo) senza cogliere ‘a palla e llassannola libbera e ffranca ‘ncopp’ô pere ‘e Palladino a pporta sguarnita, ‘o siconno lassannose fottere ‘a ‘nu tiro ‘e timmurría (punizione) ca isso battezzaje a ddritta addó ca chillo arrivaje forte sí, ma centrale e si isso fósse rummaso fermo a ccentro ‘e porta lle fósse arrivato ‘mbraccia còmmeto còmmeto. ‘Nzomma ajere ‘o Parma dduje tire ‘mporta facette e ffoveno dduje stuche. E ppe ddoje vote ‘o Napule êtt’ ‘a sicà (inseguire) ‘o pareggio. E ppe furtuna ca ce riuscette..., ma fove acqua ca nun levaje seta visto ca vincenno, comme s’êsse avut’ ‘a fà, se putevano rusecà quacche ppunto ê rrumane ‘nfunziona d’’o piazzamento Ciampionsa, ‘mmece ne rusecajemo uno sulo. Cose ‘e pazze! Ancòra nun ce pozzo credere ca ‘o Napule nun riuscette a vvencere! E cche saciccio! Chiste me fanno parlà sulo. Passammo ê ppaggelle: ANDUJAR 3: Nun dètte sicurezza e ccomme v’aggiu ditto tenette ‘ncopp’â cuscienzia tutt’ ‘e dduje ‘e stuche pigliate! HENRIQUE 5: Perdette cchiú ‘e ‘na brica (duello) ‘ncopp’â curzia ‘e dritta. ALBIOL 5,5: Sulo quacche sfregazzo (sbavatura) cca e lla. KOULIBALY 5: Soprattitto a ll’epata (in fase) ‘e plantamiento (impostazione) sbagliaje pure ‘e stuzze (appoggi) cchiú ffacile. STRINIC 5: Pruvaje a appressurà (spingere) ‘ncopp’â fascia mancina , ma ‘o ffacette cu ppoca duspèita (convinzione). INLER 5: Troppo braduso (lento) e ccumpassato. centralmente aizaje porvera e nun lle riuscette ‘e custruí juoco mettenno carna ô ffuoco. (dô 74°DAVID LOPEZ 6: Trasuto troppo tarde, dètte ‘nu bbuonu cuntribbuto ô finale. ) GARGANO 5,5:Cercaje ‘e fà chellu ppoco ca sape e ppo’ ffà ricuperanno pallune, ma nun sapette custruí juoco: nun è mmestiere suojo e sse vedette. ( dô 57°HIGUAIN 6: Trasuto troppo tarde se ‘mpignaje soprattutto a ll’epata (fase) uffenziva, ma Mirante se mettette a ffà ‘o fenomeno e lle dicette sempe no.Che peccato! ) GABBIADINI6,5: Signaje‘o stuco (gol) ‘e ll’uno a uno cu ggranna preccisione mettenno a ffrutto ll’ajuda (assist) ‘e Marekiaro. Cercaje ‘e ripeterse, ma ‘o tiro fove troppo centrale e mMirate jette a ccarna e mmaccarune! HAMSIK 6-:gGiustraje ‘ncopp’â trecquarte, ma facette poco: ‘e bbuono ll’ajuda (assist) p’’‘o stuco (gol) ‘e Gabbiadini e ll’avé cercato ‘nu paro ‘e vote ‘a porta, ma senza mettere paura a mMirante . MERTENS 6-: Nun convincette cchiú ‘e tanto ‘ncopp’â fascia mancina allimmeno nfi’ a cquanno nun te truvaje ‘o stuco (gol) e se ripigliaje ‘nu poco. DUVAN 5: Fósse stata ‘accasiona soja, ma nun ‘a sfruttaje e nun fove maje periculuso. ( dô 52°CALLEJON 6: Uno d’’e poche ca ce mettette cegna (grinta) sfresanno (sfiorando) pure ‘o stuco (gol) ) ALL. BENITEZ 5,5: Quanno nun se vence ‘a sfarma (colpa) è ppure d’’o trainèrro ca nun sprunaje assaje ê suoje cunvincennole a gghiucà cu ‘o sanco a ll’uocchie dô primmo minuto e pretennenno ch’êsseno avuto ‘ascí dô campo attaccate ê bombole d’ussiggeno. Ajere me parette troppo paciuso e cquase rassignato a cchello ca steva succedenno ‘ncampo. Sperammo ca cagna attiggiamento ggiovedí contr’ô Dnipro. arbitro GIACOMELLI 5 Troppo guaglione e ssenza sperienzia; grossi ffetenzie nun ce ne facette, ma se facette cartià dê ducale ca ‘nfra sceneggiate e pperdite ‘e tiempo assurtite d’’e nuvantaquatto minute d’antraffa (partita) ce ne facetteno jucà sí e nno ‘na uttantina e cchi nce refunnette fove ‘o Napule, a pparte po’ ca ‘ncopp’ô doje a ddoje nun cunzideraje vuluntario n’acatàsto (fallo) ‘e vraccio ‘ncamma ‘e ricore ‘e ‘nu ducale ca mo nun m’arricordo chi fove. ‘Ncunchiusione pozzo dicere ca chiste oramaje me fanno parlà sulo e sperammo ca fernesse ampressa ‘sta tempurata (stagione) primma ca mme magno fecato e ccuratella. Fraditanto però pe mme è mmeglio si DeLa da dimane e nsi’ a ll’urdema jurnata ‘e campiunato ‘e nzerra a ttutte quante dint’ê cCapopuccenelle cu ‘o ggranone sott’ ê ddenocchie. E cu cchesto ve saluto dànnove appuntamento,si dDi’ vo’, a vviernarí ca vene doppo d’’a trasferta ‘e ggioverí a cKievvo pe ll’antraffa (partita) e ricresso (ritorno) ‘e semifinale d’E.L. cu ‘o Dnipro,ca nun po’ essere ‘na passiata. Speriamo bbene e abbiammo a mmenà ‘o fflitto contro a ttutt’ ‘e cciucciuvettole, accumincianno ‘a chella péreta stelliata d’’a cummara ‘e bbuffonno, ca nun ne faccio ‘o nomme pecché porta jella sulo a nnummenarla! R.Bracale Brak