NIZZA – NAPOLI (2.08.15) 3 A 2 ‘A VEDETTE ACCUSSÍ

NIZZA – NAPOLI (2.08.15) 3 A 2 ‘A VEDETTE ACCUSSÍ Azze! Âmmo accumminciato cu ssette parme ‘e saciccio! Â primma entratura guardateve ‘e ssacche! Â primma antraffa (partita) cu ‘na scuatra ggià pronta p’’o campiunato suojo,’o Napule apparaje ‘a primma fijura marrò. È overo ca ajere se jucaje senza troppa ggente: Reina, Albiollo,Marechiaro, ‘o Pipita..., ma s’avesse allimmeno avut’ ‘a pariggià... Cosa ca nun fove pussibbile e ajere êttem’ ‘a vedé ‘na pellicula ggià vista cu ‘nu Napoli ca, pe ‘na mez’ora, fove bbello in attacco ma cu troppe episfaleje (incertezze) difenzive cunnite ‘ a troppi fullune (errori) soprattutto d’’e centrale.’Nzomma stammo ancòra a ppane d’uorgio, ma sperammo ca, Sarri, utilizzanno tutte ‘e titulare e mettenno sott’ ê ffatiche ll’ate, po’ adderezzà ‘a varca. P’’o mumento ‘o fatto è ppoco simpatico, ma tengo quacche speranzella. Passammo ê ppaggelle: GABRIEL 5: Dice ca fove ‘o meglio purtiere d’’a serie B, ma ajere nun ‘o ddimustraje. Tenette ‘ncopp’â cuscienza ‘o primmo stuco (gol) d’’o Nizza e fforze pure ‘o siconno; p’’o riesto facette ridere quanno tentaje d’ascí cu ‘e punie; ‘e bbuono ‘na parata a nnaso (d'istinto) ‘ncopp’a sSeri. Tutto summato, nun me pare assaje cchiú mmeglio d’’o Prevetariello nuosto. (Dô 45' RAFAEL s.v.: Nun tenette che ffà, ma nun riescette a ffermà ‘a cabbesera (colpo di testa) d’’o tre a ddoje.) MAGGIO 4,5: A ccurto ‘e priparazziona, ajzaje porvera e ll’upposizziona soja a Hultò nun fove cunzistente e mmanco lle riuscette d’appressurà (spingere) ‘ncopp’â fascia. Tutto summato troppo appannato, ‘o capitano.Ô posto ‘e Sarri nn’êsse fatto a mmeno! HENRIQUE 5: Spisso fora tiempo e ccu ‘o solito passo pesante. Fora cundizziona e ppoco cuncentrato jette spisso dint’ê cchiavette e s’abbuscaje ‘nu cartellino jalizzo (giallo) pe n’inutila trasuta assassina a cchiú ‘e cinquanta metre dâ porta. (Dô 45' CHIRICHES 6: ‘E stima;menato dinto ce mettette pochi minute a ppiglià ‘e mmesure d’a situazziona mettennose ‘mmostra ‘ncopp’ê ppalle aute e ppe ccomme ascette palla ô pere.) KOULIBALY 4,5: Troppi cale ‘e cuncentrazione e ffullune(errori) ‘e pusizziona. Custretto a gghiucà ‘nfra centro e mmancina dimustraje ‘e nun tené ‘ntesa cu ‘o cumpagno ‘e sezziona (reparto): pur’ isso poco cuncentrato, lasciaje troppu spazzio a sSeri ‘nnaccasione d’ ‘o doje a ddoje e nun marcaje a gGermain(no) p’’o vantaggio d’’o Nizza. Certo se trattaje ‘e n’amichevole e nnun pozzo ‘ncasà ‘a mana, ma ll’êsse avut’’a mettere miezu punto mancante! GHOULAM 5,5: Jucaje cu ssemplicità e ccu ‘nteliggenza aizanno spisso ‘a capa pe scegliere ‘o mumento justo pe sserví ll’artigliero (punta) o ‘o trecquartista ca cullabburava. Peccato ca nun lle riuscette d’essere semprice e ‘nteliggente pure a ll’epata ‘e patenza (fase passiva). (Dô 45' HYASJ 6: Tuosto e ttenace ce mettette perzunalità e ccuncentrazziona cuncedenno poco o niente a lll’avverzarie. Me fósse piaciuto vederlo a ddritta ô posto ‘e Maggio.) ALLAN 5: P’ ‘o ttené, ‘o ttene, ma se vedette ca steva ‘nritardo ‘e cundizziona e ffove custretto spisso â falta (al fallo).À dda ssulo migliurà ‘a ‘ntesa ‘ncopp’â fascia ‘e dritta cu mMaggio o n’ato e ppo’ migliurà. (Dô 58' INLER 5: Nun riuscette a ffà chello ca Sarri êsse vuluto da isso e s’abbuscaje cchiú ‘e ‘na cazziata!) VALDIFIORI 6.5: Finalmente uno ca futizzaje (illuminò) ‘o juoco, dettanno i muvimente ‘e ll’artigliere (delle punte) cu upobballe (suggerimenti) ‘mmitante e ppricise. Finalmente uno ca urtizza (verticalizza) cu ttassezza (velocità) ‘e penziero e d’azziona.Bbuono pure a ll’epata ‘e trancatura (fase di interdizione). (Dô 45' JORGINHO 5.5: Troppi pasiglie (passaggi) urizzuntale pe gghionta ‘e ruotolo troppo braduse (lenti) e ppoco pricise: quanta differenza cu Valdifiori! ) DAVID LÓPEZ 5: Passo pesante e poco prupenso a ccullabburà; dô lato suĵo mancaje ‘o muvimento i ‘o spagnuolo mancaje cchiú ‘na cupertura comme quanno, cu Valdifiori fora causa, nun riuscette a cchiudere ‘ncuollo a Benno Arfà ‘ncopp’ô primmo stuco. (Dô 68' DE GUZMAN 5 Miezu punto mancante pecché si fove overo ca trasette e sservette súbbeto n’ajuda (assist) pe gGabbiadini a ttaglià ‘a tràsera (difesa) avversaria, fove assaje ‘mpriciso quanno lle capitaje ‘a palla bbona p’’o tre a ttre, e ‘a sprecaje.) INSIGNE 5.5: Durante ô primmo ajone me parette meno arzillo a ppietto d’’e precedenti asciute. Meglio a ll’arranqua (ripresa) quanno avette campo pe ppuntà llommo o lanzà ll’artigliere (le punte).Quanno s’avasciaje perdette quacche ppallone ‘e troppo.(dô 68' EL KADDOURI 5.5: Cercaje ‘e spazzie juste, ma rummanenno ‘ndiece vedette ‘a facenna cumpricata e ffove custretto a ccagnà spisso ‘o lato d’attacco. CALLEJON 6.5: Cu ttutto ca nun se tratta ‘e ‘nu vero primmo artigliero (punta) se muvette a mmestiere a ffianco primma ‘e Mertenso e ppo ‘e Gabbiadini. Se facette truvà ô posto justo, ô mumento justo pe mettere dinto ‘a palla ‘e ll’uno a uno. Peccato ca se facette jettà fora pe ‘na parola superchia MERTENS 7: ‘Nu zuccaro.Penzo ca è difficile farne a mmeno; e nnun vulesse stà ô posto ‘e Sarri pe scegliere tra isso e gGabbiadini.Zumpaje sistematicamente ll’ommo e ssignaje ‘nu stuco (gol) eccezziunale; dô lato suĵo arrivajeno ‘e pericule cchiú ggruosse p’’o Nizza. (dô 45' GABBIADINI 5.5: Cu ‘na guardata se ‘ntennette cu Insigne, taglianno ‘a tràsera avverzaria cu muvimente ‘a dritta verzo ô centro.Peccato ca sciupaje ddoje bbone accasione. All. SARRI 6: ‘E stima; scuatra corta e ddifesa auta: ma nun avastaje. Peccato ca fove traruto dê centrale! Bbuono ll’attacco i ‘a linia mediana a ll’epata ‘e reclaggía (fase di impostazione) ma à dda migliurà a ll’epata ‘e ruttura. ‘Nzomma ce sta ‘a faticà i ‘o campiunato è vvicino. E ccu chesto ve saluto e si dDi’ vo’ ce sentimmo dummeneca ca vene doppo ll’antraffa amichevole cu ‘o Porto. Staveti be’. R.Bracale Brak