CHIEVO – NAPOLI (25/10/15) 0 A 1! ‘A VEDETTE ACCUSSí

CHIEVO – NAPOLI (25/10/15) 0 A 1! ‘A VEDETTE ACCUSSí ‘Assa fà â Maronna!Primma o doppo êv’’a succedere ca ‘o Napule riuscesse a vvencere quatto fullè (match) ‘e fila. E succedette ajeressera a vVerona contro ô Chievo quanno se vincette pure si sulo pe uno a zzero addó se fósse pututo vencere assaje cchiú llargo si nun avessemo sciupato quacche accasione i ‘o Pipita nun fósse stato sfurtunato cuglienno no uno, ma dduje pale. Sinamparco (comunque), guagliú, chella d’ajere fove overamente ‘na nichessa (vittoria) veramente ‘mpurtante p ‘ ‘e guagliune cuane e ppe sSarri ca vincenno, avetteno ‘a suddisfazzione ‘e zumpà ‘a cuollo a cchiú ‘e ‘na scuatra e de ppiazzarese, cu diciotto punte, ô siconno posto ‘ncrassifica [pure si ‘ncumpruprietà] ê spalle d’’a Roma a vvinte punte e ttutto chesto jucanno n’antraffa (partita) tosta sempe a ll’attacco contro a ‘na scuatra carogna ca nun ghiette p’’o ssuttile e mazzuliaje malamente ‘e guagliune cuane e ghiucaje quase sempe cu unnece perzone arreto â linia d’’a palla; però s’êtt’ ‘a fà dint’ô prozo pecché ‘o Pipita i ‘o Napule êveno deciso ‘e vencere e vincetteno, p’’a cuntentezza nosta! Passammo ê ppaggelle: REINA 6,5 Urdinaria amministrazzione; maje seriamente ‘mpignato, se facette apprezzà quanno ascette fora d’’a camma ‘e ricore nosta pe sbruglià ‘na situazziona cu ‘na cabbesera (colpo di testa). HYSAJ 6 Nun appressuraje (spinse) comme ati vvote, ma preferette fà ‘a guardia ô bbidone e dê pparte soje nun se passaje. ALBIOL 6 – Né fessarie (errori), né sfregazze (sbavature). Sestimato e ppriciso,dette ‘a ‘mpressione d’avé truvato ‘a ‘ntesa cu Koulibalý. KOULIBALY 6,5 Oramaje è isso ‘o rre d’’a sezziona (reparto) e ppure ajere riuscette a ffrenà ‘a ticútita (esplosività) soja e ‘a sfruttaje cu cchiú ccerevella. GHOULAM 6,5 Accummenciano a ffruttà ‘e discese uffenzine ‘e ll’algerino ca ajere cunfezzionaje ll’ajuda (assist) dicisivo p’’o Pipita. ALLAN 6,5 Oramaje è ssicuro: lla ‘mmiezo nun se ne po’ ffà a mmeno e ppure ajeressera, quanno ‘o Napule ô pprincipio faticaje, isso se facette apprezzà pe cqualità e quantità nun perdenno maje nè ‘a capa, nè ‘a calma e ccurrenno pe ttre. JORGINHO 6 Cchiú nervuso r mmeno cúttero (incisivo) d’’o ssolito, ma sinamparco (comunque) prumosso. CALLEJON 6 Cuntinua a mancarle ‘o stuco (il gol) ma ‘o spagnuolo è sinamparco (comunque) ‘nu punto fermo e pure ajere se dimustraje jucatore pulitelico (prezioso) dint’ê ddoje epate (fasi). Marek HAMSIK 7. ‘O sluvacchio nu n segna cchiú comme ‘na vota, ma ‘a ‘fatica sporca’ adderet’ê cquinte, forze è cchiú pulitelica(preziosa). Comme fove ajere.Tanto p’’e stuche (gol) ce penzano ll’ate! (Dô 76’ LOPEZ – sv.) INSIGNE 6 ‘E stima pecché durante ô primm ajone (primo tempo) nun tuccaje quase palla, ma a ll’arrancua (ripresa) facette coccosa ‘e cchiú pure si fove tuccato ‘e brutto ‘ncopp’a ‘nu denucchio; ‘nzomma dicimmo ‘nu seje ‘e media. (Dô 68’ MERTENS 6 Trasette a gghiuoche fatte pe ggestiunà (gestire) pallune e siconne puliteliche (preziosi) E ce riuscette.) HIGUAIN 8 Dduje pali e ‘nu stuco (gol) dicisivo .Eparco (leader) ‘ncampo e emutivo ‘e chistu Napule, se dimustraje ‘o vero artigliero (centravanti) ca facette chello ca s’êv’’a fà comme ‘o ssape fà isso: zucannose ‘o marcatore ‘e chiejanno ‘e mmane ô purtiere. (Da ll’83’ GABBIADINI – sv.) All. SARRI 7,5 Sta ascenno fora; chillo ca ce vuleva pe ‘stu Napule: settima nichemata (vittoria) conzecutiva ‘nfra tutte ‘e cumpetizzione; vinticinche stuche(gol) fatte e ttre‘ncassate dinto a ll’urdemi nnove. ‘Nzomma, quanno ll’allenatore conta! E ccu cchesto ve saluto e ssi dDi’ vo’ ce sentimmo ggiovedí ca vene doppo ll’antraffa (partita) casalinca contro ô Palermo, speranno ca ve pozzo parlà ‘e n’atu risultato pusitivo. Staveti bbe’ R.Bracale Brak