BRUGGE - NAPOLI (26.11.15E.L.) 0 - 1

BRUGGE - NAPOLI (26.11.15E.L.) 0 - 1 ‘A VEDETTE ACCUSSÍ Tutto a pposto, guagliù, tutto a pposto e nun puteva essere diverzamente! Ajeressera ‘o Napule scennette ‘ncopp’ ô campo d’’o Brugge,dint’ a ‘nu statio scunzulato visto ca ‘ncopp’ê bbemate (spalti)nun ce stevano sule cinquanta perzone autorizzate p’ ‘a dicisione ‘e ll’ autorità ‘e fa jucà a pporte nchiuse [pe ppaura d’attentate] ‘a penurdema antraffa (gara) d’’o raggruppamento d'E. L. cu ‘e cuane ‘e Sarri cu ‘a sicurezza ‘e tené dint’â sacca ‘o primmo posto ‘int’ô ggirone e ttutto chesto a ppoche juorne dô scontro funnamentale ô san Paolo contro a ll’interre…; quindi perindi po ‘o fullé (match) fove poco cchiú ca ‘na furmalità e Sarri se putette permettere ‘e mannà ‘ncampo sulo a ttre d’’e primme linije a ttènere cumpagnia ê siconne linije lassanno â casa a rReina, a Albiollo, a gGiorgigno e ôPipita e sparagnannose pure a gGabbiadini e a mMertenso e dànno spazzio a gGabriello, a cChirichesso vicino a cKoulibalý[cu ‘na speranzella pure pe lLuperto] mettenno Maggio a ddritta e Striniccio a mancina. A centrocampo po se vedetteno Cialobbà cu lLopezzo e vValdifiori, mentre annante Sarri mettette ‘ncampo ‘nu triainu (tridente) nuovo cu mMarekiaro, Caglieconno e cu El Kaddouri ca facetteno ‘o centravanti a tturno. Ma avastajeno p’uttené ‘nu risultato pusitivo, chillo ca Sarri aveva cercato pe mmetterese a quinnece punte ‘ncrassifica ‘e girone. Passammo ê ppaggelle: GABRIEL s.v. – Turnato a ddifennere ‘e pale cuane doppo ‘na vita, nun tenette praticamente niente che ffà. MAGGIO 6 - Avesse pututo jucà dô pprincipio cchiù annante, ma êtt’’a fà risciatà a Hysaj sufferenno ‘nu poco ‘a tassezza (velocità) d’Izquierdo durante ô primmo ajone e quacche vvota pure durante l’arrancua (nella ripresa), ma po se facette vedé pusitivamente annante appressuranno (spingendo) cu ddicisione e addirittura assiussianno (reclamando) ‘nu ricore ca fósse stato justo, ma ca ll’arbitro [pe cchesto 4]nun lle vulette dà sventulannone sott’ô naso n’assurdo cartellino jalizzo (giallo)! CHIRICHES 7 Confermaje ancòra ‘na vota ‘e stà ‘nforma mettenno ‘a musarola a vVossenno; ‘sta vota addirittura esaggeraje risulvenno isso ll’antraffa (partita) cu ‘nu stuco (gol), [‘o primmo cu ‘a maglia luvarda, ajere russo- sango ‘e puorco] fatto cu ‘na bbella girata, recuglienno ‘nu tiro ‘e squina (angolo).Se facette vedé spisso annante a ll’epata ‘e ‘mpurramiento (fase di spinta), mentre a cchella difenziva sbagliaje sulo ‘na vota, ma furtunatamente senza guaje, quanno lisciaje ‘ncuollo a Izquierdo. KOULIBALY 7 Granna atalossa (prestazione)comme a ssempe; ‘nu paro d’anne fa aveva affruntato ‘o Brugge dint’â Giupilerra Leca,ajeressera ritruvaje ll’ecchese avverzarie ‘e campiunato cu ttanta sperienzia ‘e cchiù ca se vedette p’’e trasute sempe dicise, ma pulite e p’’a ggranna carma a cumannà ‘a ‘pistufulaca (retroguardia). STRINIC 6 - Felipe Gedozzo nun è n’ accunto (cliente) facile, ma ajere facette palla corta sotto ô croato-cuano ca nun ‘o facette passà e cquanno putette se facette vedé a ll’epata ‘e ‘mpurramiento (spinta). DAVID LOPEZ 6- Ė overo ca nun è ‘na mezz’ala e sse vedette, ma ajere quanno lle capitaje sfresaje (sfiorò) ‘o stuco (gol) ‘e mancina; p’’o riesto sbagliaje poco o niente, ma perdette quacche ppallone ‘e troppo. VALDIFIORI 6 – Contr’ô Midtjyllando lanzava ‘o pallone da ‘na parta a ll'ata; ajeressera ô Breydello tiraje pure ‘mporta e mmettette a ssigno ll’ ajuda (assist) pe cChirichesso da ú‘nu tiro ‘e squina (calcio d’angolo).Ògne ttanto cercaje ‘o lanzo luongo, ma nun lle riuscette. CHALOBAH 6+ Finalmente ‘o vedettemo e mme piacette pe ccomme se muvette cu perzunalità e sbaglianno poco e nniente ‘mmiez’ô campo cu ‘na recchia ê cunziglie ‘e Sarri a ssanida ‘e campo (bordo campo); me fósse piaciuto vederlo pure cchiú sotto porta, ma nun ‘o ffacette. (Da ll'81' ALLAN 6,5 Trasette e ssubbéto se facette apprezzà.) EL KADDOURI 5,5 M’aspettavo ‘e cchiú: aveva jucato meglio ati vvote; durante ô primmo ajone sbagliaje assaje; a ll’arrancua (nella ripresa) arrivaje annante ô purtiere e sprecaje. CALLEJON 5 Niente ‘a fà! Miso a ffà ‘o centravanti nun se vedette e nun se sentette;chist’anno, sotto porta nun è cchiú isso! Peccato! (Dô 76' GHOULAM s.v.) HAMSIK 5,5 Avesse pututo fa ‘e cchiú pure comme esterno auto d'attacco,ma oramaje s’è affezziunato â pusizziona cchiú ccentrale e ppure ajeressera s’êtt’’a spustà cchiú verzo ô centro pe ttentà coccosa, ma risultaje poca rrobba! (Dô 69’ HYSAJ s.v.) SARRI 6 Chello vuleva e cchello avette: quinnece punte ‘ncrassifica ‘e girone cu otto cagne a ppietto ô fullè (match) ‘e Verona tanto quase tutte ‘e meccaniseme so’ state assurbite da tutte ‘e jucature e addirittura, visto ‘o stuco (gol) ‘e Chirichesso, ‘nAiuropa, venono cuncretizzate meglio ca ‘nnitaglia ‘e tire ‘e squina(angolo); gestiunaje bbuono ll’energie d’’e pochi titulare custrette a gghiucà e nchiudette ‘a prattica addirittura cu ‘nu triainu (tridente) particulare cu dduje terzini e ‘nu centrocampista. Lle mancaje ‘o curaggio e farece vedé a lLuperto, né avette chillo ‘e fa debbuttà a n Negro e adattaje, sbaglianno, Marekiaro a ffà ll’esterno; ma chello ca serveva era ‘o risultato pusitivo e cchillo arrivaje! Finalmente se decidette a llanzà a Cialobbà e a ll’urdemo fove custretto a ffà a mmeno pure d’Insigne. ‘E ll’arbitro Avram (Romania) 4 V’aggiu ggià accennato. E ccu cchesto ve saluto e ssi dDi’ vo’ ce sentimmo marterí ca vene doppo ca ô san Paolo scenne ‘a bbanda ‘e mancini, speranno ca se ne turnasse carreca ‘e maraviglia p’avé pigliata ‘na bbona scusuta ‘e mantesino! Staveti bbe’! RaffaeleBracale Brak