NAPOLI - MIDTJYLLAND (E.L.05.11.2015) 0 - 0 ‘A VEDETTE ACCUSSÍ

NAPOLI - MIDTJYLLAND (E.L.05.11.2015) 0 - 0 ‘A VEDETTE ACCUSSÍ Che sbrasata guagliú, ch’esaggerazziona: cinche a zzero! Proprio comme avevo prunusticato e dditto, primma ca s’accuminciasse, a ll’amice ‘ntribbuna divano; ‘o Napule ajeressera ‘mmerz’ê ssette ô san Paolo, ‘nnante a vvintemila tifuse napulitane e a ‘nu centenaro ‘e tifuse danise ca s’êveno fatte milleesetticiente chilometre a vvení e milleesetticientecinquanta a gghí pe vvení a vvedé comme ‘e vascuotte danise ‘e ppigliaveno ‘ncopp’ê rrecchie, ‘o Napule ajeressera cunzignaje a cchilli puverielle d’‘e vascuotte danise ‘nu cartoccio cu tre bbabbà e ddoje sfugliatelle ricce; che sbrasata, ch’esaggerazziona: cinche a zzero! Nun fósse stato meglio p’’e danise doppo d’’e ccarocchie pigliate ‘ncasa (uno a cquatto)nun fósse stato meglio, dicevo nun vení proprio ô san Paolo? Avesseno perzo tre a zzero a ttavulino e avesseno sparagnato ‘e denare d’’e viagge! ‘Mmece venetteno i ‘o Napule se ne vedette bbene facenno ‘o vallo ‘ncopp’â mmunnezza, tanto mmunnezza ca riuscette a ffarle stuco (gol) addirittura Maggio ô 54° ca facette ‘o quarto doppo ‘o primmo de El Kaddouri (13°) [cu ‘na scarpa ‘nnettopaida (in fuorigioco)ca però nè ll’arbitro, nè ll’ati assistente vedetteno, pe ccuje dicimmo ca nun ce fove...] ,doppo d’’o siconno e tterzo ‘e Gabbiadini, (23° e 38°) e pprimma d’’o stuco (gol) finale, ‘o quinto, ‘e Caglieconno ô 77°. ‘Nzomma ‘nu spasso p’’o Napule ca scennette ‘ncampo cu ‘o rutizzio (turnover)’e sette jucature ‘e ll’unnece bbase, ma senza fà a mmeno ‘e ‘nu “titolarissimo” pe ssezziona (reparto) :Reina, Koulibalý,Marekiaro e Insigne e dànno ‘na sciansa chance ‘e titulare a Striniccio.E ghiette a fferní ca ‘o Napule duminaje ggià dê primme minute e ppurtaje ‘mpuorto ‘na nichemata (vittoria) straurdinaria, senza maje cuncedere ‘o riesto ‘e niente a ll'avverzario,e praticamente , cu quatto antraffe e quatto nichemate (vittorie), nchiudette ‘e juoche p’’o primmo posto, rennenno ll’urdimi dduje fullé (match) cu Brugge e lLegia [‘mprugramma primma d’ ‘e dessaffíe (sfide) cu Interre e rRoma] sulo ‘na tupicotica (formalità);’nzomma cumplissivamente s’avetteno ‘mpurtante endeiche (Indicazioni) ‘a tutte ‘e cuane scise ‘ncampo, pe ‘na crescenza custante ca nun cunosce stamma (sosta). Ricordo ca a ll’arrancua (nella ripresa) ce foveno ‘e rellé (staffette) Marekiaro –Allanno e Insigne-Cagliecònno, justo pe sparagnà ‘e fforze e truvarese a ll’arriba (al top) ‘nvista ‘e ll'Udinese! Passammo ê ppaggelle REINA 6,5: Nun currette pericule e ffove ‘mpignato sí e nno ‘nu paro ‘e vote cumpresa chella d’’a mez’ora ‘e ll’arrancua (ripresa) quanno ascette a ffermà ‘nu profuco danese. MAGGIO 7: ‘Na surpresa; turnato a essere treno e nno papunciello appressuraje (spinse) assaje e, me pare doppo ‘nu paro d’anne, truvaje pure ‘o stuco (gol), chillo d’’o quatto a zzero! CHIRICHES 6,5: Antraffa sterosa (gara solida) e de granna sicurtà (sicurezza). KOULIBALY 6,5: Jucaje cu attenziona e ddétte stereutità (solidità) â sezziona (reparto) arretrata. STRINIC 6,5: bBona atalossa (prestazione) ma êsse avuto prufittà ‘e cchiú d’’a situazziona. ( dô 69° HYSAJ 6: trasette e ffacette ‘o ssuojo). LOPEZ 6,5: ‘A qualità nun è articulo suojo, ma détte tutta ‘a quantità ca servette ô centrocampo:fatica scura, ma pulitelica (preziosa). VALDIFIORI 6,5:Tutte ll’azzione passajeno p’’e piere suoje e ffacette chello ca uno s’aspettava facenno ggirà a mmestiere ‘o pallone. HAMSIK 6,5: Atalossa (prestazione) da prufessiunista ‘e ‘sperienzia, se facette vedé ‘into a ttutt’’e ddoje ll’epate (fasi).Ascette pe ppiglià sciato. ( Dô53° ALLAN 6,5: trasette facenno sentí ‘a presenzia soja.) EL KADDOURI 7: Atalossa (prova) assaje cunvincente; sbluccaje subbeto ll’antraffa (partita) ô 13°, pure si cu ‘na scarpa ‘nnettopaida (in fuorigioco)ca però nè ll’arbitro, nè ll’ati assistente vedetteno, pe ccuje, ripeto, dicimmo ca nun ce fove! GABBIADINI 7,5: Rispunnette a cciammiello â chiammata ‘e Sarri cu ‘na dubblata (doppietta) ggià ô primmo ajone (nel primo tempo) e antraffa (partita) nchiusa! INSIGINE 7: ‘O fantasista d’’o Napule se ‘nventaje cu cclasse dduje granne ajude (assist) e cchesto avastaje.Quanno ascette nun prutestaje, ma guardaje sulo stuorto a cchi trasette. (Dô 57° CALLEJON 6,5: Chiammato ‘ncampo participaje â festa cu ‘o stuco (gol) finale, chillo d’’a cinquina.) All. SARRI 7: Oramaje con o senza ‘e titulare ‘o Napule à capito ‘a lezzione, anze à diggerito chello ca ‘o trainerro vo’ e cchiú se va ‘nnante pare ca ‘e ccose vanno sempe meglio!E cu chesto ve saluto e ce sentimmo, si dDi’ vo’, llunnerí ca véne doppo ll’antraffa(partita) casalinca cu ll’Udinese sicure – sinamparco (comunque) - ‘e turnà a vvencere! Staveti bbe’! R.Bracale Brak