NAPOLI – UDINESE (08/11/15) 1 A 0 ‘A VEDETTE ACCUSSÍ

NAPOLI – UDINESE (08/11/15) 1 A 0 ‘A VEDETTE ACCUSSÍ Tutto a pposto, guagliú! Tutto a pposto. Ajere ô san Paolo a ll’ora d’ ‘e ppastarelle nce attuccaje ‘e vedercela cu ll’Udinese ‘e Colantuono scesa a nNappule decisa a nun perdere e ppirciò cummigliata i abbuttunata comme e cchiú ‘e ‘na monaca d’’e trentatré, tanto è vvero ca jucaje pe ttutta ll’antraffa (partita) cu ddiece suggette arret’â linia d’’a palla facenno trancara (muraglia) cu ‘o sanco a ll’uocchie e ppe ttutto ‘o primmo ajone (tempo) nce riuscette a nun piglià scoppole; pe pparta soja ‘o Napule doppo ‘nu bbuonu archizzunto (inizio), comme prusengo (approccio),ecco ca ‘a a scuatra, cu quacche jucatore ca s’êva scurdato ‘o metro dint’ê spogliatoje abbijaje a sbaglià cchiú ‘e ‘nu pasiglio (passaggio): o troppo luonghe o troppo curte e nun se ne steva venenno a ccapo cu troppe accasione criate a ll’epata uffeziva (in fase offensiva) e malamente sprecate; però po ‘e primme minute ‘e ll’arrancua (ripresa) vedetteno ‘nu Napule cchiú caturizzato (determinato) e ddiciso a ppigliarese tutt’’a posta, cosa ca fecette cu santu Pipita ca ô 53’ truvaje ‘o spazzio justo e cu ‘nu granne diacunale, scardanno ‘o palo luntano, piazzaje ‘o pallone addó Karnezísso nun putette arrivà e s’êtte alluggià ‘a brasciola ‘mbuttunata p’’o piacere nuosto. E avastaje chillu stuco (gol) pe vvencere ll’antraffa (partita) e mmantenere ‘o passo d’Interre e rRoma, rummanenno ê piane aute d’’a crassifica â faccia ‘e chi ce vo’ male e de chella fetenzia ‘e Celi (2 ‘e ‘ncuraggiamento)ca me custringe a pparlarne pe ddicere ca fove assaje scadente, comme ô nuvantanove pe cciento ‘e ll’arbitre taliane; êsse vuluto fà ‘o pignuolo e ‘o pricisino, ma sbagliaje quase tutto,soprattutto nun vulette vedé ‘nu ricore ‘ncuollo a Allanno e pp’’o riesto siscaje sempe contr’ô Napule, senza scurdarce ca spisso ‘ntralciaje pure ‘a manovra, mettennose ‘mmiezo senza scanzarse! Passammo ê ppaggelle: REINA 7:Cu n’ajuda (assist) a ttutto campo libberaje a Llorenzigno [ca però sbagliaje ] annanze a Karnezzísso; rrobba ‘a spellarese ‘e mmane: me parette ‘e vedé a cKrollo! P’’o riesto sulo ‘nu parémaso (intervento) cu ‘a ponta d’ ‘e ddete pe mmettere ‘ncopp’ô travesagno (traversa) ‘na bbotta ‘e Widmèrro; uno sulo ma dicisivo e ‘mpurtante quanto ‘nu stuco (gol), pecché salvaje ‘o risultato. HYSAJ 6,5: ‘O Napule jucaje cchiú d’’o ssolito ‘ncopp’â curzia ‘e dritta e ll’albanese fove ‘na purosa sumantica (risorsa importante). Ô finale travulgente facette vedé ‘e sapé difennere pure ‘ncuollo a Adnanno. ALBIOL 6: Lla ddereto nun tenette assaje che ffà, pecché ‘o Napule tenette isso ‘o pallino d’’o juoco e ll’Udinese mettette naso ‘nnante sulo quanno trasette Aguirre e isso, cu ‘e bbone e ccu ‘e triste lle mettette ‘a musarola. KOULIBALY 6,5: Pronto ‘nchiusura, anche quanno partette ‘nu poco ‘nritardo a ppietto ‘e ll’avverzario.A cCeli ‘nun lle parette overo ‘e puterlo casticà cu ‘nu cartellino jalizzo pe bbia ‘e n’inutile tentativo falluto ‘e tuccà ‘a palla cu ‘a mana dint’â camma (area) janca e nnera, cosa ca lle vvene a ccustà ‘o prossimo fullé (match) ‘e Verona. GHOULAM 6: Fallette quacche cchiusura ‘ncuollo a Widmèrro,ma mettette ‘nu paro ‘e cruzze (cross) ‘ndiaferune (interessanti) p’’o Pipita. ALLAN 7: Bbona ‘a primma parte, ma meglio ll’arrancua (ripresa) quanno avette cchiú ccampo arrivanno a essere tanto periculoso dint’â camma (area) janca e nnera,da mmeretarese ‘nu ricore a ffavore ca però Celi nun vulette vedé; p’’o riesto, stesse sempe ‘mmiez’ô juoco facennose apprezzà pe ttutta ll’antraffa (partita). JORGINHO 6,5: Riggia cuerda (saggia) cu quase nisciunu prano (errore); soja ll’ajuda (assist) p’’o stuco (gol) d’’o Pipita. HAMSIK 5,5: Nun fove ll’antraffa soja e ssufferette ‘a marcatura d’ Iturra. ‘Nutto se facette nutà sulo pe ‘na bbona istiglia (verticalizzazione) pe Llorenzigno. CALLEJON 6,5:Cchiú zzéruso (vivace) d’’o ssolito, se facette truvà pronto dinto a cquacche accasione sumantica (importante)senza però riuscí a ccuncretizzà, dimustrannose pronto a ll’epata (fase) difenziva. (Dô78’ El Kaddouri sv). HIGUAIN 8: ‘Nu stuco (gol) assaje bbello e ddifficile ca sulo ‘nu granne artigliero (bomber) po’ ffà e ppo n’atalossa (prestazione) da applavuso cu gghiucate fantastiche ca se fósseno mmeretata ata furtuna; ‘nu pallunetto asciuto ‘e poco e ca si fósse trasuto s’êv’’a fravecà súbbeto n’atu san Paolo! ( Da ll’ 82’ GABBIADINI SV). INSIGNE 6: Ascette dô campo senza fà storie doppo n’antraffa (partita)cammilla(sottotono),cu quacche azziona troppo isulata;nun riuscette a sfruttà ll’ajuda (assist) a ttutto campo ‘e Reina perdenno ‘na granna accasione ; ‘e bbuono ‘nu bbellu ajuda (assist) p’’o Pipita. Troppo poco! (Dô 69’ Mertens sv). All. SARRI 6: Antraffa (partita) ca addiventaje complicata p’’e pparate ‘e Karnezzísso e ppecché, cu ddiece ‘e lloro,ll’Udinese ‘ncasinaje ‘e spazzie.Tutto summato chella d’ajere fove ll’atalosa (prestazione) meno cunvincente d’’o Napule ‘e ll’urdemi semmane; pe ffurtuna ca a ‘nu certo punto ‘o Pipita decidette ‘e vencere e cce riuscette cu ‘na magaria. Basta accussí, ve saluto e ssi dDi’ vo’ ce sentimmo cu ppricisione nun saccio quanno, ma êsse’a essere doppo d’’a trasferta ‘e Verona contr’â scuatra ‘e chella zoccola ‘e giulietta! Staveti bbe’! R.Bracale Brak