ATALANTA – NAPOLI (20/12/15) 1 A 3 ‘A VEDETTE ACCUSSÍ

ATALANTA – NAPOLI (20/12/15) 1 A 3 ‘A VEDETTE ACCUSSÍ Biancale, fuja-fuje, trezziole e bbotte a mmuro guagliú!Ajere ‘ncopp’a cchella mmunnezza ‘e turreno ‘e chella fetenzia d’’o statio ‘e Bergamo ‘o Napule avette raggiona d’’a scuatra ‘e Edy Reja vincenno doppo ‘na mubbara (incontro) cumbattuta e mmutavazzina (equilibrata),ca fove dicisa da ‘nu granne dubblato (doppietta) [‘a quinta d’’a tempurata (stagione)] ‘e ‘nu sciantiglione (fuoriclasse),ciovè ‘o Pipita ca a ‘nu certu punto decidette ‘e vencere trascenanno ‘o Napoli e rijalanno ê cuane ‘na nichemata (vittoria) ca mancava ‘a doje jurnate e, a bBergamo, ‘a quase seje anne e se vincette lassanno a ll’atalantise tre cartocce ‘e struffole e ffȯsseno putute essere pure quatto si Marekiaro ‘ncopp’ô tre a uno nun êsse sbagliato ‘nu ricore, ‘mmece ‘e lassarlo tirà a mMerenso ca se ll’era prucurato! E ggià êva arresecato ‘e sbaglià ‘o primmo avuto dô Napule e ca ‘o Pipita gentilmente ll’êva fatto tirà. Ma mo nun ce avvelenammo ‘o sanco penzanno a ‘sti ccose… Penzammo cchiuttosto ca se vincette ‘ncopp’a ‘nu campo difficile e nun ce ‘ntussecajemo vermicielle a vvongole,capitone, vruoccole, mussillo fritto, ‘nzalata ‘e rinforzo,scioccéle, struffule,raffiuole a ccassata, pasta riala, mustacciuole e susamielle natalizzie. Gudimmoce ‘a nichèmata (vittoria) e nnun penzammo ch’êsse pututa essere cchiú llarga! Passammo ê ppaggelle: REINA 7 Turnaje ‘ncopp’ô campo addȯ ll’era capitato ‘e fàn’atalossa (prestazione) ‘a scurdà, e ajere ‘mmece facette vedé chi è salvanno subbeto ‘ncuollo a mMaxi Moralezzo.Se chiammaje ll’applavuso d’’a platea cu ‘nu tuffo plastico, e cuncreto ‘ncopp’ô tiro ‘e mancina ‘e Cigarini, ma nun putette fà niente ‘ncopp’ô colpo ‘e bbigliardo ‘e Gomezzo, ca, nun chiuso a dduvere ‘a gGiorgigno, pariggiaje subbeto ‘o ricore d’’o vantaggio ‘e Marekiaro. Peccato! Pe ffurtuna ca po s’’o vvedette ‘o Pipita! HYSAJ 6 Dètte ‘a ‘mpressione d’essere assaje ‘mpalla ma venette servuto meno ‘e quanto se fȯsse mmeretato.Da tené a mmente, doopo diece minute ‘nu granne pallone cu ‘o cuntaggire p’’o Pipita ca però nunn’ ‘o mettette a ffrutto! ALBIOL 6,5 – Dette ‘na mano a gGiorgigno a ll’epata ‘e bbinna (in fase di costruzione)e ‘o dessaffio (sfida) cu gGermanno Denisso ‘o vedette prutacunista ‘e ‘nu salvataggio ‘mpurtante ô pprincipio d’arrancua (ripresa). KOULIBALY 6,5 Se facette rispettà fisicamente contro a dDenisso,ma sufferette ‘a tassezza (rapidità) ‘e Gomezzo ca lle custaje ‘nu cartellino jalizzo (giallo). Da tené a mmente ‘nu salvataggio ‘e ‘nu pallone periculuso dint’â camma (area) anticipanno a ttutte. GHIULAM 5,5 – Nun rientraje ‘naccasione d’’o tiro ‘e Moralezzo,fermato lassanno scuperto a cKoulibalý E RrEINA c’êtte ‘a mettere ‘na pezza.Sbagliaje cchiú ‘e ‘nu cruzzo (cross) e se vedette poco a ll’epata (fase) ‘e cupertura soprattutto durante ô primmo ajone (tempo); ‘nu poco meglio a ll’arracua (nella ripresa). ALLAN 5 – Stanco; facette a spallate cu De Roonno, perdenno spisso, e sbagliaje troppi pasiglie (passaggi) pure facile. (Dô 65' DAVID LOPEZ 6 ’Na bbona mez’ora a ppurtà ordine) JORGINHO 4 Jurnata ‘a scurdà:comme ggià succedette a bBulogna, pure ajere faticaje a ppiglià ‘o cuntrollo d’’o centrocampo pe bbia d’’a pressiona (pressing) avverzaria e d’’o mancato ajuto d’’e cumpagne ‘e sezziona (reparto); facette ‘a fessaria quanno nun nchiudette a dduvere a gGomezzo ‘ncopp’ô stuco (gol) ‘e ll’uno a uno. Perdette ‘a capa e sse facette jettà fora inutilmente.Bruttu cumplianno! HAMSIK 6 ‘O capitano nun signava ‘a cchiú ‘e milleetreciento minute ‘ncampiunato; ajere ô primmu tiro facette comme a Insigne e sparacchiaje ‘ncurva; primmo ajone overo bbrutto;ô 53’ s’appresentaje ‘ncopp’ô dischetto ô posto d’’o Pipita e ppoco mancaje ca nun sbagliasse, mannanno apprimma ‘o pallone sott’ô travesagno (traversa) e ppo ‘mporta; ô siconno ajone, migliuraje ‘nu poco furnenno pure ll’ajuda p’’o Pipita ca firmaje ‘o dubblato (raddoppio) perzunale;nun cuntento ‘e avé signato pe scagno ‘o primmo ricore, vulette tirà pure ‘o siconno, levannelo a mMertenso ca se ll’era prucurato i ‘o sprecaje malamente! CALLEJON 5,5 Se vedette poco annante e ppruvaje a ccumpensà faticanno ‘e cchiú arreto. Ma accussí nun fove isso! HIGUAIN 7,5 ‘O Pipita rumpette ‘o diúno ‘e stuche (gol) ca durava ‘a ‘nu paro d’antraffe(partite); sciupaje quacche bbona accasione, ma po decidette ‘e vencere ‘a mubbara (incontro)apprimma signanno ‘o doje a uno cu ‘na cabbesera ‘ncopp’a ‘nu tiro ‘e squina (corner) cu ttutto ca bBellini ‘o tratteneva astrignennolo cu ‘e ddoje braccia, e ppo mettenno dinto, cu ‘a justa pricisiona e ffreddezza, ‘o tre a uno ca nchiudette ‘o fullè (match). (Da ll'89' MAGGIO s.v.) INSIGNE 5,5 Me piacette poco, soprattutto pecché nun vedette maje ‘a porta e aizaje porvera. Pe ffurtuna ca a ll’arrancua (ripresa) se muvette ‘nu poco meglio e sfresaje (sfiorò) ‘nu stuco (gol) ch’êsse ammutuluto Bergamo. (Dô 71' MERTENS 6 – ‘O cartellino russo a gGorgigno cagnaje ll’equilibbrie e nun putette magnarse ‘a curzia allimmeno nfi’ a cquanno nun se jette a ccunquistà ‘o ricore ca po Marekiaro sciupaje!) Sarri 6,5 – Nunn’ êva maje vattuto a Edy Reja; ajere ce riuscette presentannose a bBergamo cu ‘a meglia scuatra pussibbile ca però se ll’êtte ‘a vedé cu n’ Atalanta tosta, partuta forte mentre ‘e cuane (gli azzurri) patennola ‘nu poco troppo sbagliaveno cchiú ‘e ‘nu pasiglio (passaggio). Furtuna ca po tutto s’accunciaje e sse vincette;isso ll’aveva ditto ca fȯsse stato difficile, eppure ‘o Napule riuscette a ccrià cchú ‘e n’accasiona periculosa, ma ‘a sciupaje e ttutto summato ‘a scuatra nun ghiucaje tanto bbuono,però ô prazzo (alla fine) se putette essere cuntente; mancava proprio ô Napule ‘e vencere pure nun ghiucanno bbuono, comme è ssempe succieso a juve, roma,milanno e interre; pure accussí se venceno ‘e campiunate! Mo ‘a pausa po’ sserví a ttammillà (a ricaricare) ‘e bbattarie ‘e ‘na scuatra ca nun ce stette mentalmente o ce stette poco. E ccu cchesto ve faccio tante e ttante avucurie p’’e ffeste ca stanno venenno e si ‘o vvo’ ‘o Cielo ce sentimmo a ll’anno nuovo, doopo ll’antraffa (partita) casalinca cu ‘o Torino. Staveti bbe’! Raffaele Bracale Brak