NAPOLI – INTER (30.11.15-) 2 A 1

NAPOLI – INTER (30.11.15-) 2 A 1 ‘A VEDETTE ACCUSSÍ Tenco ‘o core dint’ô zzuccaro e ssi ajeressera me fosse mmesurato ‘o diabbete ll’êsse tenuto a cquattuciento…, ma è comme si ancòra nun ce vulesse credere. ‘Mmece è accussí, è accussí: ajeressera ‘o Napule ‘e Sarri, pure si suffrenno e a ccurto ‘e sciato a ll’urdemi vvinte minute, cu ttutto ca ‘copp’ê bbemate (spalti) d’’o san Paolo chino comme a n’uovo, vicino a Aurelione nce steva chillu cestariello ‘e ggiggino-uocchiestuorte,[tifoso ‘nterista], scarucchiaje a cchella bbanda ‘e chianchiere d’’e jucature ‘e mancini e sse jette a ppiazzà, cu trentunu punte, ‘nsulitaria ‘ncimma â crassifica d’’o campiunato,mentre – cu ddudece stuche fatte chillu mostro d’’o Pipita se turnaje a ppiglià ‘nsulitaria ‘o posto ‘e capartigliere (capocannoniere) d’’o campiunato e doppo vinticinche anne ‘o Napule se po’ permettere ‘o lusso ‘e turnà a ssunnà! Passammo ê ppaggelle: REINA 7,5 Ca nun pigliasse stuche (gol) ‘a cinche anfratte (partite)’ncampiunato nun era pe ccaso.E ppure ajressera ce fósse riuscito, si Ghoulamme nun êsse fatto ‘na grossa fessaria cunzignanno a lLialiccio ‘a palla d’’o doje a uno; e si ‘ncopp’ ô stuco (gol) ‘e ll’interre nun ce putette fa niente, cu ‘na granna parata ‘ncopp’ a mMiranda, ô nuvantaquattresimo salvaje ‘a nichemata (vittoria) cunfermannose ‘nu pilastro d’’a scuatra. HYSAJ 6 –Durante ô primmo ajone (tempo) stuppaje a pPerisiccio cu ‘e bbone e ccu ‘e ttriste; a ll’arrancua (ripresa), doppo d’essere stato nutitiato (ammonito) ‘o cuntrullaje senza tuccarlo cchiú, e ll’ala ‘e mancini rummanette a vvoca asciutta! ALBIOL 6,5 ‘Na ‘ndivinata cabbesera (colpo di testa) soja addivintaje oro pe mmano d’’o Pipita; arreto se facette valé senza nisciunu sfregazzo (sbavatura) dànno ‘na sustanziosa mano ô cumpagno ‘e sezziona(reparto). KOULIBALY 7 Súbbeto nutitiato (ammonito), nun se facette cundizziunà pe nniente, cunfermannose culonna ‘e ‘stu Napule e criscenno ògne mminuto addeventaje ‘nu muro adabbiato (insuperabile). GHOULAM 5,5 Miezi zifo (voto) mancante, ‘nu poco pecché durante ô primmo ajone,nun facette tutto chello ch’êsse pututo fa; è overo ca migliuraje a ll’arrancua ( nella ripresa), ma po ‘nguaje ‘a facenna quanno dint’ ô mumento culminante d’’o finale travulggente, scunzideratamente rijalaje a lLuliccio ‘o pallone d’’o doje a uno! ALLAN 6,5 – Corza, sustanza e istiglie (verticalizzazioni): ‘nzomma ll’anema d’’e cuane a ccentrocampo. JORGINHO 6 Ricuperaje e gghiucaje ‘na quantità ‘e pallune pure si ne perdette quaccheduno. HAMSIK 6 Se ne scennette ‘e posa a ll’arrancua, ma pe cchiú ‘e n'ora ‘e juoco currette comme a ‘nu pazzo, ‘mpignannose a ffà ‘na fatica sporca, ma pulitelica (preziosa), ca nun cunzentette â bbanda ‘e mancini ‘e raggiunà e accompagnaje sempe ll'azziona(da ll’80’ D. LOPEZ s.v.). CALLEJON 6,5 Comme ô ssolito granna atalossa (prestazione) ‘e quantità e sacrifiggio cunnita dô purzo (tocco) pulitelico (prezioso), p’’o il primmo stuco (gol) d’’o Pipita;peccato ca comme a pparicchie, passanno ‘e minute se ne scennette ‘e posa. (Da ll’87’ MAGGIO s.v.) HIGUAIN 9,5 ‘Nu mostro!’O meglio jucatore d’’a Serie A. Sàpato passato Felipe Melo êva ditto ca pe ffermarlo s’êva sulo vattere; ma ‘o Pipita nun lle dètte ‘o tiempo: ‘ncapo ‘e duje minute se jette ârrubbà ‘nu pallone dint’â camma ‘nterista e avutannose comme a ‘nu lampo, ‘o fravecaje ê spalle d’Handanoviccio ca sta ancòra jastemmanno. Nun cuntento ô sissantaduesimo, sfruttanno ‘a tassezza (velocità)soja se ‘mpezzaje ‘mmiez’ê duje centrale pe recòvere (raccogliere) ‘na ‘ndivinata cabbesera (colpo di testa) d’ Albiollo e trasfurmarla dint’ô siconno stuco cu ‘na cagliosa ‘ndiacunale ca Handanoviccio vedette sulo ‘e passà; ‘nzomma ddoje cusmime (gemme) ‘e n’eparco (leader),ca nun se putette fermà né ccu ‘e bbone e nnè ccu ‘e ttriste! INSIGNE 6 Tant’ affe (tocchi), ma poca cuncretezza: cupuliaje (duettò) cu ‘o Pipita,sí ma tutta ‘a classa soja se vedette sulo a ‘ntecielle (sprazzi). (dô 70’ EL KADDOURI 5,5 Mancaje ll’antíttupo (impatto) cu ‘o fullè (match) e nnun ajutaje ‘a scuatra ca da quanno isso trasette accumminciaje a arresecà troppo). All. SARRI 6,5 Ô finale d’antraffa ‘a furtuna lle dètte ‘na mana, ma nun fove ‘nu scannalo pecché nfi’ a cchillu mumento se vedette ca ‘o ‘ngranaggio era cullaudato e ca finalmente se po’ abbià a ppenzà ‘ngranne! Arbitro ORSATO 5 Â fora ‘e quacche fessaria,comme quanno nutitiaje (ammoní) Allanno ch’era stato mazzuliato o comme quanno sparagnaje quacche cartellino jalizzo (giallo) ê chianchiere ‘e mancini, grossi fetenzie nun ce ne facette. E ffermammoce cca: Era dô 1990 ca ‘o Napule nun steva sulo ‘cimma â crassifica. Chill’anno arrivaje ‘o scutetto e i’ nun me mecco paura ‘e ddicere ca ,corne facenno, pure st’anno è ‘nu suonno ca ce putessemo fa. Sempe si tanti cestarielle ce lassano ‘mpace. Accussí sperammo. Staveti bbe’. R.Bracale Brak