NAPOLI – EMPOLI ( 31/01/16) 5 A 1

NAPOLI – EMPOLI ( 31/01/16) 5 A 1

‘A VEDETTE  ACCUSSÍ

 

Canta Napule guagliú, avimmo’ ‘a essere cuntente! Ajere ‘nnante a ‘nu san Paolo zeppato ‘e ggente,’mmerz’ê ttre,‘o Napule sbrasaje ancòra ‘na vota vincenno e facenno ascí ‘a cinquina ‘ncopp’â rota ‘e Napule tanto pe ddà ‘na granna risposta â juve ca, pe pparta soja, a ll’ora d’’a tiella êva fatto unu muorzo d’’o chievo e ss’era dato ‘nu punio ‘mpietto surpassanno mumentaneamente ‘o Napule ‘ncimma â crassifica, ma ‘e ccose ‘mmerz’” ccinche turnajeno ô pizzo lloro cu ‘o Napule sagliuto a ccinquanta punte ‘ncimm’â crassifica,secutata, a cquarantotto, dâ juve ca, p’’o mumento ce à dda ancòra guardà ‘e spalle e rusecà ‘nfacci’a ‘stu dito pecché ‘o Napule nun tene nisciuna ‘ntenziona ‘e mullà i ‘o ddimustraje proprio ajere quanno, subbíto ‘nu stuco ‘ncopp’ a ‘nu tiro ‘e timmurria (punizione)[ca nun ce steva, ma ca Massa(4) siscaje e pe gghionta ‘e ruotolo fovedeviato si nun me sbaglio ‘a Cagliecònno] nun se perdette d’iacula (animo) e ‘ncapo ‘e nove minute ggià caputiaje ‘o risultato ‘nchiudenno ‘o primmo ajone (tempo) ‘nvantaggio e cuntinuanno a attaccà pe ttutta ll’arrancua (ripresa) nsi’ a vvencere sbrasanno e cunzignanno â ll’ecchesa scuatra ‘e Sarri ‘nu cartoccio cu quatto sfugliatelle ricce[‘o stuco (gol) d’o Pipita, chillo ‘e Lorenzigno i ‘e duje ‘e Caglieconno] e una frolla[‘o tuterma (autogol) ‘e Camporese];’nzomma comme jette e ccomme venette s’êva ‘a vencere e sse vincette largo! Putimmo essere cuntente! Passammo ê ppaggelle:

 REINA 6 Nun avesse pigliato stuco (gol) si nun fȯsse stato pe cchella deviaziona smaledetta, forze ‘e Cagliecònno,’ncopp’ô tiro ‘e timmurria (punizione) ‘e Paredesso; p’’o riesto nun fove ‘mpignato cchiú ‘e tanto dimustrannose pronto ‘ncopp’a ‘nu tiro ‘e Zielinski.

 

HYSAJ 7 bBella atalossa (prestazione) ‘e ll’albanese contro a ll’ecchesa scuatra soja, appressuranno (spingendo) e vvedennosela cu Maccarone; nutizziato (ammonito) à dda zumpà’a trasferta contr’â Lazzio; che peccato!

 

ALBIOL 7 Nun sbagliaje niente, mettennoce tutta ‘a sperienzia soja e guvernanno ‘na cifra ‘e pallune e andivinanno ‘o ciento pe cciento d’’e pasiglie (passaggi)

 

KOULIBALY 6,5 Se ll’êtt’’a vedé cu ‘nu zepochiello comme a pPucciarelli e s’’o magnaje facenno valé ll’armaddia (fisico) soja, guvernanno ô ssolito a dduvere ‘a camma (zona) ‘e spettanza.

 

GHOULAM 6 Difenzivamente arresecaje poco, mantenenno ‘a pusizziona: ‘ncumpenso appressuraje (spinse) cchiú ‘e ll’urdimi vvote, pure si nun fove cercato sempe a mmestiere.

 

ALLAN 7  Partette a ccapa sotto safianno (pressando) a cchi capitaje, capitaje, ‘nzerènnose e llazanno ô Pipita pure ‘a cinquanta metre;ricuperaje ‘na cifre ‘e pallune e nnun tiraje maje ‘o pere arreto abbuscannose addirittura ‘a garda (ammonizione) ca però nun ce steva e ca miercurí ca vene ‘o custringe a zzumpà ‘a trasferta ‘e Roma contr’â Lazzio; nun ce vuleva proprio!

 

JORGINHO 6,5 Pure si pigliato ‘mmiezo dê tuscane riuscette a ggiustrà bbuono a mmestiere sbaglianno quase niente a ll’epata (fase) ‘e costruzzione e recuperanno ‘na marea ‘e pallune.

 HAMSIK 7 Partecipaje a cquase tutte ll’azzione d’attacco e ssi fove chiammato ‘ncausa rispunnette sempe prisente comme quanno furnette a cCagliecònno ‘a palla ca addivintaje ‘o tuterma (autogol) ‘e Camporese d’’o tre a uno.Andivinaje pure tutt’’e pasiglie (passaggi); lle mancaje sulo ‘o stuco (gol). (Da ll'86' D. LOPEZ s.v.)

 

CALLEJON 7 Sciupaje malamente ‘nu pallone doppo pochi minute e ccapitaje pe scagno ‘ncopp’â masàra (traiettoria) d’’a timmurria (punizione) ‘e Paredesso.Vincette ‘o dessaffío (sfida) cu dDaniele Croce e sse facette truvà ‘nnattacco pronto e ô posto justo pe mmettere ‘mmiezo ‘a palla addivintata ‘o tuterma (autogol) ‘e Camporese e ppe ccumpletà ll’opera mettette dinto ‘o dubblato (doppietta) perzunale ô finale. Pare ca s’è sbluccato e sperammo ca nun se ferma cchiú!

 

HIGUAIN 7 Granna atalossa (prestazione) ‘e ll’artigliero nuosto ca mettenno dinto ‘o pallone d’’o pareggio êtte ‘a ringrazzià a lLorenzigno ca ce ll’êva miso ‘ncapo; p’’o riesto accumminciaje súbbeto a ppiglià ‘e mmesure ‘e chello ca s’êv’ ‘a fà chiammanno a Skorupski a ffà ‘o miraculo primma ‘e mettere dinto ‘a palla bbona, vintidujesimu stuco (gol) d’’o campiunato ca ‘o cunfermaje ‘ncimma â crassifica ‘e ll’artigliere (goleador).Pigliato ‘na bbrutta bbotta dô purtiere dint’ê rine ascette primma d’’o prazzo (fine) chiammànnose ll’applavuso d’’o statio. (Dô 72' GABBIADINI s.v. – Peccato ca nun riuscette isso a mmettere dinto ‘o pallone d’’o 4-1 ca ll’accarezzaje ‘a capa; ma me facette cchiú ppiacere vedé sbluccarese a Cagliecònno!)

 

INSIGNE 8 Granna mubbara (partita) ‘e Lorenzigno ca ‘e dritto disignaje ‘na parabbola mudaiana(strepitosa) p’’o Pipita e ppoco doppo pittaje ‘nu tiro ‘e timmurria (punizione) ca lassaje ‘e stucco ô purtiere tuscano e cce dette ‘o vantaggio d’’o doje a uno; p’’o riesto cupuliaje a mmestiere cu mMarekiaro e ccu gGhoulammmo, e ccome a ssempe dint’ô stritto sfujette ê difenzure crianno pericule. (Dô 75' MERTENS 6  Dduje bbelli ajude (assist) pe cCaglieconno,ca ‘e sfruttaje a mmestiere. Bbuono accussí.)

 SARRI 6,5  Ancòra ‘na vota andivinaje sciglienno ‘e soliti titulare suoje p’’o scontro contro a ll’ècchesa scuatra tuscana e avette ‘a risposta ca s’aspettava vedennole ggiustrà a ccapa sotto cu cqualità e ccegna (grinta) cercanno e truvanno ‘a sesta nichemata (vittoria) ‘e fila, robba ca nun succedeva da fevraro d’’o millenovicientuttantotto! Nichemata (vittoria) cunquistata cu ttutto ca ‘a disgrazziata deviazziona ‘e Cagliecònno steva cumplicanno ‘e ccose.

 a ll’arbitro MASSA 4 aggiu ggià accennato; cca dico sulo ca addó vedette e addó cecaje e ccecaje cu ‘o Napule!

 E fermammoce cca, cuntente ancòra ‘na vota ‘e chello ch’è succieso e ddannoce appuntamento, si dDi’ vo’ a ggiovedí ca vene doppo d’’o scontro ‘ntrasferta cu ‘a Lazzio , quanno ce attocca ‘e fa a mmeno ‘e doje pedine ‘mpurtante: Hysaj e Allanno ch’erano diffidate e [nutizziate (ammoniti), ma nun se capette pecché ‘a Massa]so’ custrette a zzumpà ‘a trasferta.

 R.Bracale Brak