NAPOLI – INTER ( C.I. 19.01.16-) 0 A 2 ‘A VEDETTE ACCUSSÍ

NAPOLI – INTER ( C.I. 19.01.16-) 0 A 2 ‘A VEDETTE ACCUSSÍ E i’ mo che vve pozzo dicere guagliú? Niente; sulo ca tengo ‘o bbeleno ‘mpont’ô musso pe ccomme fenette ll’antraffa (icontro) ‘e coppa itaglia ajeressera ô san Paolo addȯ ll’interra ce venette a vvattere menannoce fora dâ coppa, cosa ca maje e ppo maje me penzavo fȯsse pussibbile, ‘mmece succedette ‘nu poco pecché Sarri [5] ‘mprimmose sbagliaje ‘o rutizzio (turnover) tenenno fora dô primmo minuto ôPipita,a mMarekiaro e a gGiorgigno, e ppo aumentaje ‘a ddose sbaglianno ‘e cagne e ‘nu poco pecché ‘nu paro ‘e jucature (Gabbiadini e Mertenso) nun foveno maje a ll’aldezza d’’a situazziona e ‘nu poco pe bbia ‘e ll’arbitro Valeri [3] ca, ‘ncopp’a ll’uno a zzero pe ll’interre, ‘mmece ‘e cuncedere ‘nu ricore a mMertenso stiso dint’â camma ‘e ricore ‘nterista, ‘o nutizziaje (l’ammoní) p’’a siconna vota i ‘o jettaje fora lassannoce ‘ndiece dint’ô mumento cchiú ddellicato! ‘Nzomma, comme jette e ccomme venette ‘o Napule êtt’’a ‘ncassà ‘a primma scunfitta casalinca d’’a tempurata (stagione) e ascí dâ coppa, cosa ca però – tutto summato – po’ essere ‘na cosa bbona lassanno ‘o Napule libbero mentalmente d’applicarese ô campiunato e a ll’ E.L.! E ssí! Pe ‘na vota, penzammo pusitivo e gguardammo ‘o bbicchiere miezu chino e nno miezu vacante! Passammo ê ppaggelle: REINA 6 S’accuntentaje ‘e piglià friddo pe ttutt’’o tiempo d’’a mubbara (partita)nun tenenno niente che fà, ma êtte ‘a recogliere dduje pallune ê spalle soje senza puterece fà niente. HYSAJ 6,5 Uno d’’e meglie: attiento ‘ncuollo a pPerisiccio e prupusitivo ‘ncopp’â dritta. Mancaje ‘e cazzimma ‘ncopp’ô dubblato (raddoppio) ‘nterista, ma ‘o perdunaje pecché perdere pe uno o doje a zzero è ‘o stesso! CHIRICHES 5,5 Miezu zifo (voto)mancante pecché si nchiudette bbuono ògne chesema (varco) durante ô primmo ajone (tempo),’nnaccasione d’’o stuco (gol) ‘e Joveticcio, lle lassaje troppu spazzio! KOULIBALY 5,5 Pure pe isso miezu zifo (voto)mancante p’’o stessu mutivo d’’o cumpagno ‘e sezziona, ma p’’o riesto bbona atalossa d’’o ggialante (gigante) francese. STRINIC 5,5 Tentaje sí ‘e metterse ‘nmostra, ma fove miso ‘ndifficultà da Nagatomo. ALLAN 6 Se ll’ê tt’’a vedé cu ll’armaddia (fisico) ‘e Kondogbia e ffaticaje pe sbrugliarsela lla mmiezo.(dô 59’ HAMSIK 5 Trasette dint’ô mumento cchiú ddellicato, ma nun riuscette a llassà ‘mpronta cu n’atalossa (prestazione)scadente! ). VALDIFIORI 5,5 - Troppi palle perze e mmaje n’urtizzazziona (verticalizzazione)andivinata; ‘o Napule pavaje ll’assenza ‘e Giorgigno dô primmo minuto. DAVID LOPEZ 6 Granna fabbíca (applicazione) e dennammechia (dinamismo) cuntinua; se sentette ‘a mancanza soja ‘nnaccasione d’’o stuco (gol) ‘e Joveticcio, quann’isso era asciuto dô campo,pe bbia ‘e ‘na guvetata ‘e Perisiccio ca ll’arapette a ssanco sotto a ll’uocchio custringenno Sarri a ccagnarlo. (dô 66’ JORGINHO 5,5 Pure pe isso miezu zifo (voto)mancante pecché si trasette e ffacette súbbeto sentere ‘o pisemo suojo pure annante cu ‘nu paro ‘e cuchiusioni sporche ribbattute, fove isso a pperdere ‘a fesso ‘mmiez’ô campo ‘na palla velenosa ca Joveticcio facette addiventà stuco [gol] ). CALLEJON 6 Fove ‘o cchiú ppericuloso d’’e suoje lla ‘nnante dimustranno ‘e stà bbuono pure d’armaddia (fisico); peccato ca nun riuscette a ddà ll’angolo justo a ‘na bbella palla avuta da Striniccio. GABBIADINI 5 Nun è ‘o Pipita e sse vedette; tentaje ‘e moverse pe tutt' 'o fronte uffenzivo, ma aizaje porvere sciupanno ‘na palla ‘mpurtante.Peccato! (dô 71’HIGUAIN 6 Cu isso ‘ncampo ‘o Napule fove assaje cchiú ppericuluso; poco mancaje ca nun signasse ‘nu stuco [gol]capolavoro). MERTENS 5 Nun fove maje a ll’aldezza d’’a situazziona e ppassaje ‘a primma parte d’’a mubbara (partita) a ss’appiccecà cu Cagliecònno senza maje truvà ‘a ‘ntesa nicessaria. Nun dètte nisciuno ‘mpiccio a Handanoviccio e quanno ‘e cuane (azzurri) tentajeno d’ acchiappà ‘o pareggio pe gghí a ll’ampliative (supplementari), trasette dint’â camma ‘nterista, ma fove stiso reclamanno ‘o ricore. Ll’arbitro Valeri, sbaglianno, ‘a chella recchia nun ce sentette, ‘o nutizziaje (l’ammoní) p’’a siconna vota i ‘o jettaje fora. mannannolo pe ttiempo sott’â doccia. All. Maurizio SARRI 5 P’’e mutive ch’aggiu ditto ô pprincipio, ma se ‘mmeretasse ‘e cchiú p’avé pigliato a mmale parole a cchillu nnacchennello ‘e mancini! E fermammoce cca ddannoce appuntamento, si dDi’ vo’ a llunnerì ca vene doppo d’’o scontro ‘ntrasferta cu ‘a Sampedoria, speranno ca ‘ncampiunato fósse tutta n’ata musica. Staveti bbe’. R.Bracale Brak