FIORENTINA – NAPOLI ( 29/02/16) 1 A 1 ‘A VEDETTE ACCUSSÍ

FIORENTINA – NAPOLI ( 29/02/16) 1 A 1 ‘A VEDETTE ACCUSSÍ N’ata meza delusione guagliù! Che nervatura; pare proprio ca ‘o Napule nun sape vencere cchiú e ppure ajeressera ô Franchi ‘e Firenze jette p’’o quarto ‘e bbullito accuntentannose ‘e ‘nu pareggio ca serve a ppoco p’’o pruggetto ‘mpurtante, visto ca ‘a vecchia zoccola – apprufittanno ca oramaje tutte ll’arbitre vestono Fiatta – vincenno ancora e mmagnannose ‘a scuatretta ‘e Mancini allungaje ‘o passo ‘ncrassifica e mmo, aje voglia ‘e metterle ‘o ssale ‘ncopp’â córa, aggio paura ca nun ll’acchiappammo cchiú! Cosicché ‘a trasferta d’ajere a fFirenze, cu ‘o punticciullo purtato â casa, fove overo ‘na meza delusione e servette sí e nno a mmantené Roma e fFiorentina a ddistanza ‘e sicurezza, bbona pe ddifennere ‘o siconno posto. E cchesto è ttutto! ‘Mmece s’êsse avuto ‘a jucà pe vvencere mettennoce cchiú ccazzimma, cchiú ccegna(grinta) e cchiú ddecisione, addó ll’unice ca jucajeno cu ‘o sanco a ll’uocchie foveno sulo ‘o Pipita e n’atu paro; troppe poche p’avé raggiona d’’a viola visto pure ca ‘o purtiere Tatarusanu se mettette a ffà ‘o fenomeno e ffacette tre mmiracule [duje addirittura dint’â stessa azziona ] levannoce tre ppallune dâ rezza. E i mo cu cchi m’’a piglio? Cu ‘o destino o cu sSarri? Cu ll’uno e ccu ll’ato! Pecché, a ‘stu punto, aggio paura ca, si è overo ca nun simmo state assaje furtunate, Sarri êsse avuto fa coccosa ‘e cchiú pe nnun farece sciupà e sprecà ‘na tempurata (stagiona) ch’êsse pututo farce sunnà ‘nu bbellu suonno. E sperammo ca me sbaglio! Passammo ê ppaggelle: REINA 6 - Pronte, partenza, via,e cquase subbéto pigliaje ‘nu stuco cu ‘na cabbesera (colpo di testa) ‘e chell’anema longa d’Alonso lassato sulo da Hysaj e sservuto ‘a Borgia Valero ‘ncopp’a ‘nu tiro ‘e squina (angolo) rijalato ê viola ‘a Caglecònno! Mo va’ a capí si, effettivamente, Pepe puteva fa coccosa ‘e cchiú…, ma i’ nun crero. Ascette cu ccarattere fora camma (area) respingenno ‘e capa e chiudette bbuono ‘o specchio a cKaliniccio e a tTello ca cuglietteno ‘o travesagno (traversa). Menu male! HYSAJ 5,5 Miezu zifo (voto) mancante pecché nun zumpaje a mmestiere e sse facette superà dô pallone destinato a Alonso ca futtette a rReina; p’’o riesto uffenzivamente se facette nutà sulo a ll’arrancua(nella ripresa),truvanno spazzio p’ arrivare a ccruzzà (crossare). ALBIOL 5,5 Le tuccaje ‘o cruato Nikola Kaliniccio e cce facette a spurtellate facennose nutizzià (ammonire); êsse avuto dà n’uocchio a Alonso ‘ncopp’ô tiro ‘e squina e nnun ‘o ffacette.’Ncumpenso ô finale levaje dô pere a ll’ecchese Dnipro, ‘na palla periculosa, ma cumplessivamente êsse avut’’a fa coccosa ‘e cchiú! KOULIBALY 6 - Teglio ‘o superaje ‘ntassezza (in velocità) doppo uittanta siconne, po Kalidoú accumminciaje a anticiparlo cu alicanza.Fove dô pere suojo ca partette ‘o lanzo ‘a do’ nascette ‘o pareggio doppo sissantotto siconne dô stuco viola. Tenette però ‘ncopp’â cuscienza ‘a fessaria ca cunzentette a cKaliniccio ‘e schiggià ‘o travesagno (traversa). Meglio d’’o cumpagno ‘e sezziona (reparto), a ll’arrancua (ripresa) cu ttanti cchiusure e ancerche (anticipi) riscattaje quacche prano (errore) d’’o primmo ajone (tempo). GHOULAM 5 - Turnato ‘ncampo dô primmo minuto, se ll’êtt’’a vedé cu ‘a tassezza (velocità) ‘e Teglio ca sistematicamente s’’o facette mettennolo spisso ‘ndifficultà comme ‘nnacccasione d’’o travesagno (traversa) cugliuto quanno Reina riuscette sulo a nchiuderle ‘o specchio.Jette ‘na cusarella meglio a ll’arrancua (nella ripresa) quanno apprussuraje(spinse) , ma fove poca cosa. Troppo poco! ALLAN 5 Serata no d’’o brasiliano ch’êsse avuto dà ‘na mana a ll’epata ‘e trancatura (alla fase di interdizione),ma ‘o ffacette poco o niente e addirittura, miso ‘ncajola dô centrocampo viola scumparette e nne venette fora sulo quacche vvota, ma cu ttroppa difficultà. [Dô 67' D. LOPEZ 5,5 Trasuto troppo tarde e cchiammato a rrompere ‘o pussesso palla d’’a Fiorentina,s’arrangiaje sbaglianno ‘nu paro ‘e purze (tocchi) facile facile] JORRGINHO 5,5 Nun pozzo darle ‘o seje pecché nun fove a ll’aldezza ‘e fruntiggià a mmestiere ‘o centrocampo cabbirro (tecnico) viola, patennone ‘a pressiona (pressing) e ffacennose spisso arrubbà ‘o pallone; p’’o riesto urtizzaje (verticalizzò) poco o niente. HAMSIK 5,5 Manco ‘o capitano s’ammereta ‘o seje pecché nun riuscette a rripetere ll’atalossa (prova) pusitiva furnita cu ‘o Villarreale,e ‘a primma vota ca lle riuscette ‘e farese nutà fove ô 42’ quanno cu ‘na cabbesera(colpo di testa) molla molla, doce doce cunzignaje palla ô purtiere viola e pp’ ‘o primmo ajone (tempo) chesto fove tutto; po pe ttutta ll’arrancua (ripresa)trutterellaje senza cegna (enfasi) e zzuco.Me fósse aspettato ato! CALLEJON 5,5 Miezu zifo (voto) mancante pe ddoje fessarie fatte i ‘a primma ce custaje ‘o stuco (gol) viola doppo ‘o tiro ‘e squina (corner) rijalato ‘a Peppe ‘a ‘nguenta e ccumplessivamente pe ttutte ‘e primme quarantacinche minute se vedette poco o niente. Cumbinaje poco pure a ll’arrancua (ripresa).Pure ‘a isso me fósse aspettato assaje ‘e cchiú, soprattutto sotto porta viola, ma chi t’’o ddà!? (Dô 77' MERTENS s.v.) HIGUAIN 7 Forze fove ll’unico a crederce i a mmetterce, ccegna(grinta) e ddecisione pe ttutta ‘a mubbara (partita) e nnun’appena ‘a viola signaje, nun ce vedette cchiú e sse menaje ‘nnante comme a ‘nu pazzo avventannose comme a ‘nu lione ‘ncopp’ô pallone respinto a bbienetenne da Alonso e mmettennolo ‘int’â rezza cu ‘na cagliosa dô lemmeto d’’a camma (area); êsse pure pututo cuncedere ‘o bbisso,quanno Insigne lle lassaje ‘na palla bbona, ma Tatarusanu, cu ‘nu miraculo, lle dicette ‘e no.Peccato!Ajeressera ll’êssen’avuto cercà cchiú spisso vista ‘a qualità d’’o Pipita e nce fósse vuluto uno adatto pe ffarlo cupulià (dialogare), ma Sarri nun tenette ‘o curaggio ‘e farelo tenennose ‘mpanca a gGABBIADINI (sv), trasuto sulo ô 90’ ô posto d’’o Pipita, cosa ca fove ‘na presa p’’o culo e nnun servette a nniente! INSIGNE 6 Se muvette assaje ‘ncampo,pure pe raffurzà ‘a catena difenziva dê pparte ‘e Teglio; n’apprezzaje ‘a bbona vuluntà difenziva , ma – uffenzivamente - se facette vedé poco e ccercaje ‘a porta sulo dint’ô recupero quanno Tatarusanu lle dicette ‘e no! SARRI 5,5 Lle mancaje ‘o curaggio e mme dètte ‘a ‘mpressione ca fósse juto a fFirenze p’’o quarto ‘e bbullito d’’o pareggio e cchillo se purtaje â casa, ‘mmece s’êss’avut’’a cercà ‘a nichemata (vittoria) migliuranno ll’epata (fase) ‘e custruzione senza farese scamazzà arreto e, ppe gghionta ‘e ruotolo, cu troppi pallune, pure facile, sbagliate; ssulamente doppo ‘na bbona ora se vedette ‘nu poco ‘e criscenza ‘e qualità e cquantità ‘e juoco;cumplessivamente però ‘o Napule nun êva maje sufferto tanto e mmo ‘e punti dâ juve addiventano tre, i ‘e mmubbare (partite) senza nichemata so’ addivintate cinque. Accussí nun va! Nun ce piace! Arbitro TAGLIAVENTO 5 ‘Stu tagliaperucchie ‘e Terni grossi ffetenzie nun ce ne facette, ma – pe ppartito pigliato – Siscaje sempe a ssenzo unico contro ‘e nuje. E ccu cchesto ve saluto guagliú, ddannoce appuntamento, si dDi’ vo’, â prossima doppo d’’o scontro cu ‘o Chievo ca sperammo ‘e farne unu muorzo turnanno finalmente a vvencere! Staveti bbe’! R.Bracale Brak