NAPOLI – VERONA ( 10/04/16) 3 A 0 ‘A VEDETTE ACCUSSÍ

Ora mo, guagliú, ‘o ssaccio ca [doppo d’’o risultato d’ajere ô san Paolo addó ‘o Napule, pure si orfano d’’o Pipita, asfaltaje pe ttre a zzero ‘a scuatra ‘e Del Neri, vestuta a llutto] v’êsse ‘a dicere: “Tutto a pposto!”’…o ssaccio, ‘mmece m’attoca ‘e dicere: “Peccato!” cunstatanno ca ‘e tre ppunte cunquistate ajere servettono sulo a cunfermarce ô siconno posto, visto ca sapato a ssera chillu granne mazzo rutto d’’a vecchia zoccola janca e nnera s’era cunfermato pure a mMilano contr’â scuatra d’’o zincaro, allunganno ‘o passo ‘ncimma â crassifica… Allora so’ custretto a ddicere: “Peccato!” ‘Nu poco ‘e pacienza; se vede ca accussí steva scritto e accussí êv’’a jí; êv’’a jí ciovè ca cchiú d’’o siconno posto ‘ncampiunato ‘sta tempurata (stagione) nun se puteva recogliere. ‘Nu poco ‘e pacienza; comme sapite ‘e cunte se fanno sott’ô lampione e nfi’ a ll’urdemo nun se po’ ddicere, pure pecché pare ca ‘a palla è ttonna… P’’o mumento cuntentammoce ‘e chello ca passa ‘o cunvento e ccercammo ‘e cuntinuà a vvencere. E ffacimmolo bbuono comme facettemo ajere ca liquidajemo ‘a pratica cu dduje stuche (gol) ô primmo ajone (tempo) e n’ato a ll’arrancua (ripresa), mantenenno acrata (inviolata) ‘a porta e ccunquistanno cu 66 stuche (gol) ‘o primmo posto comme meglio attacco e ccunfermanno cu 27 stuche (gol) a ll’uciuso (passivo) ‘o siconno posto comme meglia tràsera (difesa). Passammo ê ppaggelle: REINA 6 Ma sulo p’’a presenza ‘ncampo visto ca aveva ricuperato dô ‘mpiccio ô purpone, pecché po pe cquanto riguardaje ‘a mubbara (partita) nun êtte ‘a fà niente, rummanenno ô sole pe nnuvanta minute i ô cchiú ô cchiú arresecaje ‘na ‘nsulazziona! HYSAJ 6 -.Cupuliaje (duettò) a mmestiere cu pPeppe ‘a ‘nguenta e ppure si nun fove ‘nfra ‘e prutacuniste d’’o fullé (match) mustraje capa aveta e ccalma comme ggià ce à abbituato ‘stu guaglione arbanese! CHIRICHES 6,5 Carattere, fermezza e ddunnatezza (decisione) pure quanno trasette Pazzini; p’’o riesto fove sempe attiento sia arreto ca quanno ascette palla ô pere. ALBIOL 6 Padrona d’’a camma (zona) ‘e tràsera (difesa)cuntrullaje a mmestiere a cchi capitaje capitaje e soprattutto prestaje attenziona â tassezza (alla velocità) ‘e Gomezzo e dde Rebiccio! Strattunato dint’â camma ‘e ricore verunese s’abbuscaje ‘na nutazziona (ammonizione) ridicula visto ca accennaje ‘na prutesta cu n’arbitro ‘e linia mettennole sotto a ll’uocchie ‘a maglietta ca ll’era stata stracciata ‘a cuollo da ‘nu verunese cu ‘na trattenuta! Cose ‘e pazze! GHOULAM 6 Assaje migliurato dâ mubbara (partita) cu ll’Udinese appressuraje (spinse) bbuono ‘ncopp’â curzia soja, ma facette pochi cruzze (cross) decente. (Da ll'87' STRINIC s.v.) DAVID LÓPEZ 6 Atalossa ‘e sustanza (prestazione sostanziosa). ‘Ncampo a surpresa ô posto d’Allanno,dette ordine, mettenoce ‘o pere quanno fove nicessario, ma sbagliaje quanno Caglieconno ‘o servette ‘nnante â porta. JORGINHO 6 Pure jucanno ‘mmiez’â tenaglia d’’a pressione (pressing) ‘e ll’ecchese cumpagne suoje, riuscette a ttruvà ‘o spazzio justo andivinanno quase tutte ‘e pasiglie (passaggi). HAMSIK 7 - Atalossa ‘e cunsistenza (prestazione consistente),assaje meglio ‘e chella d’Udine: fove sempe presente dint’â manovra e dô pere suojo arrivajeno tre palle ‘mpurtante: ‘a primma ca purtaje ‘o stuco d’’o vantaggio, n’ata ca purtaje ô ricore e ‘a terza cu ll’ajuda (assist) d’’o tre a zzero. Applavuse! (Dô 79' CHALOBAH sv - Diece minute justo pe ddicere: ce stongo pur’i’) CALLEJON 6,5 Sempe pulitelico (prezioso) pure a ll’epata difenziva (in fase difensiva), se levaje ‘o sfizzio d’’o stuco facile facile e pp’ ‘o riesto se facette apprezzà p’’e muvimente, ‘e taglie o quanno cupuliaje (dialogò) cu ‘e cumpagne ‘e sezziona (reparto). Se ne vedette bbene ‘e Souprayenno nsi’ a custringerlo, cu ‘o ricore ca prucuraje a ffarese jettà fora! GABBIADINI 6,5 Sfruttaje bbuono l’accasiona avuta ‘e cumannà ll’attacco ô posto d’’o Pipita; assaje sfurtunato quanno cugliette ‘o palo, se fósse mmeretato ‘o stuco sulo p’’o muvimento fatto; Gollini ‘o stuppaje cchiú ‘e ‘na vota, ma po – dalle e ddalle – s’êtte arrennere quanno Manolo ce dètte ll’uno a zzero! (Dô 68' EL KADDOURI 6 – Se muvette bbuono, ma cuncretizzaje meno ‘e chello ca se fósse mmeretato.) INSIGNE 6,5 A ppietto d’’a mubbara d’Udine dètte quacche segno ‘e vita, ma ‘o zifo (voto) s’’o mmereta p’’a freddezza i ‘a pricisione ‘e quanno tiraje ‘o ricore senza farese ‘mpressiunà ‘a Gollini. CALZONA 6,5 Me facette ‘nu poco ‘e ‘mpressione vedé ‘nu rappresentante ‘e café ‘ncopp’â panca d’’o Napule; po rifrettenno ca sta ‘a paricchio cu Ssarri penzaje ca coccosa ‘e pallone ne capesse. Certo ‘a mubbara ‘a priparaje ‘o titulare, ma isso me parette ca gestiunasse (gestisse) bbuono ‘e cagne. l’arbitro CELI 5 Miezu scemo, me parette ‘o frate cucino d’ ‘o cummannate Schettino e nun sulo fisicamente... Scadente comme ô nuvantanove pe cciento ‘e ll’arbitre tagliane,êsse vuluto fà ‘o pignuolo e ‘o pricisino, ma sbagliaje quase tutto,e ppe furtuna però nun sbagliaje ô mumento d’’o ricore, ma smarrunaje assaje nutizzianno (ammonendo) ad capocchiam a Albiollo;p’’o riesto po spisso ‘ntralciaje pure ‘a manovra, mettennose ‘mmiezo senza scanzarse! E cu cchesto cunchiudenno ve dico ca ajere s’êv’’a mannà ‘na mmasciata â scuatra ‘e Spalletti e ffove fatto! Mo sperammo sulo ca doppo d’’a trasferta a mMilano contr’â scuatra ‘e chillu nnacchennello ‘e Mancini ce cunfermammo. Comme è ppussibile e cu ll’ajuto d’’o Cielo, accussí sperammo. Staveti bbe’ Raffaele Bracale Brak