ROMA – NAPOLI (25.04.16) 1 - 0 ‘A VEDETTE ACCUSSÍ

ROMA – NAPOLI (25.04.16) 1 - 0 ‘A VEDETTE ACCUSSÍ Che peccato e cche ccollera guagliú! I’ ancòra nun ce pozzo credere.C’è ppoco ‘a fà: nun tenimmo cazzimma i ‘e llezzione ca avimmo nun ce servono a nniente! Era ggià succieso a tTurino contro â vecchia zoccola ‘e perdere a ll’uttantuttesimo e ajere cuncedettemo ‘o bbisso! E cche saciccio! Perdere ‘na mubbara (partita) comme a cchella d’ajere e pperderla comme se perdette... pe uno a zzero a ll’urdemu minuto, nun sta nè ‘ncielo e nnè ‘nterra. Eppure succedette! Pe gghiella, pe sfurtuna e ppe fessaggine succedette ca doppo d’avé duminato pe nuvantotto minute e avé fatta ‘a mubbara (partita), doppo d’essere pure riuscite a ssignà senza però ca ll’arbitro cunvalidasse pe n’attasallulo (fuorigioco) ca ô nuvantanove pe cciento nun ce steva,o, si ce steva, fove ‘e cinche centimetre..., succedette ‘o llutto cu ttutto ca pe n’ati ddoje o tre vvote ‘o Pipita jette vicino a mmettere ‘a palla dinto i ‘o purtiere rumanese facette miracule. E ffove accussí ca a ll’uttantanuvesimo, cu ll’unica azziona ca facette e mme parette pure ca ce stette n’attasallulo (fuorigioco) nun visto e nnun siscato , e ccu ll’unicu tiro ‘mporta fatto ‘a Roma vincette e nnujeaute perdettemo ‘na mubbara (partita) ca nun s’êsse maje avuto ‘a perdere! E cche ccacchio! Nce ponno cchiú ll’uocchie ca ‘e scuppettate! ‘A Roma nun se mmeretava ‘e vencere e nnun facette niente pe vvencere, ma se vede ca Spalletti e ssocie teneno ‘nu mazzo quanto Porta Capuana, mentre Sarri i ‘o Napule s’ànn’’a fà bbenedicere assulutamente! A ‘stu punto votta a fferní ‘stu campiunato speranno ca cu ll’urdemi ttre mmubbare ca rummanono se riesce a mmantené chilli tre ppunte ca ce perrmettono ‘e stà ô siconno posto ‘ncrassifica. Accussí sperammo! Passammo ê ppaggelle: REINA 5,5 Maje ‘mpignato seriamente pe ttutt’’a mubbara (partita)nun ce putette fà niente ‘ncopp’ô tiro a ffilo ‘e palo ‘e Nainggolanno.Ma ‘a sfarma (colpa) nun fove soja, ma ‘e chi facette tirà ‘o nnacchennello rumanese. Che peccato! HYSAJ 6 Rialaje ‘nu pallone a sSalàh, ca pe furtuna jette fora. Assaje bluccato ‘ncopp’â fascia,fove prutacunista ‘e quacche bbona chiusura ‘ncopp’a El Shaarawy. ALBIOL 6,5 Se facette truvà sempe ô posto justo, ô mumento justo, sbaglianno quase niente. Ascette spisso dâ camma palla ô pere cu ppasiglie (passaggi) ‘nduvinate KOULIBALY 7 Comme ô cumpagno ‘e sezziona (reparto) nun sbagliaje nisciunu ‘ntervento pe ttutto ‘o fullé (match). GHOULAM 6 S’ ‘a vedette ‘e bbello cu Salàh, Florenzi, Maiconno e ppure Pjaniccio; appressuraje (spinse) paricchio ‘ncopp’â curzia soja pe ttutt’ ‘o primmo ajone (tempo) e a ll’epata difenziva (in fase difensiva) nun ‘a facette bbona a nnisciuno nsi’ a ffarese nutizzià (ammonire)pure ‘e nun fà passà ll’eggizziano. Bravo! ALLAN 6 – Facette a spurtellate cu cchi capitaje capitaje fruntiggianno tutto ‘o centrocampo rumanese. Múfeto (utile) comme a ppoche [Dô 79' D. LÓPEZ 4,5 Trasuto nun saccio pecché, facette ‘na grossa fessaria quanno, pe gghí inutilmente a redubblà (raddoppiare) ‘ncopp’a Salàh, lassaje spazzio a nNainggolano p’’o tiro d’’o stuco (gol)] JORGINHO 6 S’’a vedette cu Nainggolanno e ccu pPerotti, ma riuscette ô stesso a ffà ‘o mestiere suojo crijanno cchiú n’accasione ‘e stuco (gol) comme a cchella ca mettette ‘o Pipita ‘nnante â porta [Dô 90' GABBIADINI sv] HAMSIK 5 Nun me sento ‘e metterle ‘e cchiú visto ca pe tutt’’a primma mez’ora nun se vedette quase; se scetaje ô pprincipio d’arrancua (ripresa), ma fove fuoco ‘e paglia e se facette anticipà ‘a Rudigerro arrivanno tarde ‘ncopp’a ‘na palla, custruita dô Pipita, ca s’êsse avuto sulo menà dinto. Pe nnun ddicere ca ô finale ‘e mubbara (partita), ‘mmece ‘e correre, cammenaje e dètte cchiú cupertura; ‘nzomma festiggiaje malamente ‘e quattuciento mubbare cu ‘a maglia cuana (azzurra) sbaglianno diciotto pasiglie (passagge) ‘ncopp’ a sissantotto! CALLEJON 6 - Pruvaje a cupulià (dialogare) cu mMertenso e rrestaje a gguardia d’’a curzia soja. Truvaje pure a porta i ‘o stuco (gol), ma [chi sa’ comme...] ‘o signalinia e ll’arbitro vedetteno ‘nu denucchio d’’o suojo nn’attasallulo (fuorigioco)! E cche sfardella! HIGUAIN 6,5 – Turnato dâ scualifica êsse vuluto spaccà ‘o munno, ma avette pochi accasione adatte però ddoje o tre vvote spaventaje ‘a trasera (difesa) rumanese e ppe ddoje vote fove fermato miraculusamente dô purtiere pulacco Szczesny; custruette ‘na palla d’oro ca Marekiaro nun cuncretizzaje. MERTENS 6,5 - Cunfermato dô primmo minuto doppo ‘e ll’atalossa diapresa (prestazione sontuosa ) cu ‘o bBulogna, facette ‘na bbona mubbara (partita) e lle mancaje sulo ‘o stuco (gol). Peccato! [Dô 74' INSIGNE sv] SARRI 5 Priparaje bbuono ‘a mubbara (partita), cercanno ‘e cuntené pe po arremarrà (ripartire), ma purtroppo ‘e suoje mancajeno ‘e cuncretezza; però isso tenette ‘na grossa sfarma (colpa) e ciovè chella ‘e nun avé ‘mmezziato ê suoje ca, arrivate a ll’urdemi tre mminute ‘ncopp’ ‘o zzero a zzero senza essere riuscite a ssignà, ‘o pallone se jetta fora, se mena ‘ntribbuna, se schiatta e sse mena dint’ ô cesso, ma nun se permette a ll’avverzario ‘e tirà ‘mporta e sse mette ‘o pulmanno ‘nnant’â porta ‘e Reina e ppe ffà chesto ‘mmece ‘efà trasí a gGabbiadini ô nuvantesimo, a ll’uttantesimo se fa ascí ‘o capitano ca oramaje cammenava e sse fa trasí El Kadduri a ffà trancara(muraglia)! N’ atu trainerro chesto avesse fatto! Arbitro ORSATO 4 E nnun me facite parlà! E ccu cchesto ve saluto e, ccu ‘o vveleno ‘mpont’ô musso, vve donco appuntamento, si dDi’ vo’, a mmarterí ca vene doppo d’’o scontro casalinco cu ll’Atalanta. Staveti bbe’. R.Bracale Brak