PESCARA – NAPOLI (21/8/2016) 2 A 2

PESCARA – NAPOLI (21/8/2016) 2 A 2 Eccuce cca guagliú! Pe grazzia d’’o Cielo ce simmo ‘ntise n’ ata vota e sperammo ‘e senterce nsino ô prazzo (fine) ‘e ‘stu campiunato ca ce vede orfane ‘e chillu chiachiello d’’o Pipita ca [nun s’è ccapito si pecché ll’è ppiaciuto o si pe ffà ‘nu favore a cchillu magliaro d’’o presirente] se nn’è gghiuto cu ‘a zoccola janca e nnera.Peggio pe isso! Chella cammisa ca nun vo’ stà cu tte, stracciala e ghiettala! ‘A furtuna nosta è stata ca simmo, p’’o mumento, riuscite a trattené allimmeno pe n’ato anno a cKoulibalý,a gGabbiadini, a Insigne, a cCagliecònno, ca Marekiaro à firmato nsi’ a cquanno se fa viecchio, ca Reina nun è overo ca s’è prumiso ô Barcellona e ca Sarri nun mena cauce. Certo ‘e jucature accattate so’ ppoche e ancòra ànn’ ‘a dimustrà d’essere overamente bbuone...., ma i’ tengo cunfianza (fiducia)[visto ca Sarri ce sape fà] ca riuscimmo a ffà ‘nu bbuonu campiunato cu ‘nu piazzamento pure meglio ‘e chillu passato,cu ttutto ca chist’anno ce ll’âmm’’a vedé nun sulo cu ‘a solita vecchia zoccola, ma pure cu cchell’ata scuatra ‘e mariuole ‘mbrugliune, ciovè cu ‘e capituline ‘e Spalletti ca sàpato passato tanto p’accummincià cu ‘o pere justo se facetteno accumpagnà ‘a chella mmunnezza ‘e di bello a vvencere ‘ncuollo a ll’udinese cu dduje ricure rialate mentre a ll’Udinese mancajeno ‘nu ricore sacrusanto ‘ncuollo a Widmerro e ‘nu tummolo e ‘na sporta ‘e timmurrie (punizioni) ‘ncuollo a zZapatone ca fove privo ‘e tuccà ‘nu pallone ca subbeto manolasso o vermaelenne ‘o tampunajeno i ‘o menajeno ‘nterra senza ca di bello vedesse o dicesse niente... Cu ttutto ciò so’ cunvinto e ttengo cunfianza (fiducia) ca riuscimmo a ffà ‘nu bbuonu campiunato e ca dicimmo ‘a nosta cu ‘a coppa itaglia e cu ‘a Ciampionsa pure si ajere a pPescara, soprattutto pe sfarma (colpa) ‘e Sarri [ca sbagliaje furmazziona] nun s’ accumminciaje cu ‘o pere justo e ‘mmece ‘e vencere ce facettemo fermà ‘ncopp’ô ddoje a ddoje e c’êttem’accuntentà ‘e ‘nu pareggio scartellato ca pe mmo ce tène fremme a ccentro classifica ggià dduje passe arrete a ttanti ati scuatre. Certo dispiace, ma tiempo ce sta p’adderezzà ‘a varca e ppo se sape ca ‘e scuatre ‘e Sarri nun partono maje súbbeto forte. Scurciammoce ‘e mmaneche e dâ mubbara (partita) ca vene dàmmoce ‘a fà pe ddimustrà ca nun simmo sicunne a nnisciuno! Allimmeno accussí spero. Passammo ê ppaggelle: REINA 6 Nun avette ‘a fà ‘e straurdinarie e nnisciuno d’’e duje stuche (gol) pigliate foveno sfarma (colpa) soja HYSAJ 6- Ô pprincipio se facette vedé assaje poco ‘ncopp’â curzia soja ma quanno po se decidette a gghiucà, pure si fove ggià ttarde, dimustraje d’essere ‘e bbona pasta. ALBIOL 5,5 Purtroppo nun me facette vedé ‘na granna mubbara (partita) né pe ll’armaddia (fisico) né dô punto ‘e vista mentale. Vuó vedé ca steva cu ‘a capa a n’ata parta e ca ‘a quistione d’’o rinnovo (visto ca p’’o mumento nun vo’ firmà) ‘o disturbaje? KOULIBALY 5,5 Forze sta ancòra a ccurto ‘e priparazziona, ma cert’è ca êttem’aspettà ll’arrancua (ripresa) pe vvederlo ‘e accumincià a gghiucà comme sape,ma quanto sufferette ce facette suffrí durante ô primmo ajone (primo tempo) ‘ncopp’ê repartite (ripartenze) d’’o Pescara. GHOULAM 5,5 Partette bbunariello cu quacche bbona ghera (incursione) ‘ncopp’â fascia ma, passanno ‘e minute venette meno dint’ê mmecce e ss’ammusciaje senza ‘ncarrarne cchiú una! ALLAN 5 Nun fove certo ‘na granna antraffa (gara) ‘a soja: se vedette assaje poco a dritta e ggiraje a vvacante a centrocampo; troppo poco! VALDIFIORI 4 Nun se putette guardà; aizaje porvere e soprattutto quanno ‘o Pescara mettette ‘o pere ‘ncopp’a ll’accelleratore, isso jette dint’ê chiavette dimustranno ca ‘o Napule nun po’ ffà a mmeno ‘e Giorgigno e ca sSarri à dda truvà a n’ato pe sustituirlo quanno ‘o brasiliano manca, pecché ‘stu valdifiori cca, pe mme po’ ppure cagnà mestiere ! HAMŠÍK 5,5 Peccato! Pure ‘o capitano venette meno:accumminciaje sí cu ‘o pere justo cu ‘na cunchiusione ca facette ‘a bbarba ô palo, po se facette ‘a parte senza maje trasí dint’ô juoco d’’o Napule. (dô 72’ ZIELINSKI 6,5 Dette cchiú cunzistenza ô centrocampo, facennose vedé dint’â camma ‘e ricore d’’o Pescara addó cunquistaje pure ‘o ricore d’’o pussibbile tre a ddoje ma purtroppo chella mmunnezza ‘e Giacomelli, ‘nzurfato ‘a Rocchi, primma ce ‘o dette e ppo se ricusaje dimustranno d’essere curnuto pecché – comme diceno pure a rRoma - chi ci ripensa è cornuto). CALLEJÓN 6- D’’e tre nassíe (attaccanti) titulare fove chillo ca faticaje ‘e cchiú cercanno ll’adaffo (gol), sfresannolo (sfiorandolo) cu ‘nu granne tiro a vvolo,pruvannolo pure ‘e cabbesera (testa) e crijanno ll’affiradde (i presupposti) p’’e ‘nzertamiente (inserimenti) d’’e cumpagne. Peccato ca tutt’’a fatica fove sprecata p’’a primm’ora d’antraffa (gara). GABBIADINI 5 Nun s’affamuliaje né ccu Insigne né ccu Cagliecónno dànno ‘a dimustrazziona ca nun è ‘na primma nassía(punta) comme serve a nnuje ‘A sensazziona fove ca Milikco è cchiú adatto d’isso a ffà chellu spezziale lla! (dô 53’ MILIK 6,5 Nun signaje, ma dètte garanzia ‘e cchiú muvimento dint’â camma (area) avverzaria). INSIGNE 5 - Tanti sische pe lLorenzigno e ttutte mmeretate! Aizaje troppa porvera senza cunchiurere niente; jucaje comme si fósse stato sulo,senza metterese a ddisposizziona d’’a scuatra.E va truvanno pure scescé addimannanno ‘a lecca i ‘a mecca... Ma fance sta’ cuiete Lorenzí: va’ arruobbe dint’ê cchiese! (dô 53’ MERTENS 7 Se dimustraje súbbeto uno d’’e cchiú ppronte e nicessarie:trasette e ssignaje súbbeto ‘e duje adaffe (gol) ca salvajeno ‘o Napule.Se prucuraje pure ‘nu ricore sacrusanto ca però chillu cecato ‘e Giacomelli nun vedette o vulette vedé). All. SARRI 5 Sbagliaje ‘a fumazziona ‘e partenza e ppe mmetterce ‘na pezza ffove custretto a ccagnà levanno dô campo a Insigne, a gGabbiadini i a mMarekiaro. P’’o riesto tutt’’a scuatra me parette ca nun tenesse urganizzazzione ‘e juoco e ognuno facesse comme si ll’ate nun ce stesseno! E accussí nun va!!! Arbitro GIACOMELLI i ‘a CHENCA SOJA 2 Fesso, chiachiello e ccecato; fesso e chiachiello pecché quanno Zielinski fove cauciato ‘nfaccia dint’â camma ‘e ricore, isso apprimma siscaje ‘o ricore e ppo se ricusaje facennose mettere ‘e ppurpette ‘mmocca ‘a chell’ata granna chiaveca ‘e rocchi ca chi sa che ll’ammezziaje; e uno ca se fa mettere ‘e ppurpette ‘mmocca e sse ricusa , nc’è ppoco ‘a fà, è ffesso e chiachiello; cecato po pecché sul’isso nun vedette o nun velette vedé quanno ‘o purtiere Bizzarri acchiappaje pe ‘nu pere a mMertens e s’’o carriaje ‘nterra! A ‘stu punto pozzo sulo dicere ca si ‘o bbongiorno se ve dâ matina, stammo cu ssette parme ‘e cacchie, visto ca ggià sulo doppo ‘a primma mubbara (partita) stammo ‘ncrerenza ‘e ‘nu paro ‘e ricure... Voglio proprio vedé da mo nsi’ ô prazzo (fine) d’’o campiunato addó jammo a fferní. E fermammoce cca. ‘O Napule torna a gghiucà p’’o campiunato sapato ca vene e ppirciò si dDi’ vo’ ce sentimmo dummeneca ca vene e spero ca ve pozzo cuntà ca ‘o Napule à vinciuto cu ttutto ca sàpato ce ‘a vidimmo cu ‘o Milanno ch’ è ‘nu bbrutto accunto (cliente)! Staveti bbe’. R.Bracale Brak