ATALANTA – NAPOLI (02/10/16) 1 A 0

ATALANTA – NAPOLI (02/10/16) 1 A 0 ‘A VEDETTE ACCUSSÍ Tengo ‘o bbeleno fino a ‘mpont’ô musso guagliù e stongo a llutto cu ‘na collera ‘ncuorpo ca mo chi sa’ quanno me passa e ssi me passa! E ttutto chesto pecché pe mme perdere cu cchilli quatto zappielle d’’a scuatra assineja (satellite) d’’a vecchia zoccola e pperdere cu cchella faccia ‘e pesta ‘e Gasperini è ‘na cosa ca nun se ne po’ scennere, nun riesco a mme ll’agliottere; e ‘mmece proprio chesto succedette ajere a ll’ora d’’a tiella quanno ‘e tanti cestarielle ca ‘nnitaglia ce meneno seccia ce cuglietteno i ô Napule nun ll’abbastajeno uttantasette minute pe recuperà ‘nu scalugnato stuco (gol) zezzuso pigliato pe scagno, pe ‘mmano ‘e Petagna, a ll’uttavo minuto , doppo ‘na sfurtunata sponna nun vuluta fatta ‘a Ghoulammo ca nun cuntrullaje ‘e faccia ll’unicu pallone mancato ‘e capa da Koulibalý; i accussí se perdette e nujeaute ‘ntribbuna divano ce ‘ntessecajemo ‘a festa d’’e nonne vedenno ‘o Napule scennere ‘ncampo i aizà porvera pe ttutto ‘o primmo ajone (tempo) ‘mpignanno a bBerisha sulo ‘nu paro ‘e vota senza riuscí a ffà ‘o Napule e ffacennose mettere sotto, visto ca po a ll’arrancua (ripresa) Gasperini ‘nfultette àncora ‘e cchiú ‘a mediana i ‘o Napule dimustraje ‘e nun essere attrezzato pe cumbattere ‘o catenaccio. ‘Ncuncrusione ‘o Napule ca ‘ncampiunato era ll’unica scuatra maje sderrata (sconfitta), perdette ‘stu primato e ppure rummanenno siconna ‘ncrassifica vedette ‘a vecchia zoccola alluntanarse ‘e quatto pusizzione e mmo diciteme vuje si aggio o nun aggio raggiona a ssènterme a llutto? Passammo ê ppaggelle: REINA 6,5 -Facette dduje mmiracule ‘na vota cu Gomezze e n’ata vota cu Dramè, ma nun ce putette fa niente ‘ncopp’ô stuco (gol) ‘e Petagna ca tiraje libbero e franco troppo ‘a vicino; p’’o riesto cchiú ‘e n’ asciuta e ttanti pallune ggestiunate (gestiti)ô lemmeto d’’a camma (area). HYSAJ 5 Nun fove sempe mascullo (lucido) e ssufferette troppo ‘ncopp’â curzia soja ‘e ttacaddamme (progressioni) ‘e Gomezze, comme ‘nnaccasione d’’o stuco (gol) e a ll’epata enercetica (in fase propositiva) nun se vedette quase. MAKSIMOVIC 5,5 – Jucaje tanti pallune visto ca Koulibalý,steva ‘mpignato a ttentà ‘e mettere ‘a musarola a pPetagna e nne purtaje quaccuno annante, pure si cu ppocu zuco. KOULIBALY 5 Sfurtunato, mancaje ‘e capa ‘nu pallone sulamente passato troppo auto ‘e cinquanta centimetre, ma fove chillo ca Ghoulamme nun cuntrullaje e cce custaje ll’àzzimma (sconfitta); p’’o riesto ce mettette ll’armaddia (fisico) nicessaria pe lluttà cu pPetagna. GHOULAM 5 ‘E bbuono ‘nu bbellu tiro ‘e timmurria(punizione) fermato però da chell’anema longa ‘e Berisha; nun ce pozzo però perdunà ‘o mancato cuntrollo ‘e faccia che furnette palla a pPetagna ca ce ‘o mettette a ppitoffio; p’’o riesto pure si jucaje ‘nu tummolo ‘e pallune ‘ncopp’â mancina, ‘e bbassurere (suggerimenti) suoje mucaffite (scontati) a ccentro servetteno sulo â trasera (difesa) atalantesa, ca ‘e ppigliaje tutt’essa. ZIELINSKI 6 Uno d’’e poche a ssalvarese; se ‘mpignaje cu ccegna (grinta) a centrocampo, tentanno sempe ‘e cagnà passo; ce riuscette però senza truvà maje cullabburazziona dê cumpagne! JORGINHO 5 Jurnata no p’’o brasiliano ch’io êsse cagnato assaje primma d’’o sittantaduesimo, visto ca turmentato a ttutto campo da n’ommo nun riuscette a ffà ‘o solito juoco suojo e se dimustraje pure a ccurto ‘e sciato.[dô 72'st GABBIADINI 5,5 Trasuto tarde, servette a ppoco o niente, luttanno e ggestiunanno (gestendo ) quacche ppallone ô lemmeto d’’a camma (area), ma senza maje riuscí a arrivà a ttirà.] HAMSIK 5,5 Pure isso a ccurto ‘e sciato facette poco cercanno ‘e mettere ordine, ma cu ppoco zuco; cca e lla sparacchiaje, ma a ssalve, quacche ppallone ‘a fora, mannannole luntano dê pale. CALLEJON 5,5 Avette ‘na sola bbona accasiona, ma nun ‘a sfruttaje; p’’o riesto o sciupaje tiranno fora o se facette sgamà ‘e ‘ntenzione e ffacette ògne vvota ‘nu bbuco dint’ a ll’acqua. [dô 54’ MERTENS 5,5 Facette sì e nno ‘nu poco cchiù ‘e muvimento, ma pur’isso accucchiaje poco.] MILIK 6 Ô ssolito nunn’ ‘o cercajeno e nnun lle detteno pallune ‘a jucà, ma isso se ‘mpignaje ô stesso luttanno cu ccegna (grinta)e ffove suojo ll’unicu tentativo manuvrato periculuso cu ‘na bbella cunchiusiona mancina ca custringette a bBerisha a ffà ‘o fenomeno. INSIGNE 5 Quacche ccusarella ‘a facette ô pprincipio d’’a sibbacca(gara) e “ qui fu Napoli!”; po doppo addizziunaje sulo palle perze senza maje riuscí a zzumpà ll’ommo e nun dette maje ‘a ‘mpressione d’essere priculuso; ‘nzomma ‘nfra ‘e cchiú ppirre (peggiori),pure quanno cagnaje curzia [dô 34'st GIACCHERINI sv] SARRI 4,5 Ll’itimma (responsabilità) ‘e ll’azzimma (sconfitta) d’ajere fove soja e ssulo soja pe ttre bbuoni mutive: mazzeca e uno nun facette tutto ‘o rutizzio (turnover) nicessario visto ca cchiù d’uno d’’e suoje steva a ccurto ‘e sciato, mazzeca e ddoje se decidette a ffà tarde tutte ‘e bbadille (sostituzioni) ca facette, mazzeca e ttre, [ca po è ‘a cchiù ‘mpurtante!] nun s’è ‘mparato ancora ca ‘e ssibbacche (match)se venceno a ccentro campo e ssi vaje a gghiucà contro a ‘na scuatra ca fa catenaccio e sse prupone cu ‘nu cinche, quatto, uno, ‘a primma cosa hê ‘a fà, hê ‘a dà sustanza â mediana cu ggenta tosta e ccu ‘e ppalle; certo nun dipennette da isso ca Koulibalý nun arrivaje a zzumpà ‘o nnicessario pe taraddà (intercettare) ‘a palla ‘e Gomezze, nè dipennette da isso si Ghoulamme se facette surprennere e nun cuntrullaje ‘e faccia chillu pallone, ma si isso avesse cchiú sustanza â mediana, cu ‘o cacchio ca Gomezze êsse pututo dà tant’apprietto ô terzino nuosto; ‘nzomma comme jette e ccomme venette ‘o Napule s’êtt’’a chiejà a llibbretta n’azzimma (sconfitta) ca se fósse pututo sparagnà i a ‘stu punto ‘a facenna s’è ffatta overo marrò visto ca ‘a zoccola à allungato i oramaje stammo sentenno ‘ncopp’ê spalle ‘o sciato ‘e Roma, Lazzio, Chievo e mMilanne e, pe gghionta ‘e ruotolo Sarri à fatto n’asciuta a ppaparelle cundicenno ca ‘a vecchia zoccola è dde n’atu pianeta! E ggrazzie ô cacchio! Si tu faje ‘e tutto pe pperdere! Ma miettatenne scuorno e ddatte a ccapate dint’ô muro d’’o gurfaccale (spogliatoio)! Arbitro RIZZOLI 5 ‘e stima. Carta cunusciuta e nnun ne parlo! E fermammoce. Mo ‘o campiunato se ferma pe ffà spazzio a cchillu scassamiento ‘e saciccio d’’a nazziunala tagliana ca a nnuje nun ce ne fótte proprio e ppirciò si ‘o Signore ‘o vvo’ ce sentimmo dummeneca sedice uttombre doppo d’’a mubbara (partita) manzilla (casalinga) contro â Roma speranno ca ‘ncasa ‘o Napule torna a ffà ‘o Napule e vvence sempe ca nun ce mannano n’ato arbitro rumanese/jummerdino! Staveti bbe’! Raffaele Bracale Brak