BESIKTAS - NAPOLI (C.L. 01/11/16) 1 A 1 ‘A VEDETTE ACCUSSÍ

BESIKTAS - NAPOLI (C.L. 01/11/16) 1 A 1 ‘A VEDETTE ACCUSSÍ Niente ‘a fà guagliú! Chella d’ajere avesse avut’’a essere ‘a sibbacca (incontro) d’’o rascietto (riscatto) pe llevarce ‘e pacchere ‘a faccia pigliate dê turche ô san Paolo ê diciannove d’uttombre passato, ‘nzomma ajere ‘nTurchia s’êsse avut’’a vencere e ‘mmece c’êttemo accuntentà sulo ‘e russimmà(pareggiare) e ffove furtuna pecché stevemo pure abbuscanno pe bbia ca cu ttutto ca ‘o Napule êva duminato pe ttutt’’a mubbara (partita) nun era riuscito a ttruvà ‘na fetenzia d’adaffa (rete) visto ca ‘o rammo (tridente) nuosto d’ ujummo (attacco) sparaje a ssalve sciupanno cchiú ‘e n’accasione e arrivate ô 79’ chella mmunnezza cu ‘a nocca ‘e ll’arbitro ‘ngrese [po ve dico...] ce siscaje ‘nu ricore contro ca Quaresma mettette dinto cosicché êttem’’a ringrazzià ô Cielo si tre minute doppo Marekiaro trauvaje ‘nu granne tiro ‘a vinticinche metre e ffinalmente ce ‘o mettette a ppitoffio ô purtiere Fabri, d’’o Besiktas,ca nsi a ccillu mumento nun aveva avut’’a fà nè ll’urdinario, nè ‘o straurdinario. Tutto summato pirciò putimmo parlà ‘e ‘nu periculo scanzato cu ‘nu russimmo (pareggio),cchiú ca mmeretato,ca ce cunzente ‘e restà ‘ncimma ô javallo (ggirone) pure si a pparo cu ‘o Benfica. E ttutto chesto pecché, guagliú cunvincimmoce, pe vvencere nun bbasta duminà e gghiucà bbuono pe ttutt’’a mubbara (partita) comme suddedette ajere , ma s’à dda pure menà ‘o pallone dinto e ppe ffarlo ce vonno ‘e nassie (goleador), ll’artigliere (attaccante) overe e nun ce se po’ arrangià frijenne ‘o pesce cu ll’acqua! Tanto ditto, passammo ê ppaggelle: REINA 6 Peccato p’’o ricore: c'era quase arrivato e ppe ppoco nun ‘o fermaje. P’’o riesto, come spisso lle càpita, se trattaje sulamente ‘e nurmale amministrazziona. HYSAJ 6,5 –‘A chiena i ‘a vacante, ma cumplessivamente atalossa (prestazione)aunesta,senza nisciuno prano (errore) ‘mpurtante; anze decidette ‘e fà pure ll’ommo jusaida (uomo-assist)comme quanno dette ‘na granna palla a pPeppe ‘a ‘Nguenta ca però spricaje. MAKSIMOVIC 5,5 Miezu zifo (voto) mancante, no pecché fove prutacunista ‘nvuluntario ô 79’, cu cchillu vraccio auto, d’’ ‘mpiccio ca ce steva custanno ‘a sibbacca (incontro), ma pecché p’’o riesto nun me parette assaje sicuro accussí cumme ô cumpagno ‘e sezziona (reparto). KOULIBALY 5 Serata no p’’o cumpagnone ‘e Maksimoviccio ca cchiú ‘e ‘na vota me facette tremmà; pe ffurtuna primma Hutchinson(ne) e ppo Aboubakar(re) nun apprufittajeno ‘e ddoje fessarie soje. GHOULAM 5,5 Miezu zifo (voto) mancante pecché se facette nutà annante spicialmente a ll’arrancua (ripresa) cu cchiú ‘e ‘nu jabbro (cross) mettenno paura â tràsera (difesa) turca, addereto però avette quacche prubblema cu qQuaresma e cu bBeck(e). ALLAN6 Nsi’ a cquanno ce ‘a facette, ‘a presenzia soja se sentette ‘mmiezo ô campo, sia a ll’epata (in fase) ‘e trancara(contenimento) ma pure ‘e daratanna (gestione) d’’o pallone, truvanno quacche bbuonu bbassurero (suggerimento) p’‘o rammo (tridente) nuosto d’ ujummo (attacco). [da ll'81' ZIELINSKI s.v.] JORGINHO 5,5 Purtroppo cuntinuaje ‘o mumento dellicato d’’o brasiliano: faticaje a urganizzà ‘o juoco comme ‘mmece faceva nsi’ a quache semmana fa e sbagliaje cchiù ‘e ‘nu pasiglio (passaggio) [dô 79' DIAWARA s.v.] HAMSIK 7 A ppietto d’’o Marekiaro ca simmo abbituate a vvedé, pe bbona parte d’’o fullè (gara)nun se facette né nnutà, né apprezzà; però po a ll’82’ ‘ncarraje chillu granne tiro ‘a vinticinche metre ca servette ffinalmente a mmettercelo a ppitoffio ô purtiere Fabri, rijalannoce ‘nu russimmo (pareggio) mmeretato e assaje ‘mpurtante CALLEJON [Peppe ‘a ‘Nguenta] 5,5 - Miezu zifo (voto) mancante pecché si ô ssolito ce mettette corza e rrebbà(voglia) lle venette a mmancà ‘a pricisione sotto porta comme quanno pe ddoje vote avette ‘a furza (opportunità) ‘e signà e nun ‘a sfruttaje. E cchesto ‘nu nassia (goleador) nun ‘o ppo’ ffà!! GABBIADINI 5 Nun ce simmo, nun ce simmo! Chisto nunn’ è ‘nu vero marcazzo (centravanti)! N’ata atalossa (prestazione) senza zuco nè ccunnimma. Spaisato e ppoco cuncreto, ‘ncopp’ô zzero a zzero, lle capitaje ‘na granna accasione pe ppurtà ‘nnante ‘o Napule ma nun truvaje ‘e meglio ca farese ‘ncantà dô purtiere Fabri e mullarle palla. Cose ‘e pazze! Da chillu mumento nun riuscette cchiú a ffà niente e ‘ncapo ‘e n’ora Sarri fove custretto a ccagnarlo.[dô 63'MERTENS 5,5 - Miezu zifo (voto) mancante pecché è overo ca cercaje ‘e dà ‘nu poco d’aria fresca a n’ujummo (attacco) ca affannava, ma lle riuscette sulo quacche bbuonu zarfo (scambio) cu Insigne ca però , miso ‘ncundizziona ‘e cunchiudere, sbagliaje e ‘nu tentativo perzunale suĵo risultato ‘mpriciso.Troppo poco!] INSIGNE 6,5 - Sfresaje (Sfiorò) 'o stuco (gol) allimmeno ddoje vote, ma difettaje 'e pricisione dimustranno 'e tené ll'idee, soprattutto taglianno pe Caglieconno , ma 'a cuncretezza no! Proprio a 'o 93' sfresaje (sfiorò) 'o stuco (gol) a ggiro ca nce avesse dato 'e tre ppunte. Forze aggio esaggerato cu 'o zifo(voto), ma ll'aggiu fatto pe nun sentì 'e ppruteste 'e quacche amico. All. SARRI 5,5 Miezu zifo (voto) mancante, ma nun tanto p’’o risultato visto ca ajere ‘o Napule servennose d’’e forze ca isso tene, fove miso bbuono ‘ncampo, rummanenno urganizzato, ma pecché, ‘ngenerale, perduto sant’ Arcadio, nun aizaje ‘a voce cu dela p’avé ‘nu vero marcazzo (centravanti) e ccuntinua a difennere a gGabbiadini ca nun s’’o mmereta! Arb.CLATTEMBURG (Inghilterra).3 Nun sulo pecché siscaje a ccazze ‘e cane, ma soprattutto pecché ô 79’ piglianno ‘a sputazza p’’a lira ‘argiento assignaje ‘nu ricore ê turche can un ce steva datose ‘nu pallone jette a ccogliere ‘o guveto sullevato ‘e Maksimoviccio mentre ‘o giuvinotto aizava ‘o vraccio cercanno ‘e scanzarese da ‘na pallunata, senza jì isso a ccercà ‘o pallone. E fermammoce cca. ‘O Napule torna a gghiucà ‘ncampiunato sapato ca vene e ppirciò si dDi’ vo’ ce sentimmo dummeneca ca vene speranno ca ve pozzo cuntà ca ‘o Napule à vinciuto cu ttutto ca sàpato ce ‘a vidimmo ô san Paolo cu cchilli periculuse nnacchennelle d’’a scuatra d’’o pappavallo ‘e Lotito! Staveti bbe’. R.Bracale Brak