ZEPPULELLE D’ ’A FESTA D’ ‘A ‘MMACULATA

ZEPPULELLE D’ ’A FESTA D’ ‘A ‘MMACULATA (zeppulelle ‘e nonna ‘Mmaculatina) chello ca serve pe ffà 64 zeppulelle 1 kilò ‘e sciore 00, 1 kilò ‘e patate arvate (lessate) cu tutt’ ‘a pelle dinto abbunnante n acqua salata (cu ‘na vrancata ‘e sale duppio), po spellate e scafacciate cu ‘a scafacciapatane, 200 gramme ‘e ‘nzogna, 8 ova, 2 cucchiarine ‘e sale fino, 4 cucchiare ‘e zuccaro semolato, 2 e 1/2 farinule (dadi) ‘e lievito ‘e bbirra, 100 gramme d’ uva passa ammullata cu ‘nu bicchiere d’ acqua vullente ammiscata cu ‘nu bicchierino d’ annese, 100 gramme ‘e pignuole, zuccaro semolato e ccannella p’ ‘a presentazziona quanto ne serve. Comme se fa S’accummencia ammullanno ll’uva passa cu ‘nu bicchiere d’ acqua vullente ammiscata cu ‘nu bicchierino d’ annese; ‘ncopp’ô laganaturo o ‘ncopp’a ‘nu marmulo se forma ‘na funtana cu ‘o sciore e se mettono dinto a ‘sta funtana, proprio ‘mmiezo ‘e ppatane scafacciate (schiacciate),’a ‘nzogna , ll’ ova, ‘o ssale, ‘o zuccaro e ‘o crísceto (livieto) accumpliato (sciolto) dinto a ppoca acqua tupella(tiepida); s’accummencia a ‘mpastà agnadenno (aggiungendo) ll’uva passa ammullata e zenniata (strizzata) e ‘e pignuole; si ‘ o ‘mpasto s’êss’ ‘a azzeccà ‘mmano agnadí ‘nu poco ‘e sciore nfi’ a avé ‘na pasta dellicata e malacosa (elastica e morbida);furmarne ‘na bbella panetta e metterla a crescere ô ccaudo pe mez’ora cummigliata cu ‘nu telo ‘e cucina frisco ‘e culata e asciutto. Passata ‘a mez’ora staccà dâ panetta tanti piezze ‘e pasta gruosse quanto ‘nu mennarinulo e rullànnole ‘ncopp’ô laganaturo, furmarne tanti mazzarielle gruosse comme a ‘nu dito; sovrappunenno ‘e ccode d’ ‘e mazzarielle furmà ‘na specie ‘e L piccerella premenno ‘ncopp’ô punto d’accavallo oppure furmà tanti tarallucce ‘e cinche cm. ‘e diametr; si uno nun tène pacienza po’ ffà ‘o mazzariello ‘nu poco cchiú duppio e tagliarlo a pezzullo ‘e duje centimetre;appujà chesti L piccerelle, ‘sti tarallucce o ‘sti pezzulle ‘e duje centimetre una vicino a ll’ate (ma nun troppo, si no quanno cresceno s’azzeccano)’ncopp’ a n’ atu telo ‘e cucina frisco ‘e culata e verniciato ‘e sciore e cummiglià tutto cu n’ atu telo ‘e cucina e lassà crescere pe n’ ata ora. Passato ‘o tiempo pigliarle pesule pesule e frijere ‘sti zeppulelle d’ ‘a ‘mMaculata poco pe vvote dinto a paricchiu uoglio ‘e semmente vullente e futo; sullevarle jonne jonne cu ‘na spumandera (schiumarola) e metterle ‘ncopp’ a dduje foglie ‘e carta asciugante;diaspurrasannole (cospargendole) cu zuccaro e ccannella ammiscate e servirle ancòra caude ‘e tiella giacché fredde se ‘ntostano ‘nu poco. Mettitece ‘a coppo ‘nu bbuonu bicchieriello ‘e janco friddo ‘e jacciaja! Mangia Napule, scialàteve e facítene salute Raffaele Bracale.