NAPOLI – CROTONE (12.03.17) 3 A 0 ‘A VEDETTE ACCUSSÍ

NAPOLI – CROTONE (12.03.17) 3 A 0 ‘A VEDETTE ACCUSSÍ Tutto a pposto guagliú! Ajere a ll’ora d’’a tiella ‘o Napule scennette ‘ncampo ô san Paolo, cu ‘a muntazzimma (divisa) justa: chella d’’a Maronna ‘e ll’Arco, contr’ê frate-cucine calavrise d’’o Crotone i ‘e ppaccherajeno, comme se mmeretavano, pe ttre a zzero e si Peppe ‘a ‘nguenta nun avesse tirato ‘mmano ô purtiere lloro ‘nu pallone r’ oro êssemo vinciuto pure cchiú llargo. Pacienza jette accussí e ccuntentammoce d’’o tre a zzero ca ce permettette nun sulo ‘e mantené ‘a porta acrata (inviolata), ma soprattutto i allimmeno nsi’ a ajeressera quanno ‘a Roma jette a vvencere a pPalermo, ‘e zumpà ‘ncuollo ê pecurare rumanise cunquistanno ‘o siconno posto ‘ncrassifica. È overo ca ce servetteno dduje ricure, ca, ‘ngrazzianno ô Cielo, nun sbagliajemo [‘o primmo, ô 31’, pe ccarí (fallo) ‘ncuollo a lLorenzigno ca po ‘o signaje sbluccanno ‘o sibbacco (match) i ‘o siconno, ô 66’, pe ccarí(fallo) ‘ncuollo a mMarekiaro ca ‘o lassaje tirà a cCiruzzo,finalmente trasuto ô posto d’’o pacco(e ppo ve dico)... ] e ca ce stetteno tutt’’e dduje e cchillu pecuraro ‘e ll’arbitro Mariani(5 e ppo ve dico)fove custretto a siscà..., ma ‘a terza addaffa (rete), chella d’’a sicurtà (sicurezza) ô 69’, fove ‘na pennellata ‘e Giorgigno, ca urtizzaje (verticalizzò)’nu granne bbassurero (suggerimento) pelLorenzigno ca ‘o mettette a ffrutto signanno ‘a pareglia (doppietta) soja ca ‘o purtaje a 11 stuche (gol) ‘ncampiunato...[cu ttutto ca chilli scieme ‘e Televideo, canun sanno manco purtà ‘e cunte,ce n’assegnano ancòra diece!] mentre Ciruzzo cu ‘a soja arrivaje â bbellezza ‘e 19 stuche (gol) mettennose ‘mparo cu cchella granna lota jummerdina ca nun annommeno e scusate si è ppoco! ‘Nzomma tutto jette a cciammiello ‘a fora ‘e chillu pacco senza nocca, attaccato cu ‘nu capo ‘e spavo spapacciato ca aizaje porvera pe sissantaduje minute cumplessive e ffove cchiú ‘e ‘mpiccio ca ato. ‘E chi parlo? Naturalmente ‘e Pavoletti (3) ca Sarri(5 e ppo ve dico) se ‘nfessette a ttené ‘ncampo e ppe farlo se ‘nventaje ca sant’Arcadio nun sta ancòra ô ciento pe cciento, mentr’ i’ so’ cunvinto ca pure cu ‘na stanfella sott’ô vraccio ‘o pulaccone êsse saputo fà assaje ‘e cchiú ‘e ll’ècchese ggenuano. Lassammo stà e ppassammo ê ppaggelle: REINA 7:E s’’o mmereta tutto pecché ‘mprimmose dètte ll’ammanna (sicurezza) nicessaria a ttutt’’a sezziona (reparto), ‘ncopp’a ll’uno a zzero cu n’azzeccato taccullo (intervento) fermaje ‘na cuchiusiona periculosa ‘e Falcinelli, mantenette acrata (inviolata) ‘a porta e cu ‘nu lanzo ‘e dritta ‘e sissanta metre mettette ‘a palla ‘ncopp’ê piere ‘e Peppe ‘a ‘nguenta, ca però sciupaje. HYSAJ 6: ‘A fora ‘e ‘nu paro ‘e sfregazze (sbavature) difenzive, facette chello ch’êv’’a fà. CHIRICHES[‘O Vampiro] 6: Pigliaje ‘o posto d’Albiòlle cumannanno ‘a trasera (difesa) cu ccegna (grinta) e tarirra (determinazione),favurito dê nassíe (attaccanti)calavrise, overo poca rrobba e gghiette ‘nu piacere. KOULIBALY 6: Fove prutacunista ‘e ‘nu paro ‘e bboni igracche (chiusure), facennose perdunà quacche prano (errrore) d’anfisallo (disimpegno). STRINIC 6.5: Mettette a ffrutto ll’accasiona avuta currenno assaje pe ttutt’ ‘a curzia e arrivanno pure ô tiro. ROG [‘A Belva] 5,5: ‘E cchiú nun lle pozzo mettere pecché ajere ‘o guaglione perdette troppi palle i esaggeraje cu ‘e carí(falli),arresecanno d’essere jettato fora e custrignenno Sarri a llevarelo.[dô 55’ ZIELINSKI 6: Urdinaria amministrazziona p’isso ca trasette deciso a ffà coccosa, ma - cu ‘e calavrise tutte arruccate addereto – nun êtt’’a difennere e putette pirciò dimustrà ‘e cqualità ssoje cu quacca crusía (percussione) centrale.] JORGINHO 6.5: ‘Nfra ‘e cchiú masculle (lucidi) facette tutto ‘o ssuĵo e ppure coccosa ‘e cchiú comme a cchella pennellata centrale pe lLorenzigno ca lle frutta ‘o miezu zifo (voto) ‘e cchiú! HAMSIK 6: Se prucuraje ‘o ricore d’’o doje a zzero e dètte ‘na bbona mana a Ggiorgigno nsi’ ô nuvantesimo d''a mubbara (partita). CALLEJON 5,5: Ajere me piacette poco; ‘o vedette senza ggenio: avette ‘nu paro ‘e bboni accasione i ‘e sciupaje tutt’’e ddoje! E cche saciccio! PAVOLETTI 3: ‘Stu pacco senza nocca, attaccato cu ‘nu capo ‘e spavo spapacciato mettette malincunia a dd’ ‘o vedé fremmo lla mmiezo comme a n’ arcanjaria (paracarro) cuntinuanno a essere ‘nu pesce fora ‘e ll’acqua,nun ghienno maje ‘ncontr’â palla, aspettanno d’essere servuto cumm’ô prevete a ll’aldare, senza maje partecipà ô juoco d’’a scuatra e dimustrannose spisso scuonceco e zzàffio(goffo). Ll'unica vota ca aizaje 'o culo 'a terra sfresaje(sfiorò) appena appena 'na palla 'e capa i 'a mannaje fora e n'ata vota dette 'mpiccio a Striniccio, ca piazzato meglio d'isso avesse pututo sfruttà '0e capa 'na bboca accasione. Ma va' arruobbe dint'ê cchiese! [dô 62' MERTENS [Ciruzzo] 7: Cu ll’arillo nuosto fove tutta n’ata musica e nnun sulo p’’o ricore miso dinto; trasette, signaje, sfresaje ‘a pareglia (sfiorò la doppietta) e cce facette divertí!] INSIGNE [Lorenzigno]7.5: Ommo mubbara (partita), mo comme a mmo nun se ne po’ ffà a mmeno; durante ô primmo ajone (nel primo tempo) nun sulo scarfaje ‘e mmane d’’o capitano calavrese cu ‘nu bbellu tiro d’’e suoje a ggiro e ppo ‘o futtette da ll’unnice metre, ma po pezzecaje inutilmente a pPeppe ‘a ‘nguenta cu ‘nu lanzo a zzuco ‘e caramella i a ll’arrancua (nella ripresa) facette calà ‘o sipario ‘ncopp’ô sibbacco (match),mettenno a ffrutto ‘a pennellata centrale ‘e gGiorgigno. ‘Nzomma firmaje ‘a pareglia (doppietta) dicisiva e, comme v’aggiu ditto, arrivaje a unnece addaffe (reti) ‘ncampiunato â faccia d’’e pennarule ‘e Televideo!Assulutamente muttacarro (ispirato). [dô 73’ GIACCHERINI s.v.: D’accordo ca trasette tarde i a gghiuche fatte e cce mettette ‘o ppoco ‘e bbona vuluntà, ma facette poco e nniente!] all. SARRI 5 ‘O Napule, ch’isso vuleva “arraggiato”facette chello ca s’aspettava, ma ‘o meno arraggiato fove proprio isso ca ce facette perdere ‘a bbellezza ‘e sissantaduje minute ‘nfessennose a ttené ‘ncampo a cchillu pacco ‘e Pavoletti e siccomme po è ppure ccapoteco pe nnun passà pe ffesso jette smammanno, comme v’aggiu ditto, ‘a storia ca sant’Arcadio s’à dda ancòra allenà... Va’ vattenne! Rafanié fatte accattà ‘a chi nun te sape! Arb. MARIANI 5 Chisto certamente ‘a piccerillo êtt’’a cadé cu ‘a capa ‘nterra ‘a copp’ô siggione i ‘o pate fove custretto a ddicerle: “Guagliò, mo o faje ‘o pecuraro o faje ll’arbitro” e ssiccomme ‘o guaglione nun sulo era scemo, ma pure prosuntuoso decidette ‘e fà ll’arbitro jenno siscanno ad capocchiam ‘ncopp’ê campe tagliane e ajere dimustraje quant’è scadente nun vedenno paricchi carí (falli) ‘ndanno d’’e cuane(azzurri) o caputiannole, senza pe ffurtuna farece troppi fetenzie, anze dannoce pure dduje ricure a ffavore nuosto..., ma chille ll’êsse viste pure ‘nu cecato!Cert’è ca me piacesse sapé dô palazzo pecché mannaje n’arbitro rumano a arbitrà ‘o Napule, quanno ‘e cuane (azzurri) proto cu ‘a Rama stanno battaglianno p’’o siconno posto ! E ccu cchesto ve saluto; fermammoce cca ddannoce appuntamento, si dDi’ vo’ a llunnerí ca vene doppo d’’a nàcchela (trasferta) a Empoli a ll’ora ‘e ll’apritivo contro a ‘na scuatra ‘ncazzata assaje p’avé pigliato quatto palle dô Chievo. E sperammo, pure si nunn’è ‘na passiata, ca ve pozzo cuntà bbelli ccose! Staveti bbe’. R.Bracale Brak