NAPOLI – UDINESE (15/04/17) 3 A 0 ‘A VEDETTE ACCUSSÍ

NAPOLI – UDINESE (15/04/17) 3 A 0

‘A VEDETTE  ACCUSSÍ

Alleluja alleluja guagliú! Ajeressera ô san Paolo se sciugliette ‘a ‘rolia cu quacch’ora d’ancerca (anticipo) i ‘o Napule, tenenne ‘o passo d’’a vecchia zoccola e apprufittanno d’’o miezu passo favezo fatto dê pecurare rumanise pe mmano ‘e ll’Atalanta [scuatra assineja(satellite) ‘e chella d’’e llote] cunquistaje ‘e tre ppunte stennenno ll’Udinese cu ttutto ca ‘e cuane (azzurri) scennetteno ‘ncampo vestute a llutto pe bbia ca chilli scieme ‘e delneri s’ereno miso ‘ncuollo ‘mmece d’’a maglia ‘e carcerate ‘na cosa streuza e scagnata  passata ‘int’â varricchina... e ccu ttutto ca ce facetteno fà ‘o cuollo luongo e ppe vederle vencere e bbuono,ammenestanno pe ll’Udinese tre mmammarelle una cchiú sapurita ‘e ll’ata, ce facetteno aspettà ll’arrancua (ripresa) doppo ‘nu primmo ajone (tempo) passato a ppiglià ‘e mmesure. Però ggià ô 47’ cu cCiruzzo  ‘o Napule recugliette chello ca aveva semmenato mettennose ‘ncopp’a ll’uno a zzero e ppo ô 63’ cu ‘o ‘Ncrifato mettette dinto ‘a siconna mammarella ‘e ‘nchiudette ‘a prattica ô 72’ cu Peppe ‘a ‘nguenta ca pruvvedette a ccunní ‘a terza. E accussí, guagliú ‘o  Napule cunzulidaje ‘o terzo postom ‘ncrassifica  saglienno  a zzamma  (quota) 70 a ffà sentí ‘o sciato luvardo (azzurro)’ncopp’ô cuollo d’ ‘e pecurare rumanise! Passammo ê ppaggelle.

    REINA 6,5 Serata pusitiva p’’o purtiere nuosto ca riuscette a mmantené ‘a porta acrata soprattutto ‘into a ll’urdemi ggire ‘e lancette cu cquacche asciuta pricisa e pruvvedenziale e nun facennose surprennere ‘a ‘na sciarirra (scellerata) cabbesera (colpo di testa) a gghì arreto’e Peppe ‘a ‘nguenta ch’ isso mannaje ‘a copp’a ll’afachía (traversa). P’’o riesto êtt’’a fa poco e ffove furtunato ô nnicessario quanno Zapata cugliette ‘o palo. ‘Assa fa ô Cielo!

HYSAJ 6,5[Meza cucchiara]  Prutacunista ‘e n’ atalossa (prestazione)pricisa e sistemata a ll’epata difenziva (in fase difensiva), ma pure quanno accumpagnaje ‘o ccupulià (dialogare)  d’ ‘o ‘Ncrifato e pPeppe ‘a ‘nguenta.

ALBIOL[‘o Masto] 6,5 Nun arresecaje niente quanno ascette,nun facette sfregazze  (sbavature) e risultaje pulitelico  (prezioso) p’’o juoco auto,gestiunanno  (gestendo) cu ll’uddú (calma)nicessario  e ccu mmestiere ‘e ppalle ca lle capitajeno.

KOULIBALY 6 Mantenette bbuono a   zZapata, mettenno ‘a musarola a uno d’’e jucatura avverzarie cchiú ‘nforma e llassannole ‘na palla sola ‘nnaccasione d’’o palo d’’o culumbiano. P’’o riesto facette cca e lla  bboni igracche   (chiusure) apprezzate dô san Paolo.

STRINIC 6,5 – Se facette vedé spisso annante, mentre arreto se dimustraje cchiú ppusitivo ‘e Ghoulam[me] ca, pare se ne vo’ jí.   Titulare e ss’ ‘o mmereta. Peccato pe cchilli tire ‘e squina (corner) tirate a bbienetenne...

ALLAN[‘O ‘Ncrifato] 7 Cunfermaje ‘e stà ‘mpressione magnannose ll’avverzarie p’’a zurea (ritmo), ricuperaje tanti pallune però accumpagnaje ll’qazziona sempe cu ccegna (grinta)caparbiamente comme ‘nnaccasione ‘e ll’addaffa (rete) quanno comme a ‘nu farcone s’avventaje ‘ncopp’ô pallone pe ffuyrminà a cKarnezis[se]. Po, pe rrispetto a ll’ecchese cumpagne nun facette festa  [dô 70' ROG[‘a Belva] 6   Sulo ‘na ventina ‘e  minute ô posto d’’o ‘Ncrifato, ma se mettette ‘ntusiello tenenno auta ‘a pressiona pure ô niajo (finale) ‘e mubbara   (partita).]

JORGINHO 7 Oramaje sta ‘ntala cundizziona ca nun ‘o puó llevà; Ajeressera curmaje ‘e bbelli atalosse (prestazioni) contro vecchia zoccola e llazzio. Pure pressato ‘a vicino da ‘nu marcantonio comme Hallfredsson[ne]sbagliaje poco e nniente e sse chiammaje ll’applavuso d’’o san Paolo e d’’e cumpagne . cu cchell’ istiglia (verticalizzazione) ca lanzaje ‘mporta a cCiruzzo,  ca sbluccaje ‘o sibbacco (match).

Hamsik 6,5  Pure ajeressera quanno ‘o Napule crijaje coccosa ‘e bbuono ‘o capitano ce mettette d’’o ssuojo comme ‘nnaccasione  d’’o primmo stuco (gol) quanno pure senza tuccà palla se carriaje appriesso uno d’’e centrale arapenno ‘a trasera (difesa) pe ppermettere a cCiruzzo ‘e trasí; pure ‘nnaccasione d’’o siconno stuco (gol)accumpagnaje ‘a vicino ô ‘Ncrifato e cumplessivamente cuntribuetrte a aizà  ‘a zurea (ritmo). Ascette a gghiuoche fatte pe ppiglià sciato[dô 77' ZIELINSKI 6 ‘e stima pecché êtte ‘a fà poco. ]

CALLEJON[Peppe ‘a ‘nguenta] 6,5 Ô pprincipio ‘e mubbara (inizio gara) Adnan[ne] riuscette a bbluccarlo, ma po dalle e ddale ‘o cucuzziello addiventa tallo, Peppe ‘a ‘nguenta,venette fora ‘nzistentemente e ô 72’, mettette dinto, cu ‘na ggirata sturiata e zzumpettante, ‘a mammarella d’’o tre a zzero, arrivanno pur’isso a ddiece stuche (gol) ‘ncampiunato.P’’o riesto nsi’ ô prazzo (fine)  se sacrificaje jucanno p’’a scuatra e  dànno tauazzunno(equilibrio).

MERTENS[Ciruzzo] 7 Durante ô primmo ajone (nel primo tempo), quanno ‘o Napule pigliaje ‘e mmesure  se vedette poco, ma ll’abbastaje ‘o primmo pallone justo ô pprincipio d’arrancua (ripresa), pe tturnà a ssignà [vintunesima addaffa (rete) ‘ncampiunato e ventisettesima d’’a tempurata (stagione)] risultanno ancòra dicisivo; nun cuntento dette dimustrazziona ‘e jauada (qualità) e ssacrifiggio,ricuperanno ‘a palla ca purtaje ô doje a zzero. [dal 77' MILIK[sant’Arcadio] 6 Pure si a gghiuoche ggià fatte scennette ‘ncampo diciso a ffaresevalé i a ddà ‘na mana e ppoco mancaje ca ‘ncopp’a ‘na bbella palla ‘e Peppe ‘a ‘nguenta nun se levasse ‘o sfizzio ‘e turnà a ssignà; peccato ca ‘e suoje nun lle furnetteno palla ‘ncopp’ê tire ‘e squina (corner).]

INSIGNE 6,5 – Pure ajeressera, pure si meno d’ati vvote, fove funnamentale p’’e muamarre (trame) uffenzive d’’o Napule comme a cquanno sventagliaje ‘na bbella palla pe Ppeppe ‘a ‘nguenta ô niajo (nel finale).

all. SARRI 6,5 Ajeressera ‘ncarraje tutto,cumprese ‘e  cagne fatte a mmestiere ô mumento justo. ‘O  Napule suĵo parette ‘nu malachimmo (pugile)marpione: apprimma  sturiaje e stancaje ll’avverzario e ppo a ll’arrancua (ripresa) ‘o stennette cu ttre ccazzotte fremme sott’ê mmole!

arbitro MASSA 4,5  Ce facette sulo ddoje grossi fetenzie nun dannoce  dduje ricure ca ce steveno [uno p’ajone(tempo)] e     pp’ ‘o riesto  siscaje – pe ppartito pigliato – spisso contr’ê cuane (azzurri) caputianno ‘e carí (falli). E cche saciccio!Pussibbile ca tutte ll’arbitre ce ànno rompere ‘o pasticciotto?

E fermammoce cca, cuntente ‘e comme jette ajeressera e ringrazzianno ô Cielo ‘e nnun averece ‘ntussecato casatiello, tortano, pastiera, beneditto e mmammarelle... Ve faccio ll’avucurie ‘e ‘na santa Pasca ‘e  pace, saluta e ccuitudine  e ssi dDi’ vo’ ve donco appuntamento pe llunnerí vintiquatto doppo d’’a  nacchella ( trasferta) d’’a dummeneca, a ll’ora ‘e ll’apritivo, a sSassuolo contro n’ata scuatra assineja (satellite) d’’a vecchia zoccola. E sperammo ca pozzo cuntarve cose bbone!Staveti bbe’.

 R.Bracale Brask