SAMPDORIA – NAPOLI ( 28/05/17) 2 A 4 ‘A VEDETTE ACCUSSÍ

SAMPDORIA – NAPOLI ( 28/05/17) 2 A 4

‘A VEDETTE  ACCUSSÍ

                 E accussì guagliú ajere calaje ‘o sipario ‘ncopp’a ll’ ennesimu campiunato-farzetta ca fenette accussí cumme ‘o Palazzo êva diciso cu ‘a vecchia zoccola primma i ‘a scuatra d’’o Pupone [ca ajere finalmente se decidette a appenere, pe ssempe, ‘a scarpetta ô chiuvo...]  siconna i ‘o Napule sulo terzo, custretto a gghiucà ‘e prèvie (preliminari)’e Ciampionsa, cu ttutto ca dâ primma a ll’urdema jurnata ‘o Napule  facette vedé ‘o juoco cchiú bbello e spassuso signanno cumplessivamente ‘a bbellezza ‘e nuvantaquatto addaffe (reti)  e ttutto chesto pecché ‘o presidente cuano (azzurro) ‘int’ô Palazzo conta quanto ‘o doje ‘e coppe a bbriscula [quanno ‘o triunfo è a mmazze] e ppirciò pure ‘a nichemata (vittoria) larga d’ajere a Marassi contr’ê profuche ‘e Giampaolo [ca asseccajeno quatto bbuffettune] nun ce servette pe permetterce d’arrivà ô siconno posto ggià assignato dô Palazzo â Roma ca tene paricchi diebbete cu ‘e bbanche e aveva fà nicessariamente  denare.E ppirciò a nniente servette ca pure ajere ‘o Napule dimustrasse d’essere troppo forte, e che pe bbona parta d’’a mubbara (partita) sperasse ‘e surpassà ‘a   Roma,p’essere po deluso all’urdemu minuto dâ solita pastetta d’’a scuatra d’’e pecurare ca vincetteno justo ô nuvantesimo pe ttre a ddoje.

E ccomme ve dicevo a nniente servette ca ggià durante ô primmo ajone (nel primo tempo) ‘o Napule facesse vedé e nunn’essere juto a  gGenova ‘ngita ‘e piacere pe vvedé ‘a Lanterna e assaggià ‘e spicialità lucale, ma pe vvencere e ccumminfatte  doppo ‘e cchiú ‘e n’ accasione ô 36' sbluccaje ‘o sibbacco (match)cu Ciruzzo lesto a sfruttà ‘na puttanata ‘e   Regini. ‘A Sampedoria ‘ntrunata jette ‘int’ô nuvanta e ‘ncapo ‘e seje minute ô 42’ Lorenzigno ll’assestaje ‘o siconno pacchero a votavraccio cu ‘nu tiro a mmiezu ggiro ca lassaje senza parole pe cquanto fove bbello e ppriciso. Ll’ati dduje panesiglie arrivajeno po a ll’arrancua (ripresa), ‘o primmo ô 49’ cu Marekiaro ca mettette a ffrutto cu ‘na cabbesera (colpo di testa) ‘nu cupuliamiento (dialogo) ‘nfra Lorenzigno e pPeppe ‘a ‘nguenta, e ffove ll’addaffa (rete) d’’o tre a zzero; ll’urdemu cinchefranco fove chillo bell’assaje proprio  ‘e Peppe ‘a ‘nguenta ca ô 60’ a vvolo mettette dinto ‘nu bbassurero (suggerimento) ‘e Lorenzigno ca ‘o piscaje da ‘na curzia a ll’ata.  Peccato ca ‘mmiez’â sbrasata cuana (azzurra) se ‘ntrumettettono ddoje fessarie[e ppo ve dico...] d’’o Vampiro ca nun ce permettettono ‘e mantenere ‘a porta acrata (inviolata). Pacienza; tanto è ‘na sciaccata, tanto è ‘nu caucio ‘nculo; quatto a zzero o quatto a ddoje sempe tre so’ ‘e punte cunquistate! Passammo ê ppaggelle:

REINA 5,5 Miezu zifo(voto) mancante pecché nun pozzo perdunarle ‘o siconno stuco (gol) pigliato ‘ncopp’ô palo suojo. Peccato avé cunchiuso ‘o campiunato senza riuscí a mmantenere ‘a porta acrata (inviolata); è overo ca nun fove tutta sfarma (colpa) soja, ma coccosa ‘e cchiú, ll’êsse avut’’a fa!

HYSAI[Meza cucchiara] 6 ‘A solita bbona atalossa(prestazione) ‘e trancara (contenimento)senza nisciunu sfregazzo (sbavatura).

CHIRICHES[‘O Vampiro] 5,5 Miezu zifo(voto) mancante pe bbia ‘e chelli ddoje fessarie fatte ‘nnaccasione d’’e ddoje addaffe (reti) d’’e profuche lucale: ‘a primma, ô 50’, permettenno   a qQuagliarella ‘e passarele ê spalle, i ‘a siconna facennose passà ô 90’, pe ‘mmiez’ê piere ‘o tiro d’Alvarezzo. Che peccato, pecché p’’o riesto jucaje bbuono! 

KOULIBALY 5,5 Miezu zifo(voto) mancante pure a isso  pe bbia ca pure si riuscette a mmettere ‘a musarola ô masdarcalo (spauracchio) Schick,ô 50’ lle cunzentette ‘e sfresà(sfiorare) ‘e capa  ‘a palla ca cunzentette a cchillu sittantuno ‘e quagliarella ‘e fotterce. E cche saciccio!

 GHOULAM 6  Dâ parta soja fove ‘nu punto  ‘e sciaratanna (riferimento)cu ‘a solita daffa   (propulsione) soja a mmancina, p’’a verità ajere poco cunnita ‘e jabbre (cross).

JORGINHO 6, 5 Pe ttutt’’e nuvanta minute fove isso ‘o direttore d’urchestra cu  ttantu urtizzà (verticalizzare), tanta ‘nteliggenza e ‘na ggiumetria cu rica scuatra e cumpasso; ‘o brasiliano truvaje spisso ‘e nassie (punte) cu ppalle a zzuco ‘e caramelle e nun capisco pecché Sarri decidette ‘e chiammarlo ‘mpanca primma d’’o tiempo. [dô 71' DIAWARA sv]

ZIELINSKI 5,5 Miezu zifo(voto) mancante pure a isso pecché dô guaglione me fósse aspettato ‘e cchiú, ‘mmece ce pruvaje sulo ‘nu paro ‘e vote, sparagnannose. [dô 67' ROG[‘A Belva] 6 Appena trasuto se dètte da fà azzannanno ê feliette ll’avverzarie e pruvannoce ‘a fora].

HAMSIK 6,5 Sempe prisente ‘int’ â munavara (manovra) e spisso periculuso, cunchiudette ‘na granna azziona ‘nfra Lorenzigno e pPeppe ‘a ‘nguenta, facennose truvà a ccentro d’’a camma (area) peccerella pe ffottere a pPuggioni mettenno dinto ‘a palla d’’o tre a zzero [da ll'84  GIACCHERINI sv].

CALLEJON [Peppe ‘a ‘nguenta] 7  Nun se ne putette fà a mmeno: tanta corza, tanta ‘nteliggenza e ttanta qualità rappresentate da ll’jusaida  (assist) pe Marekiaro e dâ magaria d’o quatto a uno. Cumprimente!

 INSIGNE[Lorenzigno] 8 Cu cchillo d’ajere, da mettere ‘ncurnice foveno diciotto ll’addaffe (rete) ‘ncampiunato e aggiu perzo ‘o cunto ‘e ll’jusaide  (assist) fatte; ‘nzomma pe lLorenzigno s’à dda parlà ‘e granna qualità e ccuntinuità ‘e campione, dimustrate pure ajere a mMarassi. I ‘o presidente ggià se sta alliccanno ‘a varva penzanno a cchello ca po’ recogliere ‘nfromma s’’o venne!  

MERTENS[Ciruzzo] 7,5 Nun saccio si ll’addaffa (rete) d’ajere fove frutto ‘e ‘na magaria o d’’a cazzimma soja. Cert’è ca ‘o vulette i ‘o cercaje p’arrivà a zzamma (quota) 28 ‘ncampiunato a ccunchiusione ‘e ‘na tempurata (stagione) mutavvia (strepitosa).

All. SARRI 7  Pure a ffinale ‘e tempurata  (stagione) ‘o Napule suojo  è ‘nu spettaculo eppure,comme v’aggiu ditto, nun è avastato p’’o siconno posto; ce vo’ coccosa ‘e cchiú: cuntinuità, cattiveria, cazzimma  i ‘o  ccuntà dint’ô Palazzo. È cchesto ca vulimmo dô mese ca trase a gghí ‘nnante: tre da isso i ‘a quarta dô presidente. Ca si no bbellezza e cqualità nun servono e cce ll’azzeccammo arret’â capa .

Arb. BANTI 5 Grossi fetenzie nun ce ne facette, ma – surdo e ccecato cumm’è – ‘stu sacchetto ‘e ll’ummeto senza lazzetto facette sèntere ‘o fetore suojo, siscanno ad capocchiam e ssempe ‘ndanno nuosto!

E fermammoce cca. Accuntentammoce ‘e ‘stu terzo posto e sperammo ca ll’anno ca vene nun perdimmo punte ‘ncasa cu ‘e mmeze cazette comme ‘mmece è succieso, purtroppo, chist’anno!Ve saluto e ssi dDi’ vo’ ve dongo appuntamento mo comme a mmo nun saccio nè si, nè comme nè cquanno. Staveti bbe’. FORZA NAPOLI, CIUCCIO FA’ TU!

R.Bracale Brak