CHIEVO –NAPOLI (am.le 22.07.17) 1 A1

CHIEVO  –NAPOLI (am.le 22.07.17) 1 A1

C’è ppoco ‘a fà, guagliú: uno nun fenesce maje ‘e se fà maraviglia; cumminfatte pure chesto me tuccaje ‘e vedé e cciovè ca ‘o Napule ajeressera a tTrento  pe ll’urdema ammestosa (amichevole) nun fosse crestiano ‘e vattere ‘o Chievo e ss’êtte accuntentà ‘e ‘nu russimmo (pareggio) scartellato e ffove furtuna ca se pariggiaje datose ca addirittura nchiudette ‘o primmo ajone (tempo) ‘nsotto ‘e n’addaffa (rete) a zzero  pe ‘na fessaria ‘e    Koulibalý ca rijalaje palla a ‘nu verunese lassato libbero ‘a Maksimoviccio. Però ’a mancata nichemata (vittoria) nosta d’ajeressera nun dipennette sulo dê ccosce troppo pesante d’’e nuoste;  i’ dico ca ‘na bbona parte  ce ll’avette pure  chella jettatoria muntazzimma (divisa)bblu-savoia  ca nun saccio si Sarri, si Giuntoli, si De La o chi sa’ chi  vulette fà mettere ê nuoste; mo sperammo ca ll’ànnu capito ca nun è ccosa,ca  ‘a ‘mpacchettano e ca ‘a jetteno ‘int’ô cesso! Passammo ê ppaggelle:

REINA 6  Ascette bbuono quanno ll’êtt’’a fà. ‘Ncopp’a ll’addaffa (rete) d’ Inglese riuscette sulamente a ttuccà ‘a palla senza fermarla, ma ‘e cchiú nun putette fà datose ca ‘o jucatore ‘e Marànne steva troppo sulo, libbero e franco e ttiraje troppo forte. [dô 46' RAFAEL sv - Salvato dô palo appena trasuto, p’’o riesto d’’a serata nun êtte ‘a fà quase niente.]

HYSAJ 6  S’arrangiaje a ffà chello ca puteva pruvanno a ffà ‘a guardia ô bbidone,ma  accumpagnanno poco ll’azziona. [dô 46' MAGGIO 6  Appressuraje (spinse) paricchio apprufittanno ca ‘o cumpagno ‘e curzia,Ounàsso, ‘o lanzaje truvanno curridure ‘mpussibbile; arreto nun  sbagliaje quase niente.]  

MAKSIMOVIC 5,5  ‘nnaccasione ‘e ll’addaffa verunese se facette truvà fora pusizzione; cercaje ‘e farese perdunà cu ‘nu paro ‘e bboni cchiusure, ma nun mancajeno cchiú ‘e ‘nu sfregazzo (sbavatura) ca ‘nu centrale nun po’ permetterse! [dô 46' ALBIOL[‘O Masto] 6 Ll’arrancua (ripresa) fove cuntrullata dô Napule e ‘o Masto êtte ‘a fà poco gestiunanno (gestendo) bbuono ll’asciute dâ trasera (difesa)].

KOULIBALY 5,5 Miezu zifo (voto) mancante p’’a fessaria fatta ca ce custaje (27’) ll’addaffa (rete); p’’o riesto nun se cumpurtaje malamente.   [dô 46' TONELLI sv  Ajeressera grossi fessarie nun ne facette e ttutto summato passaje n’ajone (tempo) tranquillo senza farece ‘ncazzà!]

GHOULAM 5,5 -  Serata no ‘e ll’algerino ca  spisso nun mantenette ‘a pusizziona cuncedenno ô Chievo ‘e aizà ‘a voce ‘ncopp’â curzia soja; p’’o riesto annante nun riuscette a ccupulià (dialogare) nè cu lLorenzigno, nè cu mMarekiaro. [dô 46' MARIO RUI 6 Accumpagnaje ll’azziona cercanno ‘e superà ll’avverzario e ccocche vvota ‘o ffacette.]

ROG 5,5 - Miezu zifo (voto) mancante pecché si jette bbuono quanno se trattaje ‘e luttà, perdette quacche ppallone e nnun me parette ancòra ‘ncundizziona.[dô 46' ALLAN 6 A ppietto ‘e quacche cumpagno me parette ggià ‘ncundizziona luttanno cu ccegna (grinta) cu ttutte quante, purtanno â casa cchiú ‘e ‘nu pallone e abbuscannose ‘nu paro ‘e timmurrie dô lemmeto.] 

JORGINHO 6 – Facette ggirà bbuono palla pe bbona mez’ora facenno  chello ch’êv’’a fà.[dô 46'  DIAWARA 6 – Trasette dànno forza â linia ‘e miezo pe ccuntrullà ‘o fullé (match) mettennoce pure ll’armaddia (fisico) quanno fove nicessario.]

HAMSIK[Marekiaro] 6  Cercaje, p’’a primma mez’ora  ’d’epitachinejà (velocizzare) ‘o juoco cu ‘e solite pasiglie (passaggi) pe mmannà dinto ll’esterne, ma dimustraje ‘e nun tené ‘a solita pulunessa (brillantezza) ca lle sapimmo. .[dô 46'  ZIELINSKI 6  Accumminciaje cu cquacche pprano (errore), ma po criscette taglianno spisso ‘o campo pe nchiudere e ddà ‘na mana addó nicessario.]

CALLEJÓN[Peppe ‘a ‘nguenta] 6 ‘Nu poco prosuntuoso, penzaje ca tutte ‘e mise fosseno ‘e trentuno, ma ajeressera ‘o pallunetto,tentato inutilmente, fenette auto; ‘ncumpenso cercaje  bbassurere (suggerimenti) adatte p’’e cumpagne ca però sciupajeno. [dô 46'  OUNAS 7,5  E s’’e mmereta tutte datose ca nun sulo (58’) ce levaje ‘e ccastagne dô ffuoco ma dètte ‘a zamma  (scossa) â scuatra tassarianno   (accelerando) ll’azziona,zumpanno ll’avverzario cu gghiucate ‘e qualità e perzunalità.Pronto e ddiciso a ttruvarese ô posto justo pe mettere a ffrutto ‘a rispinta ‘nnacasiona d’’o russimmo (pareggio).]

MERTENS[Ciruzzo] 6  Tutto summato atalossa (prova) pusitiva ‘a soja pure si nun signaje, ‘nu poco pe sfurtuna, ‘nu poco pe pricipitazziona; cugliette ‘nu palo[o duje]e sviluppaje cchiú ‘e n’azziona uffenziva [dô 46'  GIACCHERINI sv  Tanta corza, ma troppi prane (errori) spicialmente quanno ss’avut’’a cupulià (dialogare)!]

INSIGNE[Lorenzigno] 6,5  S’êsse ‘a fà bbenedicere, pecché fove sfurtunato mancanno ‘nu paro accasione ‘a duje passe e cquanno Sorrentino facette ‘nu miraculo fermannole ‘nu tiro ‘a fora. Salvaje ‘e cumpagne ‘nu paro ‘e vote turnanno arreto pe ffermà palle periculose.[dô 46'  MILIK 6  Ajeressera nun lle riuscette ‘e truvà ll’addaffa (rete), ma tuttutto summato facette ‘o ssuojo cumbattenno cu ll’avverzarie ca nun lle cuncedetteno ‘nu centimetro e ppe gghionta ‘e ruotolo,Giaccherini nun lle dètte ‘a mana nicessaria cupulianno (dialogando) cu isso.]

All. SARRI 5,5 Chillo d’ajere nun fove ‘o Napule solito; dàtose ca ‘e ccosce foveno pesante, mancajeno zureja  (ritmo),tassezza (velocità) e ppulunessa  (brillantezza) ca nun ponno mancà ‘int’ô previo (preliminare). Sperammo ca riesce a ffà coccosa pe  mmetterce ‘na pezza! arbitro: AURELIANO 6 – Voglio essere bbuono. Niente ‘a dicere!

E ccu cchesto ve saluto e rringrazzio dànnove appuntamento, si dDi’ vo’, mo comme a mmo nun saccio nè quanno, nè ccomme;   speranno sulo  ‘e putereve cuntà bbelli ccose. Ciuccio fa’ tu! Staveti bbe’.

R.Bracale Brak